Адыгеим апэрэу хэушъхьафыкIыгъэ дзэ операцием иветеран адаптивнэ шъошэ зэхэугъоягъэ щыратыгъ. А Iофтхьабзэр зыгъэцэкIагъэр фондэу «Хэгъэ­гум иухъумакIохэр» зыфиIорэм ишъо­лъыр къутам.

Ветеранхэу сэкъатныгъэ зиIэхэм яфизическэ зытет къыдалъытэзэ адыгъэ шъошэ зэхэугъоягъэу 1300-рэ аратыгъ. Мы амалыр фондым иIэнымкIэ лъэIур Анна Цивилевам Президентэу Владимир Путиным рихьылIагъ ыкIи ащ къыдыригъэштагъ.
АдыгеимкIэ апэрэу адаптивнэ шъуашэр зэратыгъэр хэушъхьафыкIыгъэ дзэ операцием иветеранэу Александр Будко. Ар Мыекъуапэ щыщ. Сэнэхьатэу «Юриспруденция» зыфиIорэр гуманитар академием щызэригъэгъотыгъ. ЫныбжьыкIэ къытефэрэ дзэ къулыкъур ыхьынэу 1999-рэ илъэсым ригъэжьагъ, мэзих тешIагъэу зэзэгъыныгъэкIэ ар лъигъэкIотагъ. 2020-рэ илъэсым пенсием кIуагъэ. Нэужым зэзэгъыныгъэм кIатхи, дзэ частьхэм ащыщ хэтэу къулыкъур хэушъхьафыкIыгъэ дзэ операцием щихьыгъ. Лагъымэр къызэом къытырищэгъэ уIагъэхэм апкъ къикIыкIэ апэрэ купым хэхьэрэ сэкъатныгъэ иIэ хъугъэ. Джы Александр лъэкъуитIумкIэ протезхэм атетэу икIэрыкIэу щыIэны­гъэм зарегъэсэжьы.
— Адаптивнэ шъуашэм хэхьэх: спорт джанэр, гъончэджыр, курткэ фабэр, джинс гъончэджыр, нэмыкI гъончэдж къызэрыкIор, чIэгъ-чIэлъхэр, нэмыкIхэри. Къыхэгъэщыгъэн фае, мыхэр зэкIэ сэкъатныгъэ зиIэхэм япсауныгъэ, яIэпкъ-лъэпкъхэм язытет елъытыгъэу адыгъэх, зыщыплъэнхэмкIи, пщыгъынхэмкIи Iэрыфэгъух. Непэ апэрэ шъуашэр яттыгъ, джыри ащ фэдэ лъэIоу тиIэхэр гупчэ аппаратым едгъэхьыгъэх. Охътабэ темышIэу къытфащэнхэу тыщэгугъы, — къыIуагъ шъолъыр фондым исоциальнэ координаторэу Къэрэбэт Юрэ.
Александр Будко къыратыгъэ шъошэ зэхэтым къахихи, джанэ, гъончэдж, кIыIу телъыр зыщилъагъэх ыкIи иеплъыкIэ къыриIотыкIыгъ.
— Сэщ фэдэхэмкIэ анахь шъхьаIэр IэпыIэгъу уимыщыкIагъэу ор-орэу зыпфэпэшъуныр ары. Мы шъуашэхэр ащкIэ Iэрыфэгъух, сэр-сэрэу зыщыслъэшъу­гъэх. ЗыхэшIыкIыгъэ шэкIхэри мыдэйхэу сеплъы. Нахьыбэрэ зысщыгъыкIэ, къесIолIэщтыр нахь сшIэн, — хигъэунэфыкIыгъ ветераным.
Александр Будко къызэриIуагъэмкIэ, мыщ фэдэ шъуашэхэр зэрищыкIагъэхэмкIэ фондым зыфигъэзагъ. Мази темышIэу илъэIу къызэрэфагъэцакIагъэр игуапэу къыхигъэщыгъ. Сыд фэдэ лъэIукIи шъо­лъыр фондым зыфигъэзагъэми къызэрэфагъэцакIэрэр игуапэу хигъэунэфы­кIыгъ, ащкIэ афэраз.
2024-рэ илъэсым тыгъэгъазэм Александр Будко зэтыгъо ахъщэ IэпыIэгъоу сомэ миллион ратыгъ. Сэкъатныгъэ зиIэхэм афытегъэпсыхьэгъэ автомобиль къыратынэу ащ лъэIу тхылъ ытыгъэу ежэ.
Адыгеим и ЛIышъхьэу КъумпIыл Мурат зэрэхигъэунэфыкIыгъэмкIэ, хэушъхьафыкIыгъэ дзэ операцием хэлэжьагъэхэм ящыкIэгъэ социальнэ IэпыIэгъур ягъэгъотыгъэнымкIэ, ветеран статус яIэнымкIэ зищыкIагъэхэм юридическэ ыкIи психологическэ IэпыIэгъу ягъэгъо­тыгъэнымкIэ шъолъыр фондым иIофышIэхэм зэпымыоу япшъэрылъ агъэцакIэ.
Iэшъынэ Сусан.