Адыгеим и ЛIышъхьэу КъумпIыл Мурат зэхэсыгъоу зэрищагъэм щытегущыIагъэх Нэгыежъ Iошъхьэ чапэмкIэ гъэзэгъэ мэз зыгъэпсэфыпIэу «Мэздахэм» изэтегъэпсыхьан зэрэлъагъэкIотэщтым.

ЗэдэгущыIэгъум хэлэжьагъэх УФ-м и Къэралыгъо Думэ Адыгеир къыщызыгъэ­лъэгъорэ Владислав Резник, АР-м иминистрэхэм я Кабинет и Тхьаматэу КIэрэщэ Анзаур, АР-м культурэмкIэ иминистрэу Аулъэ Юрэ, АР-м архитектурэмрэ къэлэгъэпсынымрэкIэ и Комитет ипащэу Зезэрэхьэ Азэмат, Мыекъуа­пэ ипащэу Геннадий Митрофановыр, къалэм иархитекторэу Ацумыжъ Мадинэ, культурэм иучреждениеу шъолъырым итхэм ялIыкIохэр.
Шъугу къэдгъэкIыжьын, проектыр Фондэу «Дом.РФ» зыфиIорэм дашIыгъэ зэзэгъыныгъэм къыхиубытэу зэшIуахы ыкIи къэлэ щыIэкIэ гупсэфым изэтегъэ­псыхьанкIэ проект анахь дэгъухэм я Урысые зэнэкъокъу щытекIуагъ. Зыгъэ­псэфыпIэм зэкIэмкIи гектар 435-рэ еубыты, ащ игъэпсын Мыекъуапэ икъэ­лэ щыIакIэ нахьышIу шIыгъэнымкIэ мэхьанэшхо зиIэ лъэбэкъу.
Апэрэ чэзыоу 2024-рэ илъэсым аухыгъэм къыхиубытэу чIыпIэм игектари 7,7-рэ зэтырагъэпсыхьагъ. Мыщ сомэ миллиони 163,5-рэ пэIуагъэхьагъ. ТапэкIэ агъэцэкIэжьыгъэгъэ дэкIояпIэм ылъэныкъокIэ зыгъэпсэфыпIэм идэхьапIэ зэтырагъэпсыхьагъ, зыплъыхьапIэри къыдыхэтэу. КIэлэцIыкIу джэгупIэ, спортым зыщыпылъыщтхэ чIыпIэр, зыплъыхьапIэр ыкIи машинэ уцупIэр джащ фэдэу ашIыгъэх. ЛъэсрыкIо ыкIи кушъхьэфэчъэ гъогужъыехэр пхыращыгъэх. Архитектурэ псэолъэ цIыкIухэр, тетIысхьапIэхэр, хэкIитэкъупIэхэр, гъэнэфыным, видеотехыным, мэкъамэхэм якъегъэIон атегъэпсыхьэгъэ псэуалъэхэр хагъэуцуа­гъэх.
Мыекъуапэ ипащэ къызэриIуагъэмкIэ, зызщагъэпсэфыщтыр нахьыбэу, лъэсрыкIо ыкIи кушъхьэфэчъэ гъогужъыехэр къыдыхэлъытагъэхэу чIыналъэм игектари 8 фэдиз ятIонэрэ чэзыум къыхиубытэщтых. Ащ тегъэпсыхьагъэу сомэ миллиони 158,5-рэ къатIупщыгъ. Джырэ уахътэм ятIонэрэ чэзыур процент 85-кIэ агъэцэкIагъ ыкIи илъэсым ыкIэ нэс IофшIэнхэр къаухыщтых.

Мэз зыгъэпсэфыпIэм культурнэ ыкIи мэхьанэ зиIэ псэуалъэу хэтыщтхэм анахьэу анаIэ атырагъэты. АР-м и ЛIышъхьэ игукъэкIыкIэ Мэздахэ зэIухыгъэ концертхэр щырагъэкIокIых. Джащ фэдэу КъумпIыл Мурат пшъэрылъ къыгъэуцугъ тапэкIэ зэтегъэпсыхьан Iоф­шIэнхэр зэшIуахыхэ зыхъукIэ чIы­опсым псэуалъэхэр зэрэдиштэщтхэм имыза­къоу, Адыгеир нэмыкIхэм къахэзыгъэщырэхэмкIи аушъэн фаеу.
Ащ пае лъэпкъ нэшанэхэр агъэфедэнхэм иIофыгъо егупшысэх. ГущыIэм пае, илъэсым ыкIэ нэс барельефи 10-у Адыгеим итарихъ байрэ ащ щыпсэухэрэм хьакIэпэгъокIынымкIэ шэн шIагъоу ахэлъ­хэмрэ къизыгъэлъэгъукIыхэрэр ашIыщтых. Лъэпкъ зэгурыIоныгъэмрэ зэ­къошныгъэмрэ ахэр ятамыгъэщтых, ащ республикэмкIэ мэхьанэшхо иI. Къалэм щыпсэухэрэмрэ зекIохэмрэкIэ произ­ведение пэпчъ «культурэм ишъхьаныгъупчъэ» къафызэIуихы фэдэ хъущт.

Барельефхэм къырагъэлъэгъукIыщтым Iоф дашIэнэу къя­джагъэх Урысыем культурэмкIэ изаслуженнэ IофышIэу, Адыгеим изаслуженнэ сурэтышIэу Бырсыр Абдулахь, Урысыем исурэтышIхэм я Союз хэтэу, скульпторэу Даур Ас­лъан, джащ фэдэу архитекторэу Ацумыжъ Мадинэ. Барельефхэр джэрзым ащыхагъэткIукIыщтых къэралыгъом ихъызмэтшIэпIэ пэрытхэм. Мы Iоф­шIэнхэм сомэ миллион 19,3-рэ къафыхагъэкIыгъ, Мые­къуапэ изекIо код ихэхъоныгъэ къыхиубытэу зэшIуахыщтых. Мэз зыгъэпсэфыпIэу «Мэздахэм» уезы­щэлIэрэ дэкIояпIэу метрэ 45-рэ зи­кIыхьагъэм къэуцупIэ 20-у хэтым щыщэу 10-мэ барельефхэр атырагъэуцонхэу рахъухьэ. Ар шъо­лъырым щы­псэ­­хэ­рэмрэ зекIохэмрэ къезыщэлIэщтхэ джыри зы чIыпIэ шIагъо хъущт.

«ЗыгъэпсэфыпIэу зэрэщытыщтым имызакъоу, Адыгеим инэпэеп­лъэу, ащ ыпсэ, зэфыщытыкIэу илъхэр, икультурнэ кIэн, хьакIэхэм зэ­рафызэIухы­гъэр къизыгъэлъэгъукIэу мыр хъущт. Джащ пае мэз зы­гъэпсэфыпIэу «Мэздахэр» зыфэдэщтыр итхъухьэ зыхъукIэ, зэтегъэпсыхьанымкIэ аужырэ шапхъэхэм адакIоу тичIыгу итарихъ, ичIыопс ыкIи икультурэ куоу зэряпхыгъэр къыдэтлъытэн фае», — къыкIигъэт­хъыгъ КъумпIыл Мурат.

ЧIыопсым икъызэтегъэнэнрэ экологием ылъэныкъокIэ шапхъэхэмрэ зы­лъып­лъэхэу къэнэжьых. IофшIэн пстэури чIыопсым икъэухъумэн тегъэпсыхьэгъэ хэбзэгъэуцугъэхэм адештэ шъолъы­рым къыщыкIыхэрэмрэ ипсэушъхьэхэмрэ яягъэ арамыгъэкIыным фэшI. Мы пшъэрылъхэм ягъэцэкIэн къыдыхэлъыта­гъэу КъумпIыл Мурат Мыекъуапэ ипащэхэм ариIуагъ къалэм итеплъэ лъэхъа­ным диштэу, къэкIырэ шхъуан­тIэхэмкIэ зэкIоу зэрагъэпэшын зэрэфаер.
АР-м и ЛIышъхьэ ипресс-къулыкъу