Шэуджэн районым илIыкIо куп Луганскэ Народнэ Республикэм ит псэупIэу Дьяково шэкIогъум и 8-м щыIагъ. Хьакурынэхьаблэ щыщ Андырхъое Хъусен тарихъым къыхэнэгъэ лIыхъужъныгъэр 1941-рэ илъэсым шэкIогъум и 8-м мыщ щызэрихьагъ ыкIи апэрэ адыгэу Советскэ Союзым и ЛIыхъужъ хъугъэ.

Младшэ политрукым зыхэт подразделениер къыухъумэзэ, гъэрэу заримыгъа­штэу гранатыр къыгъауи, нэмыц нэбгырэ 30-м ехъу зыдихьыгъ. ЛIыгъэ зекIуакIэу къыхэфагъэм фэшI щымы­Iэжьым «Советскэ Союзым и ЛIыхъужъ» цIэр къыфагъэшъошагъ.
Дьяково щыпсэухэрэр Адыгеим икIыгъэ хьакIэхэм нэгушIоу къапэгъокIыгъэх. Ахэр чIыпIэ музием рагъэблэгъагъэх, къэгъэлъэгъонэу ащ чIэтхэм язы Iахь ЛIыхъужъым, джащ фэдэу адыгэхэм яшэн-хабзэхэм, якультурэ афэгъэхьыгъ. Советскэ дзэкIолIхэм ыкIи офицерхэм агъэфедэ хъугъэ гущыIэхэу «Урысхэм зыкъатырэп!» зыфиIорэр зыщыIугъэ зэопIэ чIыпIэми Шэуджэн районым икIыгъэ лIыкIо купыр щыIагъ. Зэкъош къэхалъэу Андырхъое Хъусен зыдэлъми дэхьагъэх.
— ХэмыгъэунэфыкIын плъэкIыщтэп, Хэгъэгу зэошхор заухыгъэм илъэс 80 тешIагъ нахь мышIэми, а мэфэ хьылъэхэм апсыхьэгъэ зэкъошныгъэр ыкIи зыкIыныгъэр непи щыI. ТиухъумакIохэм ялIыгъэ лIэужхэм яшIэжь пытэу къыхэнагъэу къэралыгъом ишъолъырхэр джы зэрепхых, — къыхигъэщыгъ АР-м и ЛIышъхьэу КъумпIыл Мурат.