Ространснадзорым пэщэ IэнатIэр щызыIыгъхэм ащыщ уголовнэ Iоф Адыгеим къыщыфызэIуахыгъ.

ЩынэгъончъэнымкIэ Федеральнэ къу­лыкъум АР-мкIэ и ГъэIорышIапIэ иIофы­шIэхэм Ространснадзорым имежрегиональнэ чIыпIэ ГъэIорышIапIэу Къыблэ Федеральнэ шъолъырым щыIэм къэралыгъо автодорожнэ лъыплъэнымкIэ иотдел ипащэ игуадзэ къуалъхьэ къа­Iихыгъэу къаубытыгъ.
Урысыем СледствиехэмкIэ и Комитет следствиехэмкIэ и ГъэIорышIапIэу АР-м щыIэм щынэгъончъэнымкIэ Федеральнэ къулыкъум АР-мкIэ и ГъэIорышIапIэ иIофышIэхэм къаугъоигъэ материалхэм къапкъырыкIызэ уголовнэ Iоф къызэ­Iуихыгъ.
ЗэрагъэунэфыгъэмкIэ, 2022-рэ илъэсым ишышъхьэIу мазэ къыщыублагъэу 2024-м ишэкIогъу нэс унэе предпринимателым хьылъэзещэ автомашинэхэм ягъэ­зекIонкIэ административнэ хэукъоныгъэу ышIыгъэхэм апае пшъэдэкIыжь ымыхьыным фэшI сомэ мин 370-рэ къыригъэтыгъ.
Джащ фэдэу 2022-рэ илъэсым имэкъуогъу мазэ къыщыублагъэу 2023-м имэкъуогъу нэс пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Агротрансым» ипащэ игуадзэ сомэ мини 120-рэ къыIихыгъ.
Тазыр амытыным фэшI къуалъхьэу къаштэн фаер зыфэдизыр ащ тхьапэм афытыритхэщтыгъ. Ахъщэхэр ежь нэмыкI горэм исчет къырагъахьэщтыгъэх.
Мы уахътэм зэхэфынхэр макIох, бзэджэшIагъэр зэрихьаным лъапсэ фэхъугъэр агъэунэфы.
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ ипресс-къулыкъу