Апэрэ лъэбэкъухэмкIэ IэпыIэгъушIу
АР-м ибзылъфыгъэхэм я Союз и Мыекъопэ къэлэ къутамэ ипредпринимательхэм я Клуб егъэджэн сыхьатэу «Бизнес-планым игъэхьазырын ыкIи икъэухъумэн» зыцIэр щыIагъ.
Предпринимательствэм хэхъоныгъэ ышIыным тегъэпсыхьэгъэ Iофтхьабзэр «Мой бизнес» зыфиIорэ Гупчэм иIэпыIэгъукIэ зэхащагъ. Ащ кIэщакIо фэхъугъ предпринимателэу Елена Лаврентьевар. Унэе бизнесыр къызэIузыхы зышIоигъохэм яапэрэ лъэбэкъухэм япхыгъэ Iофыгъохэр зыфэдэм зэхэщакIор къатегущыIагъ.
Егъэджэн сыхьатым къекIолIагъэхэм финанс шIэныгъэу яIэм хагъэхъон амал яIагъ, ежь ибизнес къызэIузыхы зышIоигъохэр шIыкIэ амалэу щыIэхэм ащагъэгъозагъэх. АщкIэ IэпыIэгъу афэхъущт лъэныкъоу бизнес-планым итхын шапхъэу пылъхэр зэхафыгъэх.
Мастер-классым илъэхъан бизнес-планыр зэрэзэхэбгъэуцощтыр ыкIи къызэрэуухъумэщтыр, лъэIу тхылъыр къэзытыхэрэм нахьыбэрэмкIэ хэукъоныгъэу ашIыхэрэр, джащ фэдэу комиссием ыпашъхьэ уипроект къызэрэщыбгъэлъэгъощтыр Елена Лаврентьевам къафиIотагъ.
ЦIыфым иунэе IофшIэпIэ цIыкIу къызэIуихы шIоигъомэ, ау ащ пэIухьащт мылъкур фимыгъэкъурэмэ, бизнесым апэрэ лъэбэкъу щызышIы зышIоигъохэм къэралыгъо IэпыIэгъу зэрагъэгъотын зэралъэкIыщтыр зэхэщакIом къафиIотагъ.
— Унэе предприниматель хъу зышIоигъохэм яIоф ублапIэ фэхъущтхэм, бизнес-планыр зэрэзэхэбгъэуцощтым, грантыр, субсидиехэр зэрэбгъэфедэщтхэм непэ татегущыIагъ. Анахь гукъэкI дэгъу зиIэ цIыфхэр пэублэм щэщынэх, мылъкоу пэIухьащтым егупшысэх. Ежь-ежьырэу IофшIэн къызфэзгъотыжьыхэрэм къэралыгъом иIэпыIэгъу зэрагъотыщт амалхэр зэхэтфыгъэх. Грант IэпыIэгъум фытегъэпсыхьэгъэ зэнэкъокъухэм ахэлэжьэнхэмкIэ гухэлъыкIэхэр яIэу къэзэрэугъоигъэхэм ащыщыбэ зэрэчIэкIыжьыгъэм лъэшэу сигъэгушIуагъ,— къыIуагъ Елена Лаврентьевам.
Предпринимательствэ цIыкIумрэ гурытымрэ IэпыIэгъу афэхъугъэным иIофыгъохэр, бизнесым хэхъоныгъэ егъэшIыгъэнымкIэ цIыфхэр зыдэлэжьэнхэ фэе лъэныкъохэр зэхахьэм щызэхафыгъэх.
ЛэжьапкIэм итын, IофшIэнымкIэ фитыныгъэхэр мыукъогъэнхэм тегъэпсыхьэгъэ хэбзэгъэуцугъэхэм ягъэцэкIэн епхыгъэ упчIэхэри къаIэтыгъэх.
Шъхьэихыгъэ зэдэгущыIэгъур шIуагъэ къытэу рекIокIыгъ, егъэджэн сыхьатым хэлэжьагъэхэр зэхэщакIом зэрэфэразэхэр хагъэунэфыкIыгъ.
Мы мэфэ дэдэм АР-м ибзылъфыгъэхэм я Союз и Мыекъопэ къэлэ къутамэ ипредпринимательхэм я Клуб Iофтхьэбзэ гъэшIэгъон кIэщакIо фэхъугъ. «Стиль как инструмент личного бренда» зыцIэ егъэджэн сыхьатыр стилист IэпэIасэу Хъуажъ Заремэ зэхищагъ.
«FashIon» зыфиIорэ зэнэкъокъоу къалэу Краснодар аужырэ илъэсхэм щыкIорэм Заремэ изэхэщакIу, стилист, брендмейкер, модэм фэгъэхьыгъэ журналхэм, модельнэ агентствэхэм адэлажьэ.
Бзылъфыгъэ ныбжьыкIэхэр уахътэм дэлъэбэкъонхэм иамалхэм алъыхъугъэх. Щыгъыным мэхьанэу иIэр зэхахьэм щызэхафыгъ. Уахътэм къыдэкIорэ гупшысакIэхэр бизнесым зэрэщыбгъэфедэщтхэр, брендым узэрэдэлэжьэщтыр, шIыкIэ амалхэм шIуагъэ къатэу зэрэбгъэфедэнхэ плъэкIыщтыр Iофтхьабзэм къыщаIотагъ.
Лъэпшъыкъо Фатим.