ЦIыфхэр кIэщакIо зыфэхъугъэхэр бюджет ахъщэкIэ гъэцэкIэгъэнхэм (инициативное бюджетирование) шъолъырхэм Iоф зэрэдашIэрэр Урысыем финансхэмкIэ и Министерствэ зызэрегъапшэм, Адыгеир анахь дэгъухэм ясатырэ хэуцуагъ. 2024-рэ илъэсым изэфэхьысыжьхэм ар къыщыхагъэщыгъ.

Гурыт еджапIэхэр кIэщакIо зыфэ­хъухэрэр бюджет ахъщэкIэ гъэцэкIэгъэн­хэм (школьное бюджетирование) изегъэушъомбгъун хэушъхьафыкIыгъэу докладым игугъу къыщышIыгъ. Ащ финансхэм апылъ къулыкъухэми, гъэ­сэ­ныгъэм епхыгъэхэми анаIэ тыра­дзагъ.
Шъугу къэдгъэкIыжьын, цIыфхэр кIэщакIо зыфэхъугъэхэр бюджет ахъщэкIэ гъэцэкIэгъэнхэм епхыгъэу лъэныкъуитIу Адыгеим щыпхыращы. Зыр инфраструктурэм игъэкIэжьынкIэ чIыпIэхэр кIэщакIо зыфэхъугъэ проектхэр, ятIонэрэр — гъэсэныгъэм иучреждениехэм игъоу алъэгъухэрэр.
АР-м финансхэмкIэ и Министерствэ къызэрэщаIуагъэмкIэ, 2024-рэ илъэсым УФ-м ишъолъыр 28-мэ «школьнэ бюджетированиер» ащыпхыращыгъ. Ахэм ащыщ Адыгэ Республикэу проект 1705-рэ зыщагъэцэкIагъэр.
Апэу мыр зыщырахьыжьагъэр Кощ­хьэблэ районыр ары. Ащ иеджэпIэ 13-у проектым хэлэжьагъэ пэпчъ сомэ мин 350-рэ къыратыгъ. Мы илъэсым республикэм зэрэщытэу зэнэкъокъур щыкIуагъ. Ащ зипроект щыпхырыкIыгъэ команди 10-мэ кIэщакIо зыфэхъугъэ­хэм япхырыщын пае сомэ мин 350-рэ зыосэ сертификат зырыз аратыгъ.