СамбэмкIэ дунаим ичемпионатэу шэкIогъум и 6-м щегъэжьагъэу и 10-м нэс Кыргызстан икъэлэ шъхьаIэу Бишкек щыкIуагъэм Адыгэ Республикэм щыщ Наш Расул хэлэжьагъ ыкIи дышъэ медаль къыщихьыгъ. Мы спорт Iофтхьэбзэ иным къэралыгъо зэфэшъхьафхэм ясамбист анахь лъэшхэм зыщаушэтыгъ.

АР-м и ЛIышъхьэу КъумпIыл Мурат Тэхъутэмыкъое районым испорт еджапIэу N 1-м зыщызыгъэсэрэ Наш Расул дунаим ичемпион зэрэхъугъэмкIэ къы­фэгушIуагъ.
— Бишкек щыкIогъэ чемпионатым къэралыгъо 77-мэ яспорт­смен 450-м ехъу хэлэжьагъ. Расул иухьазырыныгъэ шэпхъэ лъагэхэм зэрадиштэрэр джыри зэ къыгъэшъыпкъэжьыгъ, ыкIуа­чIэ къыгъэлъэгъуагъ ыкIи къытефэу дышъэ медаль къыхьыгъ. ТекIоныгъэм къыфэкIоным фэшI Израиль, Францием, Казахстан, Кыргызстан яспортсменхэм атекIуагъ, кIэухым Испанием илIыкIо щебэныгъ, ащи текIоныгъэр къышIуихьыгъ. Килограмм 71-м нэс къэзыщэчыхэрэм якуп нэбгырэ 26-рэ хэтыгъ. Расул ыкIуачIэ ицыхьэ зэрэтелъы­жьым, джащ фэдэу итренерхэу Джарымэкъохэу Нурбый, Рус­там ыкIи Азмэт зэпымыоу ащ Iоф зэрэдашIэрэм мы гушIуа- гъор къыкIэлъык1уагъ. Чемпионым ыкIи ар зыгъасэхэрэм сыгу къыздеIэу сафэгушIо, псауныгъэ пытэ яIэнэу, гъэхъэгъакIэхэр ашIыхэзэ ыпэкIэ лъыкIотэнхэу афэсэIо, — къащитхыгъ КъумпIыл Мурат социальнэ хъытыухэм.
Дунаим ичемпионат дышъэ медаль къыщызыхьыгъэ Наш Расул къыфэгу­шIуагъ Тэхъутэмыкъое районым испорт еджапIэу N 1-м иадминистрацие:
— Дунаим ичемпионат мэхьанэшхо зиIэ спорт зэнэкъокъу. Ащ текIоныгъэ къыщыдэпхыным къеушыхьаты спортсменым ухьазырыныгъэ дэгъу дэдэ зэриIэр. Расул къэралыгъо зэфэшъхьафхэм ялIыкIохэм ате­кIуагъ, IэпэIэсэныгъэ ин зэрэIэ­кIэлъыр къыгъэшъыпкъэжьыгъ. Ащ игъэхъагъэ пэпчъ тырэгу­шхо, текIоныгъакIэхэм ыкIи гъэ­хъэгъакIэхэм къазэрафэкIощтым тицыхьэ телъ. Лъэшэу тафэраз тиcпортсмен зыгъэсэгъэхэрэ Джарымэкъохэу Рус­тамрэ Азмэтрэ, иапэрэ трене­рэу Джарымэкъо Нурбый. Ахэм яшIуагъэкIэ Расул мыщ фэдэ лъэ­гапIэхэм анэсын ылъэкIыгъ.
Наш Расул джыри гъогу тет, непэ ащ ичылэ гупсэ щыпэгъокIыщтых, чемпионыр агъэшIощт, мэхьанэшхо зиIэ итекIоныгъэ хагъэунэфыкIыщт.