Шъачэ щылэжьэрэ зэлъашIэрэ тренерэу Къошырэкъо Анзор ыгъасэхэрэм ягъэхъагъэхэм ­шъолъыр ыкIи урысые зэнэ­къокъухэм ащахагъахъо.

Ежь ышъхьэ фэгъэхьыгъэу бэ къы­Iуатэрэп, зэрэгъэсагъэр, шэн-хабзэмэ атетэу зэрапIугъэр къыхэщы, нахьыбэ­рэмкIэ зыдэлэжьэрэ кIалэхэм, иIофшIэгъухэм ар къатегущыIэ. БэнэнымкIэ ПсышIопэ клубэу «Боец» зыцIэм игъэсакIоу Къошырэкъо Анзор Краснодар краим испорт дунай дэгъу дэдэу щашIэ.
2007-рэ илъэсым специалист ныбжьыкIэр Ермэлхьаблэ къикIи ПсышIуапэ къэкIуагъ, илъэс нахь темышIагъэу зы­гъэпсэфыпIэу «Гренада» зыцIэм тре­нировкэхэр щаригъэшIэу ыублагъ. А уахътэм къыщежьэ Анзор иклубэу Шъа­чэ анахь дэгъоу щалъытэрэм итарихъ гъогу.
— Ермэлхьэблэ къэралыгъо кIэлэегъэджэ университетыр къэсыухыгъ, ащ ыуж Пшызэ къэралыгъо университетым физическэ культурэмрэ спортымрэкIэ сиIэпэIэсэныгъэ щыхэзгъэхъуагъ, — къе­Iуатэ ащ. — Самбэмрэ дзюдомрэкIэ еджапIэу Ермэлхьаблэ дэтым, дунаим щызэлъашIагъэм тренировкэхэр щысхьыщтыгъэх, сипащагъэр Урысыем изаслуженнэ тренерэу Рудольф Бабаян. Синасып къыхьыгъ дзюдомкIэ Олимпий­скэ чемпионэу Мудрэнэ Бислъан, самбэмкIэ Европэм ичемпионэу Псэунэ Мурат, нэмыкIхэми а зы уахътэм садэ­бэнэнэу. Спортыр шIу сэзыгъэлъэгъу­гъэр, лъапсэ сфэзышIыгъэр боксымкIэ ыкIи каратэмкIэ сиапэрэ тренерыгъэу Николай Левченкэр ары, Iэпшъэрызаом Лев Макеевым сыфигъэсагъ. Ар спортымкIэ мастер, Урысыем и УIэшыгъэ КIуачIэхэм щэгъогогъо ячемпион, нэужым синыб­джэгъу анахь дэгъу хъугъэ.
Урысыем Iэпшъэ бэнэн спортымкIэ имастерыцIэ Анзор Шъачэ къыщыфа­гъэшъошагъ ыкIи физическэ культурэмрэ спортымрэкIэ а къалэм изаслуженнэ IофышIэ хъугъэ. Илъэс зэфэхьысыжьхэмкIэ гъэсэкIо ныбжьыкIэр Краснодар краимкIэ анахь дэгъухэм ахалъытэу бэрэ къыхэкIыгъ. Ыгъасэрэмэ ащыщых Урысыем изэнэкъокъу щытекIуагъэу, дунаим изэнэкъокъу ифинал ихьагъэу, спортым имастерэу Вячеслав Иовиныр, Европэм ыкIи Урысыем язэнэкъокъухэм ащатекIуагъэу, спортым имастер хъунымкIэ кандидатэу Эрик Абелян, Урысыем изэнэкъокъу тIогъогогъо апэрэ чIыпIэхэр ащызыубытыгъэу Тимур Куна­тенкэр, апэрэ спорт разряд зиIэу, Урысыем изэнэкъокъухэм тIогъогогъо апэрэ чIыпIэхэр къащызыхьыгъэу, хэ­гъэгум ихэшыпыкIыгъэ командэ хэтэу Элина Орловар, джащ фэдэу спортым имастер хъунымкIэ кандидатхэу нэбгырипшIым ехъу. Анзор — Iэпшъэ бэнэнымкIэ къалэу Шъачэ и Федерацие ивице-президент, олимпийскэ резервым испорт еджапIэу N 3-м Iэпшъэ бэнэнымкIэ тренер-кIэлэегъаджэу щэлажьэ, еджапIэм ипащэр Алик Амбарцумян.
