УФ-м хэгъэгу кIоцI IофхэмкIэ и Министерствэ следствиехэмкIэ и ГъэIорышIапIэу АР-м щыIэм хэбзэнчъэу телефон номерхэр зэрагъэфедэхэрэм фэгъэ­хьыгъэ уголовнэ Iоф къызэIуихыгъ.

ЩынэгъончъэнымкIэ Федеральнэ къулыкъумрэ хэгъэгу кIоцI IофхэмкIэ Министерствэмрэ АР-мкIэ ягъэ­IорышIапIэхэм яIофышIэхэм оперативнэ-лъыхъон Iоф­тхьабзэу зэрахьагъэхэм яшIуагъэкIэ къаугъоигъэ материалхэр ащ лъапсэ фэхъугъэх.
ЗэрагъэунэфыгъэмкIэ, Томскэ хэкум щыщхэу илъэс 19 зыныбжь хъулъфыгъитIум бэджэндэу аштэгъэ фэтэрым хэбзэнчъэу зэпхыныгъэм иузел щагъэпсы­гъагъ. Телефон картэ зэфэшъхьафыбэ зы уахътэм зэдэб­гъэфедэшъун амал къэзытырэ псэуалъэр, «сим-бокс» зэреджэхэрэр, ахэм агъэфедэщтыгъ. АщкIэ бзэджа­шIэхэр, IэкIыбым щыIэхэри ахэтхэу, Урысыем ичIыпIэ зэфэшъхьафхэм ащыпсэухэрэм гъэпцIагъэкIэ ахъщэ къарагъэтынэу афытеощтыгъэх. ПэшIорыгъэшъэу зэрагъэунэфыгъэмкIэ, ащ тетэу нэбгырэ заулэ агъапцIи, пстэумкIи сомэ миллионитIум ехъу къаIа­хыгъ.
Оперативникхэм гъэпцIагъэ зыхэлъ бзэджэшIагъэм ахэр зэрэхэщагъэхэм икъэбар къазылъэIэсым, хъулъфыгъитIур къаубытыгъ. Бэджэндэу аштэгъэгъэ псэупIэр къызалъыхъум, «сим-бокситIу», мобильнэ телефон заулэ ыкIи сим-картэ 800 фэдиз къырахыгъ.
Мы уахътэм зэхэфынхэр макIох, гъусэу яIэхэм алъэхъух, цIыфэу агъэпцIагъэхэм якъыхэгъэщын ыуж итых.