ШэкIогъум и 10-р — Урысые Федерацием хэгъэгу кIоцI IофхэмкIэ икъулыкъухэм яIофышIэ и Маф
Хэгъэгу кIоцI IофхэмкIэ къулыкъухэм яIофышIэхэу ыкIи яветеранхэу лъытэныгъэ зыфэтшIыхэрэр!
Хабзэр къэухъумэгъэнымкIэ, бзэджэшIагъэхэм апэшIуекIогъэнымкIэ, цIыфхэм ярэхьатныгъэ лъыплъэгъэнымкIэ блэнагъэ шъухэлъэу пшъэрылъышхо зэшIошъохы.
Полицием къулыкъур щыпхьыныр Iоф къинэу щыт: щэIагъи, IэпэIэсэныгъи бэ ащ ищыкIагъэр, ау пстэуми анахь шъхьаIэр чIыпIэ къин дэдэхэм теубытагъэ хэлъэу уащызекIоныр ары. Адыгэ Республикэм хэгъэгу кIоцI IофхэмкIэ и Министерствэ иIофышIэхэм псынкIэу ыкIи зэдегъэштэныгъэ ахэлъэу япшъэрылъхэр зэрагъэцакIэхэрэм ишIуагъэкIэ республикэм общественнэ щынэгъончъагъэрэ рэхьатныгъэрэ илъых.
Гуетыныгъэшхо