Пыдзэфэ килограмм 42-рэ къыхахыгъ. Мы пчъагъэр чIыопс ухъумапIэу «ТхьачIышхо» игъэкъэбзэн фэгъэхьыгъэ Iофтхьабзэу щыкIуагъэм изэфэхьысыжь.

Джащ фэдиз хэкIыр мысатыу зэхахьэу «Заповедный Кавказ» зыфиIорэм игуфакIохэм къыщаугъоигъ. Нэбгырибл зыхэтыгъэ купым мэфищым гъогууанэу «Тайвань — уцупIэу Юбилейнэр — Шестаковэ гъэхъунэр — ТхьачI икIыпIэр — уцупIэу Жьыбгъаор — Тайвань» зыфиIорэр къакIугъ, зекIохэм къыханэгъэ шIоир къашыпыгъ. ШIыхьафым икIэщакIохэм къызэраIуагъэмкIэ, зэрыкIощтхэ гъогууанэр зыфэдэщтыр чIыопс ухъумапIэм ипащэ игъусэхэу пэшIорыгъэшъэу агъэнэфагъэми, мэзым зыхэ­хьэхэм, зэблахъужьын фаеу хъугъэ.
— ТхьачIышхомрэ ЦIыкIумрэ азыфагу илъ гъэхъунэм къыщырагъэжьэн ягухэлъыгъ шъхьаем, Шестаковэ гъэхъунэм IофшIэныр щаублагъ. МэшIо стафэм гъучI къэмланхэр хизыгъэх. Адырэ уцупIэхэми Iофыр нахь ащыдэгъугъэп: апч бэшэрэбхэр, гъучI къэмланхэр, IэплъэкIхэр ыкIи нэмыкI хэкIэу гъэкIодыгъуаеу щытхэр ащитэкъухьэгъагъэх, — къаIуагъ шIыхьафым хэлэжьагъэхэм.
ШIыхьафыр зыщыкIогъэ шэкIогъу мэфэкI зэкIэлъыкIохэм зекIуабэ ТхьачIы­шхо щызэблэкIыгъ. Ахэм ащыщэу гуфакIохэм апэ къифагъэхэм чIыопсыр къаухъумэнэу, амыушIоинэу зафагъэ­загъ. ХэкIыр зэрылъ дзыохэр къыхахыжьынхэмкIэ ащыщхэри IэпыIэгъу къафэхъугъэх. Мотоциклистхэу чIыопсым къыщызычъыхьэхэрэм яIофыгъуи джырэ нэс зэшIомыхыгъэу къэнэ. Ащ фэдэ транспортым тесхэу чIыопс ухъумапIэм хэмыхьанхэу араIоми, мыдаIорэр нахьыб.
— ДэкIыгъом илъэхъан ащ фэдэ зы куп тапэ къифагъ. Мотоцик­лэ лъэпкъхэм уатесэу ащ ухахьэ зэрэмыхъущтыр ятIуагъ. ЧIы­опс ухъумапIэм ичIыналъэ итхэми амышIагъэу яджэуапыгъ. Къэ­барыр мэкъэгъэIухэм атетхагъэу, уцупIэхэм ащыгъэIагъэми, агъэцакIэрэп. Мы гумэкIы­гъом изэшIохынкIэ тикуп хэтыгъэхэм хэкIыпIэхэр къаIуагъэх. ЧIыопс ухъумапIэм ипащэ ахэр дызэхэтфыщтых, – къаIуагъ шIыхьафым икIэщакIохэм.
Ахэм къызэрэхагъэщыгъэмкIэ, къы­кIэлъыкIорэ дэкIыгъор уцупIэу «Жьыбгъаом» шъхьафэу фэгъэхьыгъэщт. Ащ пыдзафэу щызэIукIэрэр бэдэд. Iофтхьабзэм икIэухым ащ хэлэжьагъэхэм зэкIэми чIыопс ухъумапIэу «ТхьачIышхом» ипащэу Шэуджэн Инвер рэзэныгъэ тхылъхэр аритыгъ, «тхьашъуегъэпсэу» ариIуагъ.
Анцокъо Ирин.