ДзюдомкIэ Урысыем ипервенствэ къалэу Краснодар щэкIо.

Зыныбжь илъэс 21-м емыхъугъэхэр ащ хэлажьэх. Зэнэкъокъум иапэрэ мафэ изэ­фэхьысыжьхэмкIэ килограмми 100-м нэс къэзыщэчыхэрэм якуп зыщызыушэтыгъэ Малыщ Аскэр джэрз медаль къыфагъэшъошагъ. Тэхъутэмыкъое спорт еджапIэм зы­щызыгъэсэрэ тиспортсмен къытекIон зы­лъэкIыгъэр Къэбэртэе-Бэлъкъарым илIыкIоу Дер Айдэмыр. Ар финалныкъом зэрэнэсыгъэм ишIуагъэкIэ Аскэр ящэнэрэ чIыпIэм фэбэнэн ылъэкIыгъ. Ацумыжъ Зауррэ Наш Шыхьамрэ агъэсэрэ тиспортсмен ящэнэрэ чIыпIэр къыдихыным фэшI Новосибирскэ хэкум илIыкIоу Никита Шараповым ебэныгъ ыкIи къышIуихьыгъ. Республикэу Ингушетиер къэзыгъэлъэгъогъэ Михаил Сакаловым ты­жьын медаль къыхьыгъ, Калужскэ хэкум испортсменэу Владимир Досяк текIоныгъэр къыдихыгъ.
Зэнэкъокъум зэкIэмкIи нэбгырэ 696-рэ хэлажьэ, ахэм ащыщэу 425-р — хъулъфыгъэх, 271-р — бзылъфыгъэх. Адыгеир спортсмени 7-м къагъэлъагъо.