Урысые Федерацием ­хэгъэгу кIоцI IофхэмкIэ икъулыкъухэм яIофышIэ и Мафэ фэгъэхьыгъэ мэфэкI зэхахьэ Мыекъуапэ щыкIуагъ. Iофтхьабзэм хэлэжьагъ Адыгеим и ЛIышъхьэу КъумпIыл Мурат.

Джащ фэдэу къулыкъушIэхэм къафэгушIонхэу къекIолIагъэх АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, хэбзэухъумэкIо къулыкъухэм, хьыкум хабзэм япащэхэр, АР-м хэгъэгу кIоцI IофхэмкIэ и Министерствэ епхыгъэ Общест­веннэ советым, ветеран организацием ялIыкIохэр.
Мы зэхахьэм ыпэкIэ Хэгъэгу зэошхом ыкIи ясэнэхьат пшъэ­рылъ агъэцакIэзэ фэхыгъэ къулы­къушIэхэм яшIэжь саугъэт зэхэт къэгъагъэхэр кIэлъыралъхьагъэх. Къэзэрэугъоигъэхэр зы такъикърэ афэшъыгъуагъэх зэмыблэжьхэу зикъулыкъу пшъэ­рылъ зыгъэцакIэхэзэ, зищыIэныгъэ заом илъэхъани, мамыр щыIакIэми зытыгъэхэм.

МэфэкI Iофтхьабзэм иIахь шъхьаIэ щыкIуагъ АР-м хэгъэгу кIоцI IофхэмкIэ и Министерствэ и Административнэ унэ.
Ар къызэIуихыгъ АР-м хэгъэгу кIоцI IофхэмкIэ иминистрэу Олег Безсмельницыным. Къулыкъум хэтхэм ясэнэхьат мэфэкIкIэ ар къафэгушIуагъ ыкIи къыхигъэщыгъ Министерствэм иIофы­шIэхэр япшъэрылъ зэрэфэшъып­къэхэр, ялIыгъэкIэ, яофицер щытхъукIэ, язэфагъэкIэ ыкIи цIыф­хэм яфитыныгъэхэмрэ Адыгэ Республикэм ищынэ­гъончъагъэрэ якъэухъумэн тегъэпсыхьэгъэ пшъэрылъхэр Iо хэмылъэу зэрагъэцакIэхэрэмкIэ къазэрэхэщыхэрэр.
«Ахэм еIолIапIэ имыIэу якъулы­къу пшъэрылъхэр шъо­лъырым имызакъоу, Донецкэ, Луганскэ республикэхэми, Запорожскэ ыкIи Херсон хэкухэми ащагъэцакIэх. Джащ фэ­дэу, ящыIэныгъэкIэ щынагъоу щытми, Урысые Федерацием игъунапкъэхэм къулыкъу ащахьы пыим цIыф зэрымыс ибыбырэ пкъыгъохэр къыраутэхыхэзэ. Сицыхьэ телъ тапэкIи тиIофышIэхэм къулыкъум ыпашъхьэ къырагъэуцорэ пшъэрылъхэр пшъэ­дэкIыжь хэлъэу зэрэзэшIуахыщтхэм!» — къыIуагъ Олег Безсмельницыным.

Хэгъэгу кIоцI IофхэмкIэ къулыкъухэм яветеранхэм, Общественнэ советым хэтхэм джащ фэдэу министрэм ирэзэныгъэ гущыIэхэр афигъэзагъэх ныбжьыкIэхэм япIуныгъэрэ хэгъэгу кIоцI Iоф­хэмкIэ Министерствэм еплъыкIэ дэгъу нэмыкIхэм фыряIэным яIахь зэрэхалъхьэрэмрэ пае. БзэджашIэхэм апэуцужьыгъэным ыкIи общественнэ щынэгъон­чъэныр зэшIохыгъэным апае къызэра­дэ­лажьэхэрэмкIэ рэзэныгъэ гущыIэхэр джащ фэдэу афигъэзагъэх нэмыкI шъо­лъырхэм яхэгъэгу кIоцI къулыкъухэми.
