АР-м илъэпкъ ыкIи изаслуженнэ сурэтышIэу Хъуажъ Рэмэзан иIэшIагъэхэм якъэгъэлъэгъон Мыекъуапэ къыщызэIуахыгъ.

СурэтышI цIэрыIом ыныбжь илъэс 65-рэ зэрэхъугъэр мыгъэ хегъэунэфыкIы. Ащ щыщэу лIэшIэгъуныкъор творчествэм фигъэшъошагъ, IэшIэгъэ миным ехъу къыIэкIэкIыгъ. Ахэм ащыщэу иIофшIэгъи 100 фэдиз къэгъэлъэгъоным хэхьагъ.
ИскусствоведениемкIэ кандидатэу, Мыекъопэ къэралыгъо технологическэ университетым идоцентэу КIэдэкIое Нэф­сэт мэфэкI Iофтхьабзэр къызэIуи­хыгъ. Зыфэдэ къэмыхъугъэ, купкI ин зиIэ IофшIагъэхэр зиIэ Хъуажъ Рэмэзан ищы­Iэныгъэ гъогу къекIолIагъэхэм къафиIотагъ.
Адыгэ Республикэм культурэмкIэ иминистрэу Аулъэ Юрэ Хъуажъ Рэмэзан имэфэкIкIэ къыфэгушIуагъ ыкIи щытхъу тхылъ фигъэшъошагъ.
— Непэрэ мэфэкI дахэмкIэ Хъуажъ Рэмэзан сыфэгушIо. Ащ ицIыфыгъэ урыгущыIэн хъумэ, бэрэ укъытегущыIэнэу хъущт. Сыд фэдэ Iофыгъо зыфигъэ­загъэми, анахь шъошэ лъагэм илъэу егъэцакIэ. IэпэIасэм итворчествэ зэрэиныр, зэрэзэтефыгъэр иIэшIагъэмэ къагъэлъагъо, ахэм япчъагъэ хэбгъэхъонэу сыпфэлъаIо, — къыIуагъ Аулъэ Юрэ.
ТыгъэкъокIыпIэ лъэпкъхэм я Къэралыгъо музей и Темыр-Кавказ къутамэ ипащэу ШъэуапцIэкъо Аминэт, АР-м и Сурэт къэгъэлъэгъуапIэ ипащэу Бырсыр Абдулахь, Республикэм культурэмкIэ и Министерствэ иотдел ипащэу, Адыгеим культурэмкIэ изаслуженнэ IофышIэу Шэуджэн Бэлэ, Адыгэ Республикэм исурэтышIхэм я Союз итхьаматэу Елена Абакумовам, еджапIэу Лъэцэрыкъо Кимэ ыцIэ зыхьырэм ипащэу Анзэрэкъо Марзиет зэхахьэм къыщыгущыIагъэх. Къэгъэлъэгъоным икъызэIухын хэлэжьагъэх шъолъырым щызэлъашIэрэ сурэтышI IэпэIасэхэр, Рэмэзан иIахьылхэр, ригъа­джэхэрэр ыкIи иныбджэгъухэр.
— СицIыкIугъом щыублагъэу сурэтшIы­ныр къыспэблагъ. Сисурэтмэ ашъохэр сыкъызщыхъугъэ чIыгум, тишэн-хабзэхэм янэпэеплъых, сичылэ гупсэу Хьатыгъу­жъыкъуае фэгъэхьыгъэх. Тыкъэзыуцухьэ­рэ дунаир гъэшIэгъон дэд, сурэтхэмкIэ къэбгъэлъэгъощтмэ фэдэ щыIэп. Си­лъэпкъ шIулъэгъоу фысиIэм сиIэшIагъэхэр фэгъэхьыгъэх. Ащ кIуачIэ къысеты, дунаир зыIыгъ искусствэр ахэм къапкъырэкIы. Джы непэрэ мафэм зыфэзгъазэмэ, пхъэм лэгъэ 12 хэсшIыкIыгъ. Адыгэ къуа­джэу щымыIэжьхэм ацIэхэр ахэм афэсыусыгъ, тхыпхъэ гъэнэфагъэхэри атесшIыхьагъэх, лъэпкъ тамыгъэхэр атеслъхьагъэх. Сятэ пхъэм ишъэфыбэ къысIэкIигъэхьагъ, — къыIуагъ Хъуажъ Рэмэзан.
— Сятэ иIэшIагъэхэр зэкIэ гъэшIэ­гъоных, ау пхъэм хишIыкIырэ IофшIа­гъэхэр хьалэмэтых. Лъэпкъ гупшысэр ахэм апхырыщыгъ. Пхъэм художественнэу тхыпхъэхэр хэзыбзыкIырэ IэпэIэсэ макIэмэ сятэ ащыщ. СурэтыкIэ пэпчъ мэхьэнэ куу иI, — къыIуагъ IэпэIасэм ипшъашъэу Къохъужъ Асе.
Хъуажъ Рэмэзан иIэшIагъэхэм якъэ­гъэлъэгъон тыгъэгъазэм и 7-м нэс АР-м и Сурэт къэгъэлъэгъуапIэ щыкIощт.
Лъэпшъыкъо Фатим.