Тхылъ нэпцIхэмкIэ ахъщэр къаIихыщтыгъ
Тэхъутэмыкъое районым щыщ бзылъфыгъэм гъэпцIагъэ хэлъэу ахъщэ тынхэр зэригъэпсыгъэхэм фэшI иIоф хьыкумыр хэплъагъ.
Тэхъутэмыкъое район хьыкумым илъэс 52-рэ зыныбжь Анжела Яврумян Урысыем и Уголовнэ кодекс ия 159.2-рэ статья ия 4-рэ Iахь къыщыдэлъытэгъэ бзэджэшIагъэ зэрихьагъэу ыумысыгъ.
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ иIофышIэхэм зэрагъэунэфыгъэмкIэ, сэкъатныгъэ зэрагъэуцурэ узхэм ащыщ иIэу къэзыгъэлъэгъорэ тхылъ нэпцIхэр УФ-м социальнэ страхованиемкIэ и Фонд и Къутамэу АР-м щыIэм ритыхи, хэбзэнчъэу ахъщэ тын ыгъэпсыгъагъ. ПстэумкIи ащ тетэу сомэ миллионрэ мини 178,8-рэ къыратыгъ.
Тэхъутэмыкъое район хьыкумым условнэ шIыкIэм тетэу илъэси 2-рэ пшъэдэкIыжь ыхьынэу ыкIи ащ фэдиз ушэтын пIалъэу тырилъхьагъ.