Министрэм шъхьафэу Адыгеим и ЛIышъхьэ гущыIэ фабэхэмкIэ зыкъыфигъэзагъ IэпыIэгъу къызэраригъэкIырэм, IофышIэхэр зэрэкIигъэгушIухэрэм, къулы­къоу ахьырэр зэрэкъиныр ыкIи зэрэщынагъор къызэрэгурыIорэм апае.
Нэужым полицием икъулыкъушIэхэмрэ иветеранхэмрэ зафигъэзагъ республикэм и ЛIышъхьэу КъумпIыл Мурат. Ащ пстэуми агу къыгъэкIыжьыгъ Президентэу Владимир Путиным Хэгъэгум иухъумакIо и Илъэсэу ыгъэнэфагъэм къэралыгъом хэушъхьафыкIыгъэ хъугъэ-шIагъэ зэрэщыхагъэунэфыкIырэр — ТекIоныгъэшхом ия 80-рэ илъэс. Хэгъэгу кIоцI IофхэмкIэ Министерствэм Iоф щызышIэхэрэм якъулыкъу ахьы дзэкIолIхэу текIуагъэхэм къагъэлъэгъогъэ щысэтехыпIэм ишап­хъэхэр къахафэхэзэ: лIыгъэр, псэемыблэжьыныгъэр, хьакъыр.
«Мафэ къэс цIыфхэм ящынэгъон­чъа­гъэ къэшъогъэгъунэ Хэгъэгум уфэшъып­къэнымрэ ар къэуухъумэным уфэхьазырынымрэ уахътэм емыпхыгъэ осэшхо зиIэ шэнхэу зэрэщытхэр къэжъугъэ­шъыпкъэжьызэ. БлэкIыгъэм илIыхъужъхэр тщыгъупшэхэрэп, Хэгъэгу зэошхом, зэмызэгъыныгъэ зэфэшъхьафхэм ыкIи рэхьатныгъэм икъэухъумэн зэшIуахызэ зищыIэныгъэ зытыгъэ пстэуми яшIэжь тэгъэлъапIэ. Ахэм ялIыхъужъныгъэ джырэ IофышIэхэр кIегъэгушIух якъулыкъу зэрифэшъуашэу ахьыным, ахэм яIоф дэгъоу зэшIуахы, пшъэрылъэу къафагъэу­цухэрэр хэушъхьафыкIыгъэ дзэ опе­­рацием гъэхъагъэ хэлъэу щагъэцакIэх», — къыIуагъ Адыгеим и ЛIышъхьэ.
Республикэм ипащэ къыкIигъэтхъыгъ дунаир зыщымырэхьат уахътэм шъо­лъырым ищынэгъончъагъэ къызэтебгъэ­нэным имэхьанэ зэрэиным.
«Экстремизмэмрэ терроризмэмрэ, экономическэ бзэджэшIагъэхэм ыкIи кибергъэпцIэным ябэныгъэнымкIэ, бзэ­джэшIагъэхэм якъычIэгъэщын хэгъэ­хъогъэнымкIэ сэнэхьатым хэшIыкIэу фы­шъуиIэмрэ шъуишIошъхъуныгъэрэ тащэгугъы. Пшъэрылъ анахь шъхьаIэхэу къэнэжьых: общественнэ чIыпIэхэм хэ­бзэукъоныгъэхэр къащымыгъэхъугъэнхэр, къэралыгъом къихьэхэрэм алъып­лъэгъэныр, гъогур щынэгъончъэныр. ПэшIорыгъэшъ IофшIэным хэгъэхъогъэн ыкIи цIыфхэр гъэдэIогъэнхэм чанэу дэлэжьэгъэн фае», — къыIуагъ КъумпIыл Мурат.
