Адыгэ Республикэм и Общест­веннэ палатэ зичэзыу зэхэсыгъо иIагъ.

Наркотик лъэпкъ зэфэшъхьафхэр ыкIи акъылыр зэрмыр зышIырэ пкъыгъохэр тишъолъыр хэбзэнчъэу къызэрэщекIокIы­хэрэм, ащ епхыгъэ гумэкIыгъохэм ядэ­гъэзыжьын ар афэгъэхьыгъагъ.
Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард, шъолъыр министерствэхэм ыкIи къулыкъухэм, общественнэ организа­циехэм ялIыкIохэр, республикэм иапшъэ­рэ еджэпIитIумэ ястудентхэр.
Общественнэ палатэм итхьаматэу Устэ Руслъан къаIэтыгъэ Iофыгъом фэ­гъэхьыгъэу къэгущыIагъ. Ащ къызэрэхи­гъэщыгъэмкIэ, щыIэныгъэм къыдимы­штэрэ хъугъэ-шIагъэу тызэрихьылIэ хъу­гъэхэм бэмэ тарегъэгупшысэ. Ахэр зэкIэ зыпкъ къикIыхэрэм ащыщ наркоманиер.
— Хэбзэгъэуцу ыкIи гъэцэкIэкIо хабзэм якъулыкъухэм, хэбзэухъумакIохэм, граждан обществэм иинститутхэм зэрахьэрэ амалхэм ямылъытыгъэу наркоманием пэуцужьыгъэным иIофыгъо джыри шъхьаIэу къэнэжьы. Мыщ узэрэпэшIуекIощтыр лъэныкъо пстэуми зэпхыныгъэ зэдыряIэ зыхъукIэ ары, — къыIуагъ Устэ Руслъан.
Общественнэ организациеу «Адыгэ Хасэм» итхьаматэу ЛIымыщэкъо Рэмэзан наркоманием ыпкъ къикIыкIэ къа­лэхэми, къоджэ псэупIэхэми ащыхъурэм ягугъу къышIыгъ. Зэхэсыгъом хэла­жьэ­хэрэм анахьэу анаIэ зытырагъэтын фаехэм къащыуцугъ.
Адыгэ Республикэм хэгъэгу кIоцI IофхэмкIэ и Министерствэ наркотикхэм хэбзэнчъэу ягъэзекIон лъыплъэрэ и ГъэIорышIапIэ ипащэу Елена Аврашко наркотик лъэпкъ зэфэшъхьафхэр ыкIи акъылыр зэщызгъэкъорэ пкъыгъохэр зэрэзэрахьылIэхэрэм иIофыгъо къытегущыIагъ. 2025-рэ илъэсыр къызихьа­гъэм къыщегъэжьагъэу ащ епхыгъэ бзэджэшIэгъэ 398-рэ агъэунэфыгъ, ахэм ащыщэу 238-р — наркотик щэным фэгъэхьыгъ, бзэджэшIэгъэ 257-р къэбарлъыгъэIэс-телекоммуникационнэ амалхэр къызфагъэфедэхэзэ зэрахьагъ.
— НепэкIэ анахь Iофыгъо къызпыкIырэрэр наркотик сатыушIхэм социальнэ хъытыухэр ыкIи мобильнэ телефонхэр къызфагъэфедэхэзэ, а «щэнэутхэр» зэращэхэрэр ары, ащ епхыгъэу ахэм якъыхэгъэщын къызэрыкIоу щытэп. Анахь гъэры ехъулIэхэрэр кIэлэцIыкIу Iэта­хъохэр ыкIи ныбжьыкIэхэр ары. Бзэ­джашIэхэр психолог дэгъух, ахэм ренэу шIыкIакIэхэр къагъотых. ТигъэIорышIапIэ мафэ къэс ащ фэдэ интернет къэкIуапIэхэм якъыхэгъэщын ыуж ит. Мы уахъ­тэм ехъулIэу ащ фэдэ сайтхэр зэфашIынхэу лъэIу тхыгъи 182-рэ наркополицейскэхэм Роскомнадзорым рагъэхьыгъ. Зетхьэрэ пэшIорыгъэшъ Iофтхьабзэхэм ащыщ Iэтахъохэм ыкIи ныбжьыкIэхэм наркотикхэм зэрарэу къахьырэр къизы­IотыкIэрэ зэдэгущыIэгъухэр, лекциехэр, зэнэкъокъухэр афызэхэтщэнхэр. ПстэумкIи Iофтхьэбзэ 1200-рэ редгъэкIокIыгъ, — хигъэунэфыкIыгъ Елена Аврашко.
Адыгэ республикэ наркологие диспансерым иврач шъхьаIэ игуадзэу Хьапэпх Анжелинэ мы узыр зиIэхэр нахь пасэу къыхэбгъэщынхэу зэрэщытыр, ахэм зэряIазэхэрэр къыIотагъ. Джащ фэдэу гъэсэныгъэмрэ шIэныгъэмрэкIэ министрэм игуадзэу Артем Журавель республикэм ит еджапIэхэм наркоманием пэшIуекIорэ Iофтхьабзэу ащызэхащэхэрэм къатегущыIагъ.
Псауныгъэм зэрар езыхырэ шIыкIэхэр щыгъэзыегъэнхэмкIэ республикэм Iоф­тхьабзэу щызэрахьэрэр зэрэмымакIэр, ныбжьыкIэ спортым зызэриушъомбгъурэр зэхэсыгъом хэлажьэхэрэм хагъэунэфыкIыгъ. Патриотическэ пIуныгъэу ахэм адызэрахьэрэр тапэкIи нахь агъэлъэшынэу рахъухьагъ.
Хэгъэгу зэошхом ТекIоныгъэр къызщыдахыгъэр мыгъэ илъэс 80 зэрэхъугъэм къыдыхэлъытагъэу, Iофтхьабзэм къырагъэблэгъэгъэ ныбжьыкIэхэм Темыр Кавказыр шъхьафит ашIыжь зэ­хъум советскэ дзэкIолIхэм ыкIи партизанхэм зэрахьэгъэ лIыхъужъныгъэр къафиIо­тагъ АР-м иветеранхэм я Совет итхьаматэу Къоджэ Аслъан.
Iэшъынэ Сусан.