Шъолъырхэр зыхэлэжьэгъэхэ форумэу «Для СВОих» зыфиIорэр Мыекъопэ къэралыгъо технологическэ университетым щыкIуагъ. Адыгеим, Краснодар краим ащыщхэу хэушъхьа­фыкIыгъэ дзэ операцием хэлэжьагъэхэр мамыр щыIа­кIэм хэгъэ­гъозэжьы­гъэнхэм, ахэм ыкIи яуна­­гъохэм IэпыIэгъу афэхъугъэным Iофтхьабзэр афэIорышIагъ.

Къэралыгъо хэбзэ къулыкъухэм, общественнэ организациехэм ялIыкIохэр, зэо зэфэшъхьафхэм яветеранхэр ащ къырагъэблэгъагъэх. Джащ фэдэу мыхэр щысэтехыпIэ афэхъунхэм фэшI ныбжьыкIэ организациехэри, студентхэри хагъэ­лэжьагъэх. ПстэумкIи нэбгырэ 200-м ехъу ащ щызэфэсыгъ.
АР-м и Правительствэ яIэпыIэгъоу Iофтхьабзэм кIэщакIо фэхъугъэх общественнэ-къэралыгъо организациеу «Урысыем илъэпкъхэм я Ассамблее», Урысые обществэу «ШIэныгъэр», Пшызэ къэзэкъыдзэм и Мыекъопэ къэзэкъ отдел.
АР-м и ЛIышъхьэу КъумпIыл Мурат ыцIэкIэ къэзэрэугъоигъэхэм закъыфигъэзагъ лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ шъолъыр Комитетым итхьаматэу Долэ Долэт. НыбжьыкIабэ Iофтхьабзэм къызэреблэгъагъэр зэригуапэр ащ къыхигъэщыгъ. КъыткIэхъухьэрэ лIэужхэу неущырэ мафэр лъызыгъэкIотэщтхэм япIуныгъэ-гъэсэныгъэ яIэным, ягушъхьэбаиныгъэ къызэтегъэнэгъэным иIофыгъохэм ар къатегущыIагъ.
— ХэушъхьафыкIыгъэ дзэ операцием хэлажьэхэрэм, ахэм яунагъохэм ящыкIэ­гъэ IэпыIэгъур ягъэгъотыгъэныр пшъэ­рылъ шъхьаIэу Адыгеим и ЛIышъхьэу КъумпIыл Мурат къыгъэуцухэрэм ащыщ. Мы Iофым республикэм ихэбзэ къулыкъухэр, партиеу «Единэ Россием» ишъо­лъыр къутамэ, лъэпкъ-культурнэ ыкIи дин объединениехэр, республикэм щыпсэухэрэр зэкIэ зэрипхыгъэх. ГуфэкIо куп 47-у Адыгеим щызэхэщагъэм зэпымыоу шIушIэ IэпыIэгъоу аугъоирэр дзэ операцием арагъащэ. Лъэныкъо зэфэшъхьафхэм атегъэпсыхьэгъэ IэпыIэгъур ветеранэу къэзыгъэзэжьыгъэхэм арагъэ­гъоты. Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ IофшIэнышхо зэшIуехы. Къэралыгъо ыкIи муниципальнэ хэбзэ къулыкъухэм къулайныгъэ ахэлъэу Iоф ащашIэным фэгъэхьазырыгъэнхэм тегъэпсыхьэгъэ программэу «Адыгеим и ЛIыхъужъхэр» зыфиIорэм ветеран 18 мы уахътэм хэлажьэ, — хигъэунэфыкIыгъ Долэ Долэт.
Урысыем и ЛIыхъужъэу, АР-м и Къэралыгъо Совет — Хасэм и Тхьаматэ игуадзэу, хэушъхьафыкIыгъэ дзэ операцием иветеранхэм я Ассоциацие ипащэу Цэй Эдуард Iофтхьабзэр лъигъэкIотагъ. Депутатхэм ацIэкIэ форумым хэлажьэ­хэрэм къафэлъэIуагъ яIофшIэн шIуагъэ къытэу рекIокIынэу.
— Патриотизмэр, ягукIуачIэ ыкIи Хэгъэгум зэрэфэшъыпкъэхэр непэ тидзэ­кIолIхэм ыкIи ветеранхэм язекIуакIэ къегъэлъагъо. Хэгъэгум иухъумакIохэм къыт­кIэхъухьэрэ лIэужхэр агъэсэнхэмкIэ мы форумыр амалышIу хъугъэ, джащ фэдэу ежь дзэкIолIхэр зыгъэгумэкIырэ упчIэхэр хабзэм ыкIи общественностым ялIыкIохэм занкIэу афагъэзэн алъэ­кIыщт, — къыIуагъ Цэй Эдуард.
АР-м IофшIэнымкIэ ыкIи социальнэ хэхъоныгъэмкIэ иминистрэ иапэрэ гуа­дзэу Екатерина Леоновар Адыгеим и ЛIышъхьэу КъумпIыл Мурат иунашъокIэ хэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъу ягъэгъотыгъэнымкIэ шъолъырым щагъэцэкIэрэ амалхэм игъэкIотыгъэу къатегущыIагъ.
Урысыем и ЛIыхъужъ тичIыгогъухэу хэушъхьафыкIыгъэ дзэ операцием щыфэ­хыгъэхэри ащыгъупшагъэхэп, зы такъикъ­рэ афэшъыгъуагъэх. Ахэм ащыщэу гене­рал-лейтенантэу Олег Цоковым янэ Iэгу теошхокIэ пэгъокIыгъэх.
Форумым ипрограммэ къыдыхэлъытэгъагъэх концерт Iахьыр, лекциехэр, зэIухыгъэ зэдэгущыIэгъухэр. КIэлэцIыкIухэр шъхьафэу аугъоигъэх, хэушъхьафыкIыгъэ интерактивнэ программэ ахэм къяжэщтыгъ.
Къэзэрэугъоигъэхэр секциехэмкIэ аго­щыгъэх. Обществэу «ШIэныгъэм» илIыкIохэу, шIэныгъэ зэфэшъхьафхэмкIэ кандидатхэр, экономикэмкIэ, психологиемкIэ ыкIи информационнэ щынэгъон­чъэнымкIэ экспертхэр ныбжьыкIэхэм лекциехэм къафеджагъэх.
Iэшъынэ Сусан.