Республикэм ихэхъоныгъэкIэ пшъэ­рылъэу агъэуцухэрэр къадэхъунхэр мы Iофыгъохэр шIуагъэ къытэу зэшIохы­гъэнхэм зэрелъытыгъэр Адыгеим и ЛIышъхьэ къыхигъэщыгъ. Экономикэм, социальнэ лъэныкъом яхэхъоныгъэкIэ, цIыфхэм ящыIакIэ нахьышIу зышIыщт проектхэр пхырыщыгъэнхэмкIэ респуб­ликэм Iофышхо щызэшIуахы. КъумпIыл Мурат къызэриIуагъэмкIэ, зыпкъиты­ныгъэмрэ хэбзэ гъэпсыкIэмрэ щыIэхэ зыхъукIэ ары хэхъоныгъэхэр зыпшIы­шъущтхэр.
«Тэ талъэныкъокIэ джыри полицием иIофышIэхэм IэпыIэгъу тафэхъущт ыкIи тизэдэлэжьэныгъэ лъыдгъэкIотэщт пшъэ­рылъ шъхьаIэм — республикэм щы­псэу­хэрэм щыIэкIэшIу яIэным пае. Си­цыхьэ телъ Урысыем хэгъэгу кIоцI IофхэмкIэ и Министерствэ АдыгеимкIэ икъулыкъу Iоф щызышIэхэрэм тапэкIи пшъэрылъэу апашъхьэ итхэр шIуагъэ хэлъэу, къулыкъум лъытэныгъэу къылэжьыгъэр къагъэшъыпкъэжьызэ, зэрагъэцэкIэщтхэм. Тхьашъуегъэпсэу хэукъоныгъэ зыхэмыт, зэдегъэштэныгъэр зылъэпсэ Iофэу жъугъэцакIэрэмкIэ, ащ шъузэрэфэшъыпкъэм пае», — къыIуагъ Адыгеим и ЛIышъхьэ.
ЗиIофшIэнкIэ къахэщыгъэ къулыкъу­шIэхэр мыщ щагъэшIуагъэх. Хэбзагъэмрэ хэбзэукъоныгъэхэр къэмыгъэхъуны­гъэмрэ ягъэпытэн яIахь зэрэхалъхьа­гъэм пае Адыгеим и ЛIышъхьэ ирэзэныгъэ тхылъ афагъэшъошагъ Урысыем хэ­гъэгу кIоцI IофхэмкIэ и Министерствэ Мые­къопэ районымкIэ иотдел уголовнэ лъыхъонымкIэ икъулыкъу иоперуполномоченнэу Агыржьэнэкъо Джэнэт, Урысыем хэгъэгу кIоцI IофхэмкIэ и Ми­нистерствэ АдыгеимкIэ иштаб иин­спекцие иинспектор шъхьаIэу Михаил Морозовым, Урысыем хэгъэгу кIоцI IофхэмкIэ и Министерствэ Джэджэ районымкIэ иотдел иполицие участковэ уполномоченнэхэмкIэ икъулыкъу иинспекторэу Нэхэе Мурат, Урысыем хэгъэгу кIоцI IофхэмкIэ и Министерствэ Мыекъопэ районымкIэ иследственнэ отдел истаршэ следователэу Илья Сердцовым.
Джащ фэдэу къулыкъушIэхэм къафэгушIуагъэх АР-м и Къэралыгъо Совет — Хасэм и Тхьаматэу Владимир Нарожнэр, Урысыем щынэгъончъэнымкIэ и Федеральнэ къулыкъу и ГъэIорышIапIэу АР-м щыIэм ипащэу Михаил Кемеровыр, Урысыем хэгъэгу кIоцI IофхэмкIэ икъулыкъухэм ыкIи ихэгъэгу кIоцIыдзэ­хэм яветеранхэм яобщественнэ организацие ишъолъыр отделение итхьаматэу ХъутIыжъ Азмэт, АР-м хэгъэгу ­кIоцI Iоф­хэмкIэ и Министерствэ и Общественнэ совет итхьаматэу Хъунэго Рэщыдэ.
УФ-м хэгъэгу кIоцI IофхэмкIэ и Министерствэ итынхэр Iофтхьабзэм щаратыжьыгъэх, мэфэкIыр концерткIэ зэфашIыжьыгъ.
Адыгэ Республикэм и ЛIышъхьэ ипресс-къулыкъу