Акъылыр чанмэ, щыIэныгъэр ­гугъатхъ. Акъылым Iоф езыгъэшIэрэ амалхэм нэжъ-Iужъхэр нэIуасэ зыщафашIыгъэхэ Iоф­тхьабзэ Мыекъуапэ щыкIуагъ.

Мысатыу зэхахьэу «Физическэ культурэмрэ спортымрэ хахъо ягъэшIыгъэнымкIэ Гупч» зыфиIорэр ащ икIэщакIу.
«НасыпышIуагъэм ыныбжь» зыцIэ социальнэ проектэу Гупчэм ыгъэла­жьэрэм ар къыдыхэлъытагъ. Ащ игъэцэкIэнкIэ республикэ бюджетым игрантэу мыгъэ къыдихыгъэр ащ ыгъэфедагъ.
ПстэумкIи нэжъ-Iужъ нэбгыри 100 Iофтхьабзэм хэлэжьагъ. Ахэр Мыекъуапэ имызакъоу Шэуджэн, Красногвардейскэ ыкIи Джэджэ районхэм къарыкIыгъэх. Илъэс 20 хъугъэу психологэу Iоф зышIэрэ Лада Пигузовам акъылыр зэщымыкъоу чанэу Iоф ышIэным пае бгъэцакIэмэ хъущтхэр джэгукIэ шъуашэм илъэу къаригъэлъэгъугъ. Ахэм гупшы­сэныр, шIэжьыр, акъылым Iоф зэри­шIэрэм ипсынкIагъэ нахьышIу ашIы.
«НасыпышIуагъэм ыныбжь» зыфиIорэ социальнэ проектыр зыныбжь илъэс 55-м ехъугъэхэм ателъытагъ. Ащ Iофтхьэбзэ зэфэшъхьафхэр къызэлъеубытых: къэ­шъох, гимнастикэ ашIы, къакIухьэ…. Тхьамафэм щыщэу мэфитфым ахэр зэ­хащэх.
— ИлъэсиплI хъугъэу мы проектыр тэгъэлажьэ. Апэ «ЦIыф чанхэр» тIуи тыублэгъагъ. Мыгъэрэм «НасыпышIуагъэм ыныбжь» тызэреджагъэр. Сыда ахэр зэрэзэтекIыхэрэр? Джырэ проектым егъэджэн зэфэшъхьафхэмрэ фестивалитIурэ хэдгъэхъуагъ. Джащ фэдэу районхэм ащыпсэухэрэри къызэтщэлIагъэх. Ары, Iоф зыдатшIэхэрэр 55-м къыще­гъэжьагъэу ныбжь зиIэхэр ары. Непэрэ мафэхэм яхъулIэу купышIу тэхъу. АшIогъэшIэгъонэу цIыфхэр ренэу тиIоф­тхьабзэхэм ахэлажьэх, — къыIуагъ со­циальнэ проектым ипащэу Марина Мельник.
ШэкIогъум и 21-м социальнэ проектым къыдыхэлъытэгъэ зичэзыу Iофтхьабзэ Мыекъуапэ щызэхащэщт. Районхэм къа­рыкIыщт купхэр ащ хэлэжьэщтых, зэнэ­къокъущтых.
Анцокъо Ирин.