ЛIыхъужъым IукIагъэх
Программэу «Адыгеим и ЛIыхъужъхэр» зыфиIорэм хэлэжьэрэ Алексей Бордюг Андырхъое Хъусен ыцIэ зыхьырэ кIэлэегъэджэ колледжым мы мафэхэм рагъэблэгъагъ, студентхэм гущыIэгъу афэхъугъ.
Iофтхьабзэм кIэщакIо фэхъугъэх шъолъыр программэу «Адыгеим и ЛIыхъужъхэр» пхырызыщырэ комитетымрэ «Адыгеим иныбжьыкIэхэр» зыфиIорэ Гупчэмрэ.
НыбжьыкIэхэм яхэгъэгу шIу алъэгъуным, тарихъыр ашIэным, лIыхъужъныгъэ зезыхьэхэрэм нэIуасэ афэшIыгъэнхэм Iофтхьабзэр афэIорышIэ. «Адыгеим иныбжьыкIэхэр» зыфиIорэ Гупчэм иIофышIэу ХьакIэмыз Заринэ къэзэрэугъоигъэхэр Алексей Бордюг нэIуасэ фишIыгъэх.
Алексей илъэс пчъагъэрэ АР-м хэгъэгу кIоцI IофхэмкIэ и Министерствэ ихэушъхьафыкIыгъэ подразделениеу ОМОН-м хэтыгъ, нэужым уголовнэ лъыхъоным зыфигъэзагъ. Пенсием зэкIом, хэушъхьафыкIыгъэ дзэ операцием ежь ишIоигъоныгъэкIэ кIуагъэ. 2024-рэ илъэсым къыщегъэжьагъэу 2025-м нэс ащ щыIагъ.
— Тихэгъэгу къехъулIэщтым сегъэгумэкIы, ар къэсыухъумэныр сипшъэрылъэу слъыти, дзэ IэпэIэсэныгъэу сIэкIэлъымкIэ сишIуагъэ къызэрэкIощтыр сэшIэти, бэрэ семыгупшысэу сыхэлэжьэнэу зэзэгъыныгъэм сыкIэтхагъ, — къыIуагъ ветераным.
ХэушъхьафыкIыгъэ дзэ операцием щэIэфэ пшъэрылъэу ыгъэцакIэщтыгъэхэр ныбжьыкIэхэм къафиIотагъ. ЗэуапIэм ыкIыб къикIырэ IэпыIэгъум мэхьанэшхо зэриIэр ветераным къыхигъэщыгъ. Плъыр-стырым хэт дзэкIолIхэр псаоу къэкIожьынхэу зэряжэхэрэр, кIэлэцIыкIухэм къафатхырэ письмэхэм кIуачIэ къазэрахалъхьэрэр къыхигъэщыгъ.
Алексей Бордюг къыIотэгъэ къэбарэу студентхэм нахь ашIогъэшIэгъон хъугъэр кIэлэцIыкIухэм къатхыгъэ письмэхэм ащыщ горэм зы шоколад цIыкIу къызыдэкIым, ар нэбгыри 7-мэ зэрэзэфагощыгъагъэр ары. Зы пшъэрылъ яIэу, зы Iулъхьэр тIо зэфашIыжьызэ яхэгъэгу дзэкIолIхэм къызэраухъумэрэр джащ къеушыхьаты.
Джащ фэдэу республикэ программэу «Адыгеим и ЛIыхъужъхэр» зыфиIорэм зэрэхэлажьэрэр ныбжьыкIэхэм къафиIотагъ. Ащ ишIуагъэкIэ, хэушъхьафыкIыгъэ дзэ операцием щыIэхэр ыкIи иветеранхэр къэралыгъо хэбзэ къулыкъухэм, чIыпIэ гъэIорышIапIэхэм Iоф ащашIэн амал къазэрэратырэм мэхьанэшхо зэриIэр къыкIигъэтхъыгъ.
КIэухым ныбжьыкIэхэр якъэралыгъо рыгушхонхэу ыкIи Хэгъэгум иухъумакIохэм ялIыгъэ лъытэныгъэ фашIынэу закъыфигъэзагъ. Студентхэр зыгъэгумэкIырэ упчIэхэм яджэуапхэр ветераным аритыжьыгъэх.
ДЕЛЭКЪО Анет.