Я XI-рэ шэкIогъу хьисап программэр гъэсэныгъэ гупчэу «Сириусым» мы мазэм и 1-м къыщыублагъэу и 22-м нэс щэкIо.

Ащ хэлэжьэнхэу кIэлэеджэкIо 213-рэ рагъэблэгъагъ, ахэр Урысыем ишъо­лъыр 17-мэ ащыщых — Астраханскэ, Волгоградскэ, Курганскэ, Ростовскэ хэкухэм, Адыгеим, Дагъыстан, Къэ­бэртэе-Бэлъкъарым, Къалмыкъым, Къы­рым, Темыр Осетием — Аланием, Чэчэным, Донецкэ ыкIи Луганскэ народнэ республикэхэм, къалэхэу Севастополь, Федеральнэ шъолъырэу «Сириусым», Краснодар ыкIи Ставрополь крайхэм, джащ фэдэу Абхъазым ыкIи Узбекистан. Ахэм ахэтых Адыгеим икIыгъэ кIэлэеджэкIо 19.
Гъэсэныгъэ программэм хэхьэх олимпиаднэ хьисапымкIэ десэхэр, хьисапымкIэ ыкIи естественнэ шIэныгъэхэмкIэ лекциехэр, культурнэ-зыгъэпсэфыгъо сыхьатхэр.
Адыгэ къэралыгъо университетым и Кавказ хьисап гупчэрэ Республикэ естественнэ-хьисап еджапIэмрэ гъэсэныгъэ программэм инаучнэ-методическэ ыкIи икадрэ Iофыгъохэр агъэпсых. Программэм пэщэныгъэ дызэрехьэ Урысыем иректорхэм я Союз ивице-президентэу, кIэлэеджакIохэм яолимпиадэ и Урысые совет, хьисапымкIэ кIэлэ­еджакIохэм яолимпиадэ и Урысые осэшIхэм ахэтэу, АКъУ-м иректорэу Мамый Даут.
КIэлэеджакIохэм яухьазырыныгъэ елъытыгъэу зэрэрагъэджэщтхэ программэри гощыгъэ: алгебрэр, геометриер, комбинаторикэр ыкIи пчъагъэхэмкIэ теориер. КIэлэегъэджэ 40-м ехъу а Iофтхьабзэм хэлажьэ — олимпиаднэ хьисапым ылъэныкъокIэ хэгъэгум испе­циалист пэрытхэр, хьисапымкIэ Урысыем ихэшыпыкIыгъэ командэ итренерскэ штаб хэтхэр, кIэлэеджакIохэм я Урысые олимпиадэ иосэшIхэр.
КIэлэеджакIохэр зэлъашIэрэ шIэныгъэлэжьхэм аIукIэщтых — Андрей Рай­городскэм, Алексей Савватеевым, Николай Андреевым, Айкэ Саркисян. Куль­турнэ программэм къыдыхэлъытагъэу поэтическэ ыкIи орэд-мэкъэмэ пчыхьэзэхахьэхэр зэхащэщтых.
Шъугу къэдгъэкIыжьын, шэкIогъу хьисап гъэсэныгъэ программэр 2015-рэ илъэсым къыщегъэжьагъэу гъэсэныгъэ гупчэу «Сириусым» щызэхащэ. Олимпиаднэ хьисапым изэгъэшIэн, кIэлэеджа­кIохэм афэгъэхьыгъэ егъэджэн-ушэтын ыкIи проектнэ IофшIэныр агъэцакIэ, хэгъэгум ишIэныгъэлэжь пэрытхэм ащ лекциехэр къыщаты.
Адыгэ къэралыгъо университетым ипресс-къулыкъу