Гъэ къэс гъэсакIом сэнаущыгъэ зы­хэлъ спортсмен ныбжьыкIэхэу гъэхъагъэ­хэр зышIыхэрэр къыхегъэщых. Ахэм джыри IофшIэныбэ апэ зэрилъыр къыкIегъэтхъы Анзор, текIоныгъэ шъхьаIэхэр апэкIэ щыIэх, ау кIуачIэ зэряIэр, гъэ­хъагъэхэр зэрашIышъущтхэр къэлъагъо. Ахэм ащыщ илъэс 13 зыныбжь Бгъанэ Иляс. Ар поселкэу ПсышIуапэ щэпсэу. КIэлэм амалышIухэр зэриIэхэр, ыгу зэретыгъэр, илъэситф нахь мыхъугъэми зыбанэрэр гъэхъагъэхэм зэрафакIорэр тренерым къыхегъэщы. НыбжьыкIэхэм азыфагу бэнэн искусствэ­хэмкIэ я XVII-рэ Урысые зэнэкъокъухэу Анапэ щыкIуагъэхэм Иляс «дышъэр» къащихьыгъ. Турнирым хэгъэгум ишъо­лъыр 23-мэ къарыкIыгъэ спортсмен 350-м ехъу хэлэжьагъ. А зэнэкъокъу дэдэм Бгъанэм «Техникэ анахь дэгъу къэзыгъэлъэгъуагъэр» зыфиIорэ лъэныкъомкIэ хэушъхьафыкIыгъэ шIухьафтыныр къыщыфагъэшъошагъ. Фэшъхьаф зэнэкъокъубэу Краснодар краим щыкIуа­гъэхэми Иляс апэрэ чIыпIэхэр къащыдихыгъ, ахэр Урысыем и МВД иуголовнэ розыск икъулыкъушIэхэм ыкIи иветеранхэм, IофшIэнымкIэ Пшызэ и ЛIы­хъужъэу, милицием игенерал-лейтенантэу А. Г. Сапруновым ишIэжь афэгъэхьы­гъагъэх. Аужырэм шъолъырым имуниципалитет 20-мэ къарыкIыгъэ спортсмен 600-м ехъу хэлэжьагъ.
Iэпшъэ бэнэным лъапсэ фэзышIыгъэмэ ащыщэу Геннадий Королевым ишIэжь фэгъэхьыгъэ Урысые зэнэкъокъухэу Сол­нечногорскэ щыкIуагъэхэми Бгъанэр дэгъоу ахэлэжьагъ.
— Геннадий Анатолий ыкъом фэгъэ­хьыгъэу бэ къэпIотэн плъэкIыщтыр — ар лъэныкъуабэхэмкIэ IэпэIасэу щытыгъ, сэмэркъэу хэлъыгъ, хэгъэгум ипатриот, офицер шъыпкъ, — къеIуатэ Анзор. — Ар УФ-м физическэ культурэмрэ спортымрэкIэ заслуженнэ IофышI, Урысыем изаслуженнэ тренер, самбэмкIэ СССР-м спортымкIэ имастер, ФСБ-м иполковник, ащ икомандэ илъэс пчъагъэхэм хэгъэгумкIэ анахь дэгъоу щы­тыгъ. Къэралыгъом ишъолъыр 35-мэ къарыкIыгъэ кIэлэцIыкIу ыкIи пшъэшъэжъые миным ехъу турнирым хэлэжьагъ. Крас­нодар краим ихэшыпыкIыгъэ командэ хэты­гъэх олимпийскэ резервымкIэ спорт еджапIэу N 3-м Iэпшъэ бэнэнымкIэ зыщызыгъа­сэхэрэри. Шъхьафэу Бгъанэ Иляс пае къасIо сшIоигъу. Мы кIалэр дэхэ дэдэу бэнагъэ, техникэ шIагъо къыгъэлъэ­гъуагъ, ащ «иджэрз» тэ «дышъэу» тэлъытэ. Иляс зэIукIэ­гъуитф иIагъ, плIым текIоныгъэ къащыдихыгъ, ахэм ащыщэу тIур нахь псынкIэу къыухыгъэх, ау дунаим икубок икъыдэ-
хынкIэ зэнэкъо­къухэм ячемпионэу къыте­фа­гъэм шIо­кIышъугъэп, ар къытекIуагъ. клубэу «Боец» жъогъуакIэ къыщы­благъ, амалэу щыIэр зэкIэ ехьы­лIэгъэн фае ащ исэнаущыгъэ хэгъэхъо­гъэным, анахь зэнэкъокъу инхэм ащытекIоным афэшI. Солнечногорскэ дэ­гъоу зэрэщыбэнагъэм къыкIэ­лъыкIуагъэр гушIуагъо — Бгъанэ Иляс къихьащт илъэсым Урысыем изэнэкъокъухэм ахэлэжьэщт.
Ныбэ Анзор.