КIэлэцIыкIухэм афэгъэхьыгъэ литературэ тхыгъэхэмкIэ яя IV-рэ Дунэе зэнэкъокъоу Жэнэ Къырымызэ ыцIэ зыхьырэм изэфэхьысыжьхэр ашIыгъэх.

Зэнэкъокъум Адыгэ къэралыгъо университетыр кIэщакIо фэхъугъ. АдыгабзэкIэ, къэбэртэябзэкIэ, урысыбзэкIэ кIэлэцIыкIумэ апае тхэхэрэр, ахэр зэзыдзэкIыжьхэрэр, сурэтхэр зышIыхэрэр къыхэгъэщыгъэнхэр, литературэм иамал­кIэ лъэпкъыбзэм, хабзэм, культурэм, творчествэм кIэлэцIыкIухэр къафэщэгъэн­хэр ащ ипшъэрылъ.
Зэнэкъокъум цIэу иIагъэр «ЦIыкIу­жъый». Илъэси 3 — 5 зыныбжьхэм ателъытэгъэ тхыгъэхэр, зэдзэкIыгъэхэр, сурэтхэр къыугъоигъэх. ПстэумкIи нэбгырэ 40-мэ яIофшIэгъэ 80-м ехъу зэнэкъокъум къагъэхьыгъ. Адыгеим, Къэбэртэе-Бэлъкъарым, Къэрэщэе-Черкесым, республикэу Беларусь ыкIи Урысыем инэмыкI шъолъырхэм якъа­лэхэм ащыпсэухэрэр ащ хэлэжьагъэх.
Жэнэ Къырымызэ ыцIэ зыхьырэ зэнэкъокъур илъэс заулэ хъугъэу зэхащэ.
Лъэныкъоу «Усэ ыкIи прозэ шъуашэм илъхэу илъэси 3-м щегъэжьагъэу 5-м нэс» зыфиIорэмкIэ апэрэ чIыпIэр фагъэшъошагъ ЛIыхъукI Гощнагъо итхы­гъэу «Нарт икъэбархэр», Абрэдж Сафыет урысыбзэкIэ ытхыгъэ усэхэм апае.
ЯтIонэрэ чIыпIэр Гъыщ Рахьмэт къы­дихыгъ адыгабзэкIэ ытхыгъэ рассказэу «Пшъэшъэ хъупхъ» зыфиIорэм пае.
Ящэнэрэ чIыпIэр къыхьыгъ Фатима Малаевам иусэхэу «Дышъэ кIанэхэр» («Золотые крупинки») зыфиIорэм пае.
«ЗэдзэкIыгъэхэр» зыфиIорэ лъэны­къом­кIэ апэрэ чIыпIэр къыхьыгъ тиIоф­шIэгъоу ЛIышэ Саниет Сергей Михалковым ипшысэу «ЧэцI къаигъ» зыфиIорэр дэгъоу зэрэзэридзэкIыгъэм фэшI.
ЯтIонэрэ чIыпIэр зэдагощыгъ Мамхыгъэ Сусанэ, МатIыжъ Аминэт, ГъукIэ-Маремкъулэ Маринэ.
Ящэнэрэ чIыпIэр афагъэшъошагъ тиIофшIэгъоу Дэрбэ Тимур, Сихьаджэкъо Хьазрэт, Людмила Лиховам.
«Иллюстрациехэр» зыфиIорэмкIэ текIоныгъэр зыми фагъэшъошагъэп. ЯтIонэрэ чIыпIэр къыхьыгъ Мария Фоменкэм Агния Барто иусэхэр зэригъэ­кIэрэкIэгъэ сурэтхэм апае. Ящэнэрэ хъугъэ Елена Стурман Корней Чуковскэм ипшысэу «Доктор Айболитым» фишIыгъэ сурэтхэм апае.
ХагъэунэфыкIырэ чIыпIэхэр къыдэзыхыгъэхэм ахэфагъ «Адыгэ макъэм» иIофышIэу Лъэпшъыкъо Фатимэ «Идея» зыфиIорэ лъэныкъомкIэ адыгабзэкIэ хьарыфылъэ тетрадь зэрэзэхигъэу­цуагъэм пае. ТиIофшIэгъоу Анцокъо Ирини иусэхэм апае диплом къыфа­гъэшъошагъ.
— Зэнэкъокъур зэрэкIуагъэм тигъэрэзагъ. IофшIэгъэ дэгъубэ къагъэхьазырыгъ, ау ащыщхэр зэнэкъокъум ишапхъэхэм адиштагъэхэп. ГъэрекIо еб­гъапшэмэ, мыгъэ ащ хэлэжьа­гъэр нахь макI. Зэнэкъокъум къыхэлэжьэрэ ныбжьыкIэхэм тадэлэжьэнэу итхъухьагъ. Зарина Пантелеевар, Енэмыкъо Зарэ, Дэрбэ Камилэ, Анцокъо Иринэ илъэс къэс Iофтхьабзэм чанэу къыхэлажьэх, — къыIуагъ Хъуажъ Нуриет.
— Зэнэкъокъум апэрэп сызэрэхэлажьэрэр. ЗэбдзэкIын плъэкIыщтэу ащ къыдыхэлъытагъэхэм сызяплъым, Сергей Михалковым ипшысэу «ЧэцI къаигъ» зыфиIорэм сыкъыщыуцугъ. Зэрэтхыгъэр сыгу рихьыгъ, етIани пшысэхэр къыспэблагъэх. Илъэс 36-рэ хъугъэу зэдзэкIакIоу гъэзетым сыщэлажьэ. Сыгу рихьэу, сшIогъэшIэгъонэу Iоф дэсшIагъ, — къыддэгощагъ апэрэр чIыпIэр къыдэзыхыгъэ ЛIышэ Саниет.

Жарэкъо
Фатим.