Адыгеим икомандэ теннис цIыкIумкIэ спорт еджа­пIэхэм ыкIи организациехэм азыфагу щы­зэ­хащэгъэ шъолъыр зэнэкъокъум апэрэу хэлажьэ. Iофтхьабзэр Славянск-на-Кубани щэкIо.

Турнирым Краснодар краим, Астраханскэ ыкIи Ростов хэкухэм, Адыгеим, Къырым ыкIи Севастополь ялIыкIохэм зыщаушэты. Ахэм аныбжь илъэс 14-м шIокIырэп. Адыгэ Республикэр къэзыгъэлъа­гъохэрэр: Артем Вариводиныр, Бзаго Дамир, Кирилл Панькиныр ыкIи Владимир Скобелевыр. Мые­къопэ спорт еджапIэу С.М. Джэнчатэм ыцIэ зыхьырэм ахэм зыщагъасэ.
ТикIалэхэм рейтингымкIэ яенэ­рэ чIыпIэр аубыты. Ау апэрэ мафэм яIэгъэ зэIукIэгъум ятфэнэ­рэу щыт Ростов хэкум ипсэупIэу Целинам икомандэ къышIуахьын алъэкIыгъ, пчъагъэр — 3:2. Ащ ыуж Таганрог итеннисистхэр къатекIуагъэх. Джырэ уахътэм тикомандэ я 6-рэ чIыпIэм щыт. Непэ республикэм испортсменхэр Лабинскэ, Ялтэ ыкIи Севастополь ялIыкIохэм аIукIэщтых.
ТекIоныгъэр ыкIи хагъэунэфыкIырэ чIыпIэхэр къыдэзыхыгъэхэр шэкIогъум и 15-м къэнэфэщтых. Командэ анахь дэгъум зэнэкъо­къум и Урысые едзыгъо хэлэ­жьэнэу фитыныгъэ иIэщт, ар тыгъэгъазэм ыкIэм Шъачэ щырагъэкIокIыщт.