Бзылъфыгъэ ешъуагъэр агъэмысагъ
Автомобилыр зезыфэщтыгъэ бзылъфыгъэ ешъуагъэм ылъэныкъокIэ уголовнэ Iоф къызэIуахыгъ.
ЗэрагъэунэфыгъэмкIэ, республикэ гупчэм иурамхэм ащыщ рыкIощтыгъэ IэкIыбым къыщашIыгъэ автомобилыр къэралыгъо автоинспекторхэм къагъэуцугъ. Мыекъуапэ щыщ бзылъфыгъэу илъэс 31-рэ зыныбжьэу ар зезыфэщтыгъэм изекIокIэ-шIыкIэхэмкIэ полицейскэхэм гуцаф аригъэшIыгъ. Шъон пытэ зэрэзэрихьылIагъэмкIэ медицинэ уплъэкIуныр рагъэшIынэу хэбзэухъумакIохэм зыраIом, бзылъфыгъэр къафезэгъыгъэп.
Нэужым къызэрэчIэщыгъэмкIэ, мыщ ыпэкIи транспорт амалыр ешъуагъэу зэригъэIорышIэщтыгъэм фэшI административнэ пшъэдэкIыжь рагъэхьыгъэу ыкIи гъэIорышIэнымкIэ фитыныгъэр Iахыгъэу щытыгъ.
Бзылъфыгъэ ешъуагъэм иавтомобиль Iахи, хэушъхьафыкIыгъэ гъэуцупIэм ащагъ.
Мы уахътэм дознаниемкIэ къэлэ отделым бзэджэшIагъэу ащ зэрихьагъэм ыпкъ къикIыкIэ уголовнэ Iоф къызэIуихыгъ. Ащ илъэситIум нэс хьапс тыралъхьан алъэкIыщт.