Нысхъэпэ театрэу «Ды­шъэ къошыным» Iоф­шIэгъу лъэхъаныкIэр ­ыублагъ. КъэгъэлъэгъоныкIэхэм кIэлэцIыкIубэ къякIолIагъ.

А. де Сент-Экзюпери ипроизведение техыгъэ къэгъэлъэгъонэу «Маленький Принц» зыфиIорэр режиссерэу Татьяна Дрожжинам ыгъэуцугъ.
Партиеу «Единэ Россием» ифедеральнэ проектэу «Хэгъэгу цIыкIум икультур» зыцIэм ипрограммэу «Театрэхэр — кIэлэцIыкIухэм апай» зыфиIорэм ишIуагъэкIэ къэгъэлъэгъон гъэшIэгъоныр агъэуцугъ.
Пачъыхьэм ыкъо къехъу­лIагъэхэм, зыIукIагъэхэм, ежь щы­Iэныгъэмрэ шIулъэгъумрэ япхыгъэ гупшысэу къызэIуихыгъэхэм кIэлэцIыкIухэр ашIогъэ­шIэгъонэу алъыплъагъэх. Теат­рэм иактерхэм кIэлэцIыкIухэм алъагъэIэсыгъэр нысхъэпэ зэхашIэхэм бэкIэ апэчыжьагъ. Мыщ фэдиз цIыфыбэ зытет дунаишхом шъхьэзэкъоныгъэр сыдэущтэу епхыгъэн ылъэкIыщта? Сыда ащ ылъапсэ къызщежьэрэр? Джащ фэдэ упчIабэ нысхъапэхэм къаIэтыгъ, кIэлэцIыкIухэр рагъэгупшысагъ. Мы дунаим егъэпшэгъэ зэкъоны­гъэр зэрэтхьамыкIагъом къэ­гъэ­лъэгъоным урегъэгупшысэ. Пилотэу зыми зэхимышIыкIырэмрэ кIэлэцIыкIумрэ язэблэгъэныгъэ умыгъэшIэгъон плъэ­кIырэп. Гъэрэзэгъуаеу щыт Ро­зэрэ Баобабымрэ, пачъыхьэу пщыпIэ зимыIэр, ежь зышIоIушэу, зышIошъхьэшхоу, ау зыми къы­римыдзэрэр, зэкIэ хырыхыхьэхэр къэзышIэрэ Блэр ыкIи шэн-хабзэхэр зыгъэлъэпIэрэ Баджэр къэгъэлъэгъоным хэтых.
Актерхэм шIулъэгъуныгъэу кIэлэцIыкIухэм афыряIэр сценэм къыщагъэлъэгъуагъ. ШIыкIэ-­ама­лыкIэхэр нысхъэпэ театрэм ыгъэфедагъ.
— Къэгъэлъэгъоным мэхьа­нэу иIэм кIэлэцIыкIухэр ригъэгупшысэн, яакъыл, язэхашIэ къыгъэущын фае. Артистхэм ар къадэхъугъ. Къэгъэлъэгъоныр кIэлэцIыкIухэм лъэшэу агу ри­хьыгъ ыкIи ягуапэу еплъыгъэх, — къыIуагъ театрэм ипащэу Джолэ Ларисэ.
Театрэм пIуныгъэ мэхьанэу иIэм зэрэхэхъуагъэм, ар щы­Iэныгъэм зэрэщыщым, лIэшIэгъухэм ыкIи лIэужхэм язэп­хыныгъэ зэрэхэлажьэрэм щэч хэлъэп.
Лъэпшъыкъо
Фатим.