Урысые Федерацием инароднэ артистэу, театральнэ институтэу Щукиным ыцIэ зыхьырэм иректорэу Евгений Князевыр Адыгеим зыщэIэм республикэм исскуствэмкIэ сэнэхьат зэзгъэгъотырэ студентхэм ыкIи театрэм иIофышIэхэм зэIукIэгъу адыриIагъ.

Изакъоу къышIырэ спектаклэу «Пиковая Дама» зыфиIорэр Евгений Князевым Пушкиным и Унэ къыщигъэлъэгъуагъ.
АР-м искусствэхэмкIэ иколледж истудентхэр егъэджэн сыхьатэу афызэхащагъэм къеблэгъагъэх.
Мастер-классым щилъэгъугъэм ригъэ­шIыгъэ гупшысэхэмкIэ журналистхэм къадэгощагъ колледжым икIэлэегъаджэу Ацумыжъ Сарэ:
— Сыхьатым къыкIоцI къагъэлъэгъогъэ IофшIэн пычыгъом анахь осэшхо фэзгъэшъуашэмэ сшIоигъу. ЛIэужым ипIуныгъэ искусствэмкIэ зэрэзэшIуахырэм щэч хэлъэп. Сценэм утетэу зэрэ­улэжьэн плъэкIыщтыр артист цIэрыIоу Евгений Князевым къыIотагъ. Непэрэ шапхъэхэм адиштэу артистыр зэрэлэжьэн ылъэкIыщтыр къыгъэлъэгъуагъ.
Творческэ зэIукIэгъум къыкIэлъыкIуагъ Евгений Князевым къытыгъэ пресс— конференциер. Щукиным ыцIэ зыхьырэ институтым икIэлэегъаджэхэу Софья Высоковскаямрэ Александр Фадеевымрэ ащ хэлэжьагъэх.
Урысые культурнэ-гъэсэныгъэ проектэу «Театр. Мастера» зыфиIорэм къыдыхэлъытагъэу Адыгеим ахэр къеблэгъагъэх. Изакъоу къышIырэ спектаклэу «Пиковая дама» зыфиIорэр Евгений Князевым гъэшIэгъон дэдэу къыгъэлъэ­гъуагъ. Мастер-классхэр, тренингхэр театральнэ сэнэхьатым феджэрэ еджа­кIохэм афызэхащагъэх.
Театральнэ искусствэм ихэхъоныгъэ къытегущыIэзэ Евгений Князевым къыхигъэщыгъ Адыгеим мы лъэныкъомкIэ амалышIухэр зэрэIэкIэлъхэр.
— Адыгэ Республикэм театрэм фыщытыкIэ хэушъхьафыкIыгъэ зэрэфы­шъуиIэр зэхэтшIагъ. БэшIагъэу зэтеуцогъэ шэн-хэбзэ шIагъохэр къызэрэзэтежъугъэнагъэхэр дгъэшIэгъуагъ. Театральнэ зэхахьэм ипащэу Ацумыжъ Рустам ихьатыркIэ театрэм зыкъызэриIэтыгъэр тинэрылъэгъу, — къыIуагъ Евгений Князевым.
— Тарихъ ыкIи культурнэ кIэныр тэгъэлъапIэ, тишъолъыр итеатральнэ искусствэ хэхъоныгъэ ышIыным тыдэлажьэ, творческэ цIыф цIэрыIохэр къе­тэгъэблагъэх. Лъэхъаным диштэрэ къэгъэлъэгъонхэм Адыгеим и Театральнэ зэхахьэ Iоф адешIэ. Культурэм хэхъоныгъэ ышIыным фытегъэпсыхьэгъэ проектыкIэу «Режиссерхэм ялабораторие» тыхэлажьэ. ШIэныгъакIэхэр актерхэм ядгъэгъотыныр типшъэрылъ шъхьаI, — къыIуагъ АР-м и Театральнэ зэхахьэ ипащэу Ацумыжъ Рустам.
— Пушкиным и Унэ лъэшэу сыгу рихьыгъ, мэхьанэ ин зиIэ проектыбэ ащ зэшIуехы. Адыгеим и Театральнэ зэхахьэ тапэкIи проектышхохэм зэрахэлэжьэщтым сицыхьэ телъ, — къыIуагъ Софья Высоковскаям.
— Советскэ режиссерэу Константин Станиславскэм театральнэ искусствэм щыпхырищыгъэ системэм тытетэу тэлажьэ. Апэрэу ащ ишIэныгъэхэм зафэзгъэзэгъэ режиссерэу Евгений Вахтанговым тинепэрэ ныбжьыкIэхэр театрэм иамалхэмкIэ зэрэбгъэсэнхэ плъэкIыщтыр къыушыхьатыгъ. Едгъэджэрэ артист ныбжьыкIэхэм непэрэ уахътэм диштэрэ драматургием зыфагъэзэнэуи афэтэдэ, ау жъыри зыщамыгъэгъупшэнэу ятэIо, — къыIуагъ Александр Фадеевым.
Къэбар жъугъэм иамалхэм ялIыкIохэм упчIабэ къатыгъ, игъэкIотыгъэ джэуапхэри агъотыжьыгъэх.
«Театр. Мастера» зыфиIорэ проектыр джыри Урысыем икъэли 9-мэ ащагъэцэкIэщт.
Лъэпшъыкъо Фатим.
.