АР-м и Къэралыгъо Совет — Хасэм къихьащт 2026-рэ илъэс бюджетым ыкIи 2027 — 2028-мкIэ агъэнэфагъэхэм афэгъэхьыгъэ хэбзэгъэуцугъэм ипроектэу АР-м и ЛIышъхьэу КъумпIыл Мурат къыхилъхьагъэм тегущыIэнэу ригъэжьагъ.

Бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ АР-м и Парламент икомитет ащ фэгъэ­хьыгъэ игъэкIотыгъэ зэхэсыгъо тыгъуасэ иIагъ. Iофтхьабзэр зэрищагъ Парламентым и Тхьаматэ игуадзэу, комитетым ипащэу Iэщэ Мухьамэд.
ЫпэрапшIэу бюджетым фэгъэхьыгъэ законопроектэу Парламентыр апэрэ еджэгъумкIэ зыхэплъэщтым къыщыдэлъытагъэхэм АР-м финансхэмкIэ иминистрэ игуадзэу Хьэпэе Марыет къатегущыIагъ. Ащ къызэриIуагъэмкIэ, 2026-рэ илъэс бюджетым хахъохэмкIэ иIахь сомэ миллиард 44,9-рэ, хъарджхэмкIэ сомэ миллиард 47,3-рэ зэрэхъущтхэр. Сомэ миллиарди 2,4-рэ щыкIагъэ фэ­хъущт.
Джащ фэдэу 2027-рэ илъэсым ибюджет, пэшIорыгъэшъэу къызэралъытагъэм­кIэ, ихахъохэр сомэ миллиард 49,7-рэ, хъарджхэмкIэ иIахь миллиард 50,8-рэ хъущтых, сомэ миллиардрэ миллиони 100-рэ щыкIагъэ фэхъущт. 2028-мкIэ бюджетым хахъохэмкIэ иIахь сомэ мил­лиард 55,1-рэ, хъарджхэр миллиард 56,6-рэ хъущтых, щыкIагъэу сомэ миллиардрэ миллион 500-рэ фэхъущт.
БлэкIыгъэ илъэсхэм афэдэу, къэкIорэ илъэсым ибюджет социальнэ лъэныкъор нахь къыщыхэгъэщыгъ, нахьыбэр ары зыпэIухьащтыр. КIэлэцIыкIу зэрыс унагъохэм, хэушъхьафыкIыгъэ дзэ операцием хэлажьэхэрэм, ахэм ягупсэхэм IэпыIэгъу ятыгъэныр, псауныгъэм икъэу­хъумэн, гъэсэныгъэм яIофхэр, экономикэм хэхъоныгъэхэр егъэшIыгъэнхэр анахь шъхьаIэхэм ащыщэу къэнэжьых.
Iэщэ Мухьамэд докладым ыуж къызэриIуагъэмкIэ, 2026-рэ илъэс бюджетым ыкIи 2027 — 2028-мкIэ агъэнэфагъэхэм афэгъэхьыгъэ хэбзэгъэуцугъэм ипроект фэшIыгъэн фаеу гъэтэрэзыжьын зыпари комитетыр хэплъэнэу къыхалъхьагъэп.
АР-м и УплъэкIокIо-лъытэкIо палатэ ипащэу Павел Стаценкэм проектым зыхаплъэхэм зэфэхьысыжьэу ашIыгъэхэм къатегущыIэзэ, ащ изэхэгъэуцонкIэ шапхъэхэр зэкIэ гъэцэкIагъэ зэрэхъугъэхэр къыIуагъ.
Бюджетым фэгъэхьыгъэ хэбзэгъэуцугъэм ипроект АР-м и Парламент изичэзыу зэхэсыгъо щытегущыIэнхэшъ, апэрэ еджэгъумкIэ аштэнэу къыхалъхьащт.
ШIокI зимыIэ медицинэ страхованиемкIэ АР-м и ЧIыпIэ фонд 2026-рэ илъэсымкIэ ибюджет ыкIи 2027 — 2028-мкIэ агъэнэфагъэхэм афэгъэхьыгъэ хэбзэгъэуцугъэм ипроект нэIуасэ къыфишIыгъэх ащ ипащэу Хъут Светланэ. Ащ къызэриIуагъэмкIэ, 2026-рэ илъэс бюджетым хахъохэмкIэ иIахь сомэ миллиарди 10,05-рэ хъущт, хъарджхэри ащ фэдизыщтых, щыкIагъэ фэхъущтэп.
Мы проектми зыпари гъэтэрэзыжьын имыIэщтэу ары зэхэсыгъом къызэрэщаIуагъэр. Ащи Парламентым изэхэсыгъоу къэблагъэрэм депутатхэр щыхэплъэ­щтых.
ХЪУТ Нэфсэт.