ШэкIогъум и 14-м къыщыублагъэу и 16-м нэс къэндзалыбзэр къэухъумэгъэным ыкIи зэлъягъэшIэгъэным фытегъэпсыхьэгъэ гъэсэныгъэ Iофтхьабзэу «Татарский диктант» зыфиIорэр онлайн шIыкIэм тетэу макIо. Мы аужырэ илъэсхэм ащ зиушъомбгъугъ, мыщ хэлажьэх дунаим икъэралыгъо 31-мэ ыкIи Урысыем ишъолъыр 74-мэ ялIыкIохэр.

АР-м гъэсэныгъэмрэ шIэныгъэмрэкIэ и Министерствэ шIэныгъэхэм зыщыхагъахъорэ Адыгэ республикэ институтыр игъусэу «Татарский диктант» зыфиIорэ Iофтхьабзэр республикэм щызэхащагъ. Адыгеим щыпсэурэ къэндзалхэр ащ чанэу хэлэжьагъэх. Лъэпкъ щыгъынхэр ащыгъхэу ыкIи шхыныгъохэр аIыгъхэу ахэр Iофтхьабзэм къекIолIагъэх.
АР-м гъэсэныгъэмрэ шIэныгъэмрэкIэ и Министерствэ иIофышIэу, Iофтхьабзэм изэхэщакIоу Мамый Мариет къызэриIуа­гъэмкIэ, 2016-рэ илъэсым къыщыублагъэу мы Iофтхьабзэр зэхащэ. Тирес­публи­кэ зэкIэмкIи къэндзал мини 3-м кIахьэу щэпсэу. Ахэм абзэ, якультурэ къаухъумэзэ зыхэс лъэпкъхэм дахэу адэпсэух.
— Къэндзал лъэпкъымкIэ мы Iоф­тхьабзэм мэхьанэшхо иI, Татарстан имызакъоу зэрэдунаеу щыпсэухэрэ къэндзалхэр мыщ зэрепхых. Мэхьанэшхо ратэу диктантым дэгъоу зыфагъэхьазырыгъ, абзэ, якультурэ зэращымыгъупшэрэр ащ къегъэлъагъо, — къыIуагъ министерствэм иIофышIэ.
Диктант зытхыгъэхэм ахэтыгъ къэндзалхэм яобществэу АР-м щыIэм итхьаматэу Алим Ильясовыр.
— Адыгеим щыпсэурэ къэндзалхэм ахэтых зыбзэ ыкIи зикультурэ дэгъоу зышIэхэрэр, ащ урымыгушхон плъэкIыщтэп. КъыткIэхъухьэрэ лIэужхэм яныдэлъфыбзэ нахь куоу ашIэнымкIэ мы Iофтхьабзэм мэхьанэшхо иI. Мыр Адыгэ Респуб­ликэм щырекIокIынымкIэ зишIогъэшхо къытэзыгъэкIыгъэ зэхэщакIо­хэм, анахьэу АР-м и ЛIышъхьэ, лъэшэу тафэраз. Адыгеим бэшIагъэу тыщэпсэу, ар тиунэ хъугъэ. Аужырэ илъэси 5-м Татарстанрэ Адыгеимрэ зэкъошныгъэ азыфагу илъэу Iоф зэрэзэдашIэрэм тегъэгушIо, — къыIуагъ Алим Ильясовым.
Диктантым къафеджагъ къэндзалыбзэмкIэ кIэлэегъаджэу Рамиса Татомир. Ащ къызэриIуагъэмкIэ, Республикэу Татарстан ныдэлъфыбзэм икъэухъу­мэн мэхьанэшхо щыраты. Сыда пIомэ, ар зыкIодыкIэ, лъэпкъыр щыIэжьыщтэп. Адыгеим икъоджэ псэупIэхэм ащыпсэурэ къэндзалхэм ащыщыбэхэм ежьхэм абзэ нэмыкIэу адыгабзэр ашIэ. Бзэ лые щыIэп.
Iофтхьабзэр мэфищрэ кIощт, нэужым кIэуххэр къэнэфэщтых.
КIАРЭ Фатим.