АР-м хэдзынхэмкIэ и Гупчэ комиссие я LXV-рэ зэхэсыгъо тыгъуасэ иIагъ. Ащ итхьаматэу Сэмэгу Нурбый Iофтхьабзэр зэрищагъ.

Зэхэсыгъом хэлэжьагъэх АР-м и Къэралыгъо Совет — Хасэм хэбзэихъу­хьанымкIэ, законностымкIэ ыкIи чIыпIэ зыгъэIорышIэжьыпIэхэм яIофхэмкIэ икомитет ипащэу Александр Лобода, политическэ партиехэм яшъолъыр къута­мэхэм, хэдзыпIэ округхэм япащэхэр, нэмыкIхэр.
Шъолъыр Парламентым идепутатхэм яхэдзынхэм апае зы мандат хъурэ хэдзыпIэ округхэр зэрэзэхэщэгъэщтхэ шIыкIэм апэ тегущыIагъэх. АР-м хэдзын­хэмкIэ и Гупчэ комиссие исекретарэу ХьацIэцIэ Фатимэ къызэриIуагъэмкIэ, ар илъэсипшIым зэ агъэпсы, АР-м и Къэралыгъо Совет — Хасэм изэхэсыгъо щаштэ.
Джы щыIэр 2016-рэ илъэсым зэхагъэу­цуи, аштэгъагъ. Ащ ипIалъэ къихьащт 2026-м игъэтхапэ екIы. Ар къэмысызэ икIэрыкIэу аштэжьын фае. СхемакIэр зэрэгъэпсыгъэщтым ХьацIэцIэ Фатимэ нэIуасэ къыфишIыгъэх. ГущыIэм пае, республикэм имуниципальнэ образованиехэм хэдзакIоу арысхэм япчъагъэ зыщыхэхъуагъи, нахь макIэ зыщыхъугъи ахэт. Ащ ифэшъуашэу зы мандат зиIэ хэдзыпIэ участкэхэм япчъагъи зэхъокIыныгъэхэр фашIыщтых.
Джащ фэдэу политическэ партиехэм ялIыкIоу АР-м и Къэралыгъо Совет — Хасэм хэтхэм яIофшIэн шъолъыр теле ыкIи радио къэтынхэм къащагъэлъэгъо­ным е къащаIотэным эфир уахътэу пэ­Iуагъэхьагъэм, ныбжьыкIэ хэдзыпIэ комиссиехэм ягъэпсын фэгъэхьыгъэ унашъоу АР-м хэдзынхэмкIэ и Гупчэ комиссие 2023-рэ илъэсым ыштагъэм зэхъокIыныгъэу фэхъущтхэм зэхэсыгъом щатегущыIагъэх.