ЯтIонэрэ чIыпIэр къыдахыгъ
ФутболымкIэ Адыгеим и ЛIышъхьэ ишIухьафтын зэрылъ зэнэкъокъум ятIонэрэ чIыпIэр къыщыдэзыхыгъэ Тэхъутэмыкъое районым икомандэ мы мафэхэм агъэшIуагъ.
Ащ фэгъэхьыгъэ зэхахьэм хэлэжьагъэх ыкIи футболист ныбжьыкIэхэм къафэгушIуагъэх район администрацием ипащэу Шъэо Аскэррэ народнэ депутатхэм я Совет итхьаматэу Апсэламэ Руслъанрэ.
Тэхъутэмыкъое районым икомандэ ешIэгъу 12 иIагъ. Зэнэкъокъум пэрытныгъэр бэрэ щиIыгъыгъ, чемпионствэм пэблэгъагъ, ау кIэухым Мыекъуапэ илIыкIохэр нахь щылъэшыгъэх, текIоныгъэр къыдахыгъ. Тэхъутэмыкъое районым ифутболиститIу хэушъхьафыкIыгъэ шIухьафтынхэмкIэ къыхагъэщыгъэх. УхъумэкIо анахь дэгъу хъугъэ Эльдар Дерюок, Дмитрий Копаневым зэкIэми анахьыбэрэ къэлапчъэм Iэгуаор дидзагъ (гъогогъу 31-рэ). Футболистхэр зэнэкъокъум фэзыгъэхьазырыгъэр олимпийскэ резервым испорт еджапIэу N 2-м итренерэу Шэуджэн Аслъан.