ЦIыфыбэхэм амылъэгъоу къэ­хъух, ау нахь къиныр дунэе нэфым иIэшIугъэ зэхэзышIагъэу, щыIэныгъэм къыздихьырэ тхьа­­мыкIагъохэм, узхэм къахэкIыкIэ хьафизэу къанэхэрэр ары.

Мы купым хэхьэрэ цIыфхэм анэхэм амылъэгъуми, дунэе нэфым идэхагъэ гукIэ зэхашIэ. Ахэм ащыщ непэ тигущы­Iэгъоу ХъокIон Пщымафэ. Ар хьафизэхэм я Урысые обществэ ичIыпIэ организациеу Кощхьэблэ районым щыIэм ипащ.
Илъэс пчъагъэхэм къакIоцI щыIэныгъэ жъотым хэтыгъ, IофшIэн зэфэшъхьафхэр ыгъэцэкIагъэх, игъорыгъозэ уз гъэтIылъы­гъэу иIэм къыхэкIыкIэ ымылъэгъужьэу къэнагъ. ЫгукIэ цIыф бэрэчэтэу щыт, къин хэфэгъэ цIыфхэми яIэпыIэгъушIу. ЩыIэныгъэм зыхидзэгъэ нэмыкI дунаим амал зэриIэкIэ зыдыригъэштэн ылъэ­кIыгъ. Пщымафэ дэеу зылъэгъухэрэм ащыщ, ятIонэрэ купым хэхьэрэ сэкъатны­гъэ иI. Ащ емылъытыгъэу чанэу иIофшIэн зэригъэцэкIэщтым пылъ. 2000-рэ илъэсым къыщегъэжьагъэу хьафизэхэм я Урысые обществэ икъутамэу Кощхьэблэ районым щыIэм пэщэныгъэ дызэрехьэ. Джыри бэмышIэу хэдзынхэр рекIокIыхи, ятIонэрэ пIалъэм ар хадзыжьыгъ.
— Сэ Еджэркъуае сыкъыщыхъугъ. Дзэм къулыкъур щысхьыгъ, унагъо сшIагъэ. Къутырэу Чехрак тIэкIурэ сыщы­псэугъ. «Кощхьэблэ мэкъумэщ химиер» зыфиIорэ хъызмэтшIапIэм илъэс 15-рэ сыщылэжьагъ. Нэужым Кощхьаблэ си­унагъокIэ сыкъэкIожьи, водителэу пенсием сэтIысыжьыфэ Iоф сшIагъэ. Шъоу­щыгъу узыр сиIэ хъуи, къэсымышIэзэ сынэхэм зэралъэгъурэм къыщыкIагъ. «Глаукомэ» узым къыхэкIыкIэ зы нэм ымылъэгъужьыхэ хъугъэ, адрэр тIэкIу дэдэ къызэтенагъ. Ащи сезэгъы. СыдигъокIи «шыкур» сэIо, сиунагъо исхэр сиIэпыIэгъухэу IофшIапIэм сыкъащэ, сэщ фэдэ сымаджэхэм ящыкIэгъэ фэIо-фа­шIэхэу къызкIэлъэIухэрэр сфэлъэкIыщтымкIэ афэсэгъэцакIэ, — хигъэунэфыкIыгъ ХъокIон Пщымафэ.
ЧIыпIэ организациеу тигущыIэгъу зи­пащэм Кощхьаблэм нэмыкIэу Шэуджэн, Джэджэ районхэри къыхеубытэх. Непэ ехъулIэу ащ исатырэ нэбгыри 140-рэ фэдиз хэт. ЗэкIэми ныбжь яI, пенсионерых. ЩыIэныгъэм зыкъыхагъотэнымкIэ социальнэ IэпыIэгъу афэхъугъэныр, реабилитацие акIунымкIэ, загъэпсэфынымкIэ ящыкIагъэхэр аригъэгъотынхэр ВОС-м ипшъэрылъ шъхьаIэх. Хэти гу­къао иIэмэ, къэсымэджагъэмэ, изакъоу къины­гъохэр зэпырагъэчырэп, зэдеIэжьынхэр янэшан. Пщымафэ сэмэркъэур къебэкIэу, гуфэбагъэу къыпкъырыкIырэм сыд фэ­дэрэ Iофыгъуи хэкIыпIэ къыфигъотын елъэкIы. Ащ фэдэ цIыфхэр зыплъэгъу­хэ­кIэ, шIум, цIыфхэм азыфагу илъын
фэе зэфыщытыкIэм уасэ фыуегъэшIы.
— Къыхэзгъэщымэ сшIоигъу тиорганизацие ежь-ежьырэу зызыIыгъыжьхэм зэращыщыр. Ащ епхыгъэу мылъкушхо тIэкIэлъэу щытэп, тэр-тэрэу тыугъоирэр ары тызэрэщыIэр. ГущыIэм пае, непэ ехъулIэу тибюджет сомэ мин 260-рэ илъ. Рэзэныгъэ гущыIэхэмкIэ къыхэз­гъэщыхэмэ сшIоигъу лъэкI ыкIи гупыкI зиIэ цIыфхэу IэпыIэгъу къытфэхъухэрэр: Бэлокъо Заремэ, Лъэустэнджэл Мурат, Мамрыкъо Руслъан, Хьамырзэ Заур, Бзэджэжъыкъо Азэмат, Тхьаркъохъо Сул­тIан, нэмыкIхэри. Мыхэм яшIуагъэкIэ гъомылэпхъэ зэфэшъхьафхэр зэрылъ Iалъмэкъхэр тиучет хэтхэм яттын тэлъэ­кIы. Джащ фэдэу сымэджэщым чIэлъыгъэхэм ар къэзыушыхьатырэ тхьапэр къызытахьылIэкIэ, сомэ минитIу зырыз, юбилей зиIэм — сомэ минищ афэтэтIупщы, — къыIуагъ ХъокIон Пщымафэ.
ТигущыIэгъу къыхигъэщыгъэхэм ащыщ республикэм щызэрахьэрэ социальнэ политикэм диштэу сэкъатныгъэ зиIэхэм яобщественнэ организациехэм IэпыIэгъу ягъэгъотыгъэным республикэм и ЛIышъхьи, районищэу къяпхыгъэхэм яад­ми­нистрациехэм ялIыкIохэми, депутатхэми анаIэ зэрэтырагъэтырэр. Сыд фэдэ Iофыгъо ахэм арахьылIагъэми къафамыгъэцакIэу къыхэкIыгъэп.
— Къэралыгъо мэфэкIхэу хагъэунэфыкIыхэрэм япхыгъэ культурнэ ыкIи спорт Iофтхьабзэу республикэм щызэхащэхэрэм амал зэриIэкIэ тичIыпIэ об­щественнэ организацие хэтхэр ахэлажьэх, хагъэунэфыкIырэ чIыпIэхэр къы­дахых. Аныбжь елъытыгъэу зэкIэ зэнэкъокъухэм ахэлэжьэнхэу мыхъуми, шашкэ-шахматхэмкIэ, дартсымкIэ дэгъоу зыкъыщызгъэлъагъохэрэм Енэмыкъо Салбый, Цэй Щамсудин, сэры тащыщ. Илъэс къэс зэхащэрэ социальнэ Iофтхьабзэу «Бэщ фыжьыр» районхэм гъэшIэгъонэу ащыредгъэкIокIыгъ, тиорганизацие илъэс пчъагъэ хъугъэу хэтхэр мыщ щагъэшIуагъэх, — къыIуагъ хьафи­зэхэм ячIыпIэ организацие итхьаматэ.
Зипсауныгъэ амалхэр зэщыкъогъэ цIыфхэр, анахьэу зэрамылъэгъурэмкIэ сэкъатныгъэ зиIэхэм, зэрящыкIагъэхэр, обществэм ищыIэныгъэ хэлажьэхэу зэхашIэным мэхьанэшхо иI. Мы мафэр зыкIыхагъэунэфыкIырэр зымылъэгъухэу е макIэу зылъэгъухэу щыIэныгъэм чIыпIэ къин ригъэуцуагъэхэм обществэм, хабзэм анаIэ зэратырагъэтырэр къагъэ­лъэгъоныр ары.
Адыгеим и ЛIышъхьэ мы купым хэ­хьэрэ цIыфхэм къотэгъу афэхъу, хьафи­зэхэр щыIэныгъэм хэгъэгъозэгъэнхэм фэгъэзэгъэ къулыкъухэми пшъэрылъхэр афешIых. Дунэе нэфым идэхагъэ амы­лъэгъуми, ар зэхашIэным, щыIэныгъэм Iэрыфэгъоу щыпсэунхэм иамалхэр агъо­тынхэм ащ ынаIэ тырегъэты.
Iэшъынэ Сусан.