БоксымкIэ Европэм ипервенствэу Армением щыкIуагъэм Адыгеим щыщ спортсменитIумэ дышъэ медальхэр къыщахьыгъэх. Илъэс 19 — 22-рэ зыныбжьхэр ары зызыушэтыгъэхэр.

АР-м и ЛIышъхьэу КъумпIыл Мурат зэнэкъокъум текIоныгъэр къыщыдэзыхыгъэхэ Евгений Жоровымрэ Мушег Баяндурянрэ афэгушIуагъ.
Республикэм илIыкIохэм ухьазырыныгъэ дэгъу къагъэлъэ­гъуагъ, атефэу апэрэ чIыпIэр къахьыгъ. Урысыем иныбжьыкIэ командэ пэрытныгъэ ыубытыным яIахьышIу халъхьагъ. Тикъэралыгъо испорт­сменхэм дышъэ медалипшI къа­фагъэшъошагъ.
Евгений Жоровым Мыекъопэ спорт еджапIэу С.М. Джэнчатэм ыцIэ зыхьырэм зыщегъасэ, итренерыр Александр Ким. Евгений килограмм 51-м нэс къэзыщэчы­хэрэм якуп зыщиушэтыгъ ыкIи дышъэ медаль къыхьыгъ. Европэм ипервенствэ къыдыхэлъытэгъэ апэрэ зэIукIэгъоу иIагъэм португальскэ боксерэу Леандро Алмеидэм щытекIуагъ.

— Зэнэкъокъум ипэублэ сыдигъокIи къызэрыкIоп, угу рэхьатырэп. ЗэкIэри къызэрэздэхъурэр къызгурыIощтыгъ, ащ дакIоу пшъэрылъэу зыфэзгъэуцужьыгъэр згъэцэкIэным сыпылъыгъ ыкIи ар къыз­дэхъугъ. Дунэе мэхьанэ зиIэ турнирхэм бэрэ сахэлажьэ. 2023-рэ илъэсым Черногорием щыкIогъэ Европэм ипервенствэ ятIо­нэрэ зэIукIэгъум къыщыстекIуагъэх. Джы финалым сихьагъ, анахь макIэ­мэ тыжьын медаль къэсхьыщт, ау дышъэр ары сызфэбэнэщтыр, — къы­Iуагъ Евгений Жоровым.
Евгений Израиль испортсменэу Давид Захари финалым щыте­кIуагъ ыкIи дышъэ медаль къыфагъэшъошагъ.
Килограмм 48-м нэс къэзыщэчыхэрэм якуп хэтыгъэ Мушег Баяндуряни тIекIоныгъэр къыдихыгъ. Ащ республикэ спорт еджапIэу N 3-м зыщегъасэ, спортымкIэ мастерэу Карлен Восканян итренер.
Зыныбжь илъэс 22-м емыхъугъэхэм якуп пштэмэ, Урысыем икIалэхэми ипшъашъэхэми зэнэ­къокъум пэрытныгъэр щаубытыгъ. КIалэхэм дышъэ медали 10 къа­хьыгъ, пшъашъэхэм гъогогъуи 8-рэ апэрэ чIыпIэр къафагъэшъо­шагъ