ДзюдомкIэ республикэ турнир мы мафэхэм Адыгэкъалэ щыкIуагъ. СССР-м спортымкIэ изаслуженнэ мастерэу, дунаим ыкIи Европэм ащыкIогъэ зэнэкъокъухэм, СССР-м ичемпионатхэм гъогогъу пчъагъэрэ ащытекIогъэ Лъэцэр Хьазрэт ишIухьафтынхэм афэбэнагъэх Адыгеим икъалэхэм ыкIи ирайонхэм, джащ фэдэу Краснодар краим яспортсмен ныбжьыкIэхэр. Ахэм аныбжь илъэс 15-м, къащэчырэр килограмм 34-м къащегъэжьэгъагъ.

Адыгэкъалэ илIыкIохэм ухьазырыныгъэ дэгъу къагъэлъэгъуагъ, хагъэунэфыкIырэ чIыпIих аубы­тыгъ. Килограмм 34-м нэс къэзыщэчыхэрэм якуп текIоныгъэр къыщыдэзыхыгъэ Шъэумэн Бислъан техникэ анахь дэгъу къыгъэ­лъэгъуагъ, хэушъхьафыкIыгъэ шIухьафтынкIэ ар зэхэщакIохэм къыхагъэщыгъ. Шэуджэн рай­онымрэ Мыекъуапэрэ ядзюдоист­хэр ары анахьыбэу хагъэунэфыкIырэ чIыпIэхэр къэзыхьыгъэхэр. Ау Тэхъутэмыкъое районым испортсменхэр текIоныгъэу къыдахыгъэхэмкIэ апэрэх. Дышъэ медальхэр къахьыгъэх Артем Ким, Файз­мухамад Рустамовым, Бэгугъэ Ахьмэд. Лъэцэр Хьазрэт ахэм афэгушIуагъ ыкIи къалэжьыгъэ тынхэр аритыжьыгъэх, спортсмен ныбжьыкIэхэм тапэкIэ гъэхъэгъэшIухэр ашIынхэу афэлъэIуагъ.
УФ-м и Къэралыгъо Думэ идепутатэу Пэнэшъу Къэплъан ыцIэкIэ лъэпкъыр зэрыгушхорэ Лъэцэр Хьазрэт шIэжь Кубок фагъэшъошагъ.