IэпэIасэу, лъэпкъ IэшIагъэхэмкIэ Цехым хэтэу Бэлокъо Щэбан «Адыгэ макъэм» шIухьафтын къыритыгъ.

Гъэзетым итамыгъэ зыте­шIыхьэгъэ дэпкъ пылъэ дахэ, адыгэ быракъым ишъогъоу къыфишIыгъ. Непэ шIухьафтыныр редакцие чIэхьапIэм дэжь пылъагъэу, иIофышIэхэми ихьа­кIэхэми мафэ къэс къапэгъокIы. Ащ фэшъхьафэу Iэнашъхьэ тет исп унэ цIыкIури ащ игъус.
Шъугу къэзгъэкIыжьын, мы гъэмафэ Бэлокъо Щэбан зэдэгущыIэгъу дисиIэгъагъ. Илъэ­сибл фэдизкIэ узэкIэIэбэжьмэ ар Тыркуем къикIыжьи хэкужъым къэкIожьыгъ. Гипсым хэшIыкIыгъэ пкъыгъохэм яшIын фэIаз. ПсэолъэшIыным хэтэу мэлажьэми, уахътэ къызхигъэкIырэм, гухахъо зыхигъотэрэ твор­чествэми зыфегъазэ. А пстэур къызщисIотыкIыгъэ тхыгъэр гъэзетым къызесэгъахьэм, Щэбан лъэш дэдэу игуапэ хъугъэ. ЛIэшIэгъум къехъугъэ лъэпкъ гъэзет закъоу адыгабзэкIэ къы­дэкIырэм инэкIубгъо зэритым ыIэтыгъ. ЫужкIэ къызэрэнэфагъэмкIэ, джыри ныбжьыкIэу Тыркуем исызэ апэрэу адыгабзэкIэ зэджагъэр «Адыгэ ма­къэр» арэу къычIэкIыгъ. ШIу­хьафтынэу къытфишIыгъэр ащ ихьатыр хъугъэ.
— ТыркуемкIэ Адыгэ хасэхэр щыIэхэ зэхъум, зыгорэм игу­къэкIкIэ къэбэртэябзэкIэ хьа­ры­фылъэ нэкIубгъуитIу хъоу къыдагъэкIыгъагъ. Ар тихасэу Къай­сэр дэтыгъэм чIэлъыгъ. АщкIэ хьарыфхэр зэзгъэшIагъэх, ау сызэджэн щыIагъэп. Уахътэр кIуи, УрысыемкIэ хабзэр зэхъо­кIи, СССР-р зызэхэзым, хэку­жъым исхэр Тыркуем къакIохэу аублагъ. Ахэм ащыщхэм шIу­хьафтынэу къахьыгъагъэхэм ахэ­лъыгъэх «Адыгэ макъэу» зы гъэзет, «Зэкъошныгъэр» ыкIи МэщбэшIэ Исхьакъ итхылъэу «Бзыикъо зау». Анахь пIуакIэу ахэлъыр гъэзетыр арыти, ар къахэсхыгъ ыкIи сшIэрэ хьарыфхэмкIэ седжагъ. А гъэзетыр джырэ нэс сиI, Тыркуем унэм илъ, — къэбар гъэшIэгъоныр къытфиIотагъ Щэбан.
Джащ фэдэу, джыри ныб­жьыкIэу Тыркуем исызэ адыгэ радиом Щэбан едэIущтыгъ. Тхьамафэм зэ Цурмыт Бибэ икъэтынхэр къыригъэубытыщтыгъэх.
— «КъэзыIорэр Мыекъуапэ» ыIоу Цурмыт Бибэ къэбархэр къытыщтыгъ. КъыздепхьакIы­шъурэ радиомкIэ къызытыубытышъукIэ, тигуапэу тедэIущтыгъ. Ар сятэжъхэм зафэсIуатэкIэ ашIошъ хъущтыгъэп. ЕтIанэ афэсхьи зесэгъэдэIухэм лъэшэу ашIогъэшIэгъоныгъ. Хэкум ­адыгэ къинэжьыгъ Iоу ашIэщтыгъэп. ЗэкIэри икIыжьыгъэу къащы­хъущтыгъ, — еIо тигущыIэгъу.
Непэ Щэбан хэкурыс хъу­жьыгъэ. Адыгабзэр ыIупэ темых, иныдэлъфыбзэкIэ зэджэн хъоеу егъоты. Илъэс 30-кIэ узэкIэIэбэжьмэ къыIэкIэхьэгъэгъэ адыгэ гъэзетыр къызщы­дагъэкIырэ редакцием ипчъэ-
хэр ренэу фызэIухыгъэх. Анахь шъхьаIэр — иIэпэщысэ шIу­хьафтынкIэ итарихъ зыхитхагъ.
— Щэбан игукъэкI лъэшэу тигъэгушIуагъ. СурэтышIхэми нэмыкI IэпэIасэхэми къытатыгъэ шIухьафтынхэр тиIэх. Ахэм гъэ­зетым имузей цIыкIу къагъэ­дахэ. Ау Щэбан иер чIэхьапIэм пытлъэнэу итхъухьагъ. Ар ти­гъэзет итамыгъ, инэпэеплъ. Къы­чIахьэхэрэми чIэкIыжьхэрэми алъэгъун фае. Джыри зэ «тхьауегъэпсэушхо» есэIо Щэ­бан, — къыхигъэщыгъ «Адыгэ макъэм» иредактор шъхьаIэу МэщлIэкъо Саидэ.
Анцокъо Ирин.