Уголовнэ правэм, уголовнэ процессым, криминалистикэм ыкIи юридическэ психологием афэгъэхьыгъэ студенческэ фильм кIакохэм я Дунэе кинофестивалэу «Хэбзэгъэуцугъэм диштэу» зыфиIорэр Урысые Федерацием и Следственнэ комитет и Санкт-Петербургскэ академие щыкIуагъ, «ЦIыфым ишъхьа­фитныгъэ, инамыс ыкIи ынапэ тезы­хырэ бзэджэшIагъэхэр» — ары темэу иIа­гъэр. Адыгэ къэралыгъо университетым правэмкIэ и Институт икомандэ тырихыгъэ фильм кIакоу «ШIулъэгъур гъучI хъагъэм ыкIоцI» зыфи­Iорэр лъэныкъуитIумэ ащытекIуагъ — «Кавказ гъэра, хьаумэ ахьыгъа?» ыкIи «Хъулъфыгъэ анахь роль дэгъур» зыфиIохэрэм.

Кинофестивалым къыдыхэлъытагъэу видеоролик зы е лъэныкъо заулэхэмкIэ тырахынэу щытыгъ. ЗэкIэмкIи тематическэ лъэныкъоу щыIагъэхэр: «Кавказ гъэра, хьаумэ ахьыгъа?», «ЦIыфэу атыгъугъэхэм япхыгъэ хъугъэ-шIэгъэшхохэу хэгъэгум итарихъ хэхьагъэхэр», «ЦIыфхэр зэращэхэрэр», «ЦIыфхэм ящэн епхыгъэ дунэе синдикатхэр», «Къэбар жъугъэм иамалхэм пцIэу ащаусыхэрэр — федэ къэзытырэ сэнэхьата, хьаумэ уиIэпэIэсэныгъэ хэбгъэхъонымкIэ амалышIуа», «ЦIыфым ишъхьафитныгъэ, инамыс ыкIи ынапэ тезыхырэ бзэджэшIагъэхэм афэгъэхьыгъэ уголовнэ IофхэмкIэ следственнэ Iофтхьабзэхэр зэрэрагъэкIокIыхэрэр».
АКъУ-м правэмкIэ и Институт сатирическэ комедиеу «ШIулъэгъур хъагъэм» зыфиIорэр кинофестивалым къыщигъэлъэгъуагъ. АКъУ-м икомандэу «Юридическэ кадрэхэр» зыцIэм лъэныкъоу «Кавказ гъэра, хьаумэ ахьыгъа?» зыфиIорэмкIэ апэрэ чIыпIэр осэшIхэм къыфагъэшъошагъ.
— Фильмым бзэджэшIагъэу зэрахьэхэрэр зыфэдэхэр къыгъэлъэгъон, пэшIорыгъэшъ лъы­хъон Iофхэр агъэцакIэхэ хъумэ агъэфедэрэ шIы­кIэхэр къытынхэ, бзэджэшIагъэм иушъхьагъур, ар ашIэныр къызхэкIыгъэр ыгъэунэфын фэягъ. Илъэс заулэ хъугъэу АКъУ-м правэмкIэ и Институт кластернэ проектэу «Шъолъыр щынэгъончъагъэр ыкIи хэхъоныгъэ шIыгъэнымкIэ фитыныгъэр» зыцIэр зэригъэцакIэрэм мэхьанэ иI, ащ ипшъэ­рылъхэм ащыщ республикэм щыпсэухэрэм яфитыныгъэ зэхэшIыкI къэIэтыгъэныр. Джы мы кинофестивалым тызэ­рэхэлажьэрэм ишIуагъэкIэ, нахьыбэу тигу­къэкI­хэм ащыдгъэгъозэнэу амал дгъотыгъэ, — къы­Iуагъ командэм ипащэу, АКъУ-м правэмкIэ и Институт уголовнэ правэмкIэ ыкIи криминологиемкIэ икафедрэ ипрофессорэу Бэщыкъо Заремэ.
Адыгэ къэралыгъо университетым икомандэу «Юридическэ кадрэхэр» зыцIэм хэхьагъэх правэмкIэ Институтым икIэлэегъаджэхэмрэ я 3-рэ курсым ис студентхэмрэ. Сценариер зытхыгъэр ыкIи режиссерыр ЖакIэмыкъо Ислъам. Продюсерыр — Мариам Саад. Ахэм зы курсым къащыдеджэрэ студентмэ фильмым рольхэр къыщашIыгъэх: Владимир Тищенкэм, НапцIэкъо Азидэ, Бэрзэдж Бэллэ, Аджырэ Айтэч, СтIашъу Даринэ, Аулъэ Самирэ, Мариам Саад, Шэуджэн Шон, ХъокIон Бислъан, ХъуакIо Батырбий, Хьашъао Рамир ыкIи Лафышъэ Абрек. Кинофестивалым ижъуагъоу къыщыхагъэщыгъ АКъУ-м правэмкIэ и Институт истудентэу Владимир Тищенкэр – ащ дипломэу «Хъулъфыгъэ анахь роль дэгъур» зыфиIорэр къыфагъэшъошагъ. Командэм игъэсэкIуагъэх ыкIи иупчIэжьэгъугъэх юридическэ факультетым икIэлэегъаджэхэу Бэщыкъо Заремэ, Мэрэтыкъо Маргаритэ ыкIи Шъуаджэ Лейлэ.
Фильмым мыщ шъущеплъын шъулъэкIыщт: https://disk.yandex.ru/i/iJL7NKlwixjWsQ
АКъУ-м ипресс-къулыкъу.