Адыгеим и ЛIышъхьэу КъумпIыл Мурат правительствэм и Унэ щыригъэблэгъагъ Урысыем инароднэ артистэу, Театральнэ институтэу Б. Щукиным ыцIэ зыхьырэм иректорэу Евгений Князевыр.

ЗэIукIэгъум хэлэжьагъэх АР-м культурэмкIэ иминистрэу Аулъэ Юрэрэ АР-м и Театральнэ зэхахьэ ихудожественнэ пащэу Ацумыжъ Рустамрэ.
ЗэIукIэгъум хэлажьэхэрэр зытегущыIагъэхэр Урысыем итеатральнэ IофышIэхэм я Союз зызэхащагъэр илъэси 150-рэ зэрэхъурэм фытегъэпсыхьэгъэ культурнэ-гъэсэныгъэ проектэу «Театр. Мастера» зыфиIорэм къыхиубытэрэ Iофтхьабзэхэр ары. Мыщ дэжьым къыхэгъэщыгъэн фае Урысые Федерацием итеатральнэ IофышIэхэм я Союз ипрограммэ къыдилъытэрэ творческэ зэIукIэгъу­хэмрэ шIэныгъэхэм ахэгъэхъогъэнымрэ япхыгъэ проектым иапэрэ творческэ чIыпIэу Адыгеир зэрэхъугъэр.
Адыгеим и ЛIышъхьэ къыIуагъ Мые­къуапэ щырагъэжьэгъэ проектым респуб­ликэм театральнэ искусствэм хэхъоныгъэ щишIыным кIочIакIэ къызэрэхилъхьащтым ицыхьэ зэрэтелъыр.
А проектым тегъэпсыхьагъэу творческэ зэIукIэгъухэр макIох. Ахэр анахьэу зыфэгъэхьыгъэр я XX-рэ лIэшIэгъум щыIэгъэ IэпэIэсэ актерхэр зэлъягъэшIэгъэнхэр ары, джащ фэдэу хэгъэгум иактер анахь ныбжьыкIэ 24-мэ егъэджэн сыхьатхэр ыкIи тренингхэр афызэхащэщтых. Мы илъэсым ыкIи къыкIэлъыкIощт илъэсым Урысыем икъэли 10 проектым къызэлъиубытыщт. Адыгеим и Театральнэ зэхахьэ иунэ апэрэ егъэджэнхэр щыкIуагъэх, ахэр зэхэзыщагъэхэр Теат­ральнэ институтэу Б. Щукиным ыцIэ зыхьырэм икIэлэегъаджэхэр ары.
Пушкиным и Унэ щыкIогъэ Iофтхьабзэу а проектым къыдыхэлъытагъэр къы­зэIуихызэ, Евгений Князевым къалэу Мыекъуапэ щыпсэухэрэм ыкIи ихьакIэхэм къаригъэлъэгъугъ испектаклэ цIэрыIоу «Пиковая дама» зыфиIорэр. Пушкиным иповесть техыгъэ къэгъэлъэгъоныр зыфэгъэхьыгъагъэр зидунай зыхъожьыгъэ режиссер цIэрыIоу Петр Фоменкэр ары. Театральнэ институтым иректор АР-м и Театральнэ зэхахьэ иартистхэмрэ иIофышIэхэмрэ зэIукIэгъоу адыриIагъэм ежь сэнэхьат IофшIэнышIоу IэкIэлъ хъугъэм щигъэгъозагъэх, Вахтанговскэ еджапIэм ихабзэхэми афэгъэхьыгъэу къафиIотагъ.
«Театральнэ еджапIэм хэхъоныгъэ рагъэшIыным анаIэ лъэшэу зыщытырагъэтырэ чIыпIэм проектым ипхырыщын зэрэщытыублагъэм тэркIэ мэхьэнэ гъэ­нэфагъэ иI. Къалэу Мыекъуапэ ащ фэдэ чIыпI», — къыхигъэщыгъ Евгений Князевым.
Адыгеим и ЛIышъхьэ дыриIэгъэ зэIукIэгъум илъэхъан Евгений Князевым къыхигъэщыгъ театрэр дэгъу дэдэу зэрэзэтегъэпсыхьагъэр ыкIи Пушкиным и Унэу Мыекъуапэ дэтым Iоф щашIэнымкIэ амал дэгъухэр зэряIэхэр.
«Лъэшэу згъэшIэгъуагъэ театрэм идэхагъэ ыкIи ащ изытет. Республикэм культурэм хэхъоныгъэ щишIыным лъэшэу унаIэ зэрэтебгъэтырэм, театральнэ искусствэр лъыгъэкIотэгъэным мэхьанэшхо зэриIэр дэгъоу къыбгурыIозэ Щукинскэ инстиутым щеджэ зышIоигъо ныбжьыкIэхэм IэпыIэгъу узэрафэхъурэм апае сызэрэпфэразэр къэсIонэу сыфай», — къыхигъэщыгъ Евгений Князевым.
ЗэлъашIэрэ артистыр ыкIи Б. Щукиным ыцIэ зыхьырэ Театральнэ институтым иректор Адыгеим къызэрэкIуагъэм пае зэрэфэразэр республикэм и ЛIышъхьэ къыхигъэщыгъ ыкIи хэгъэгум ипэрыт театральнэ IофышIэшхохэм республикэм анаIэ къызэратырагъэтырэм АР-м и Театральнэ зэхахьэ иIахь зэрэхэлъыр къыхигъэщыгъ. ГущыIэм пае, Константин Райкиныр, Евгений Мироновыр, Сергей Безруковыр ыкIи нэмыкIхэр республикэм къэкIогъагъэх ыкIи мастер-классхэр зэхащэгъагъэх. Ахэм яфэмэ-бжьымэшIу къытемыхьанэу хъугъэп республикэм икультурэ.
«Тэ бэ зэшIотхырэр культурэм иучреждениехэр гъэкIэжьыгъэнхэм, ахэм IэпыIэгъу ятыгъэным апае. КIэхэр дгъэ­федэнхэм, зэтегъэпсыхьэгъэ общественнэ шъолъырхэр культурнэ мэхьанэ зиэ IофтхьабзэхэмкIэ къызфэдгъэфедэнхэм тынаIэ тетэгъэты. ГущыIэм пае, Филармонием дэжь культурэм игупчэу щыIэм тиартист пэрытхэм илъэс заулэ хъугъэу къэгъэлъэгъонхэр ащызэхащэх. Адыгеим и Къэралыгъо симфоническэ оркестрэ гъогогъуитIо зэтегъэпсыхьэгъэ парк шъолъырэу «Мэздахэм» концертхэр къыщитыгъэх, Пушкиным ыцIэ зыхьырэ Унэм ыгупэкIэ театрэм иартистхэм къэгъэлъэгъон зэфэшъхьафхэр щызэхащэх. А пстэумэ шIуагъэ къахьы: классическэ музыкэмрэ театральнэ къэгъэ­лъэгъонхэмрэ республикэм нахь хэхъо­ныгъэ фашIы, бэрэ къыхэкIы билетхэри амыгъотыжьхэу. ТичIыпIэгъоу, зэлъа­шIэ­рэ прозаикэу ыкIи драматургэу Евгений Шварц икIэн къэухъумэгъэным пае Iофышхо республикэм щызэшIуахы», — къыIуагъ КъумпIыл Мурат.
Б. Щукиным ыцIэ зыхьырэ Театральнэ институтымрэ АР-м и Театральнэ зэхахьэрэ язэдэлэжьэныгъэ тапэкIи лъыгъэкIотэгъэным, Адыгеим икIыхэу хэгъэгум итеатральнэ апшъэрэ еджапIэхэм ачIахьэхэрэм IэпыIэгъу ятыгъэным ыкIи нэмыкIхэм зэIукIэгъум илъэ­хъан атегущыIагъэх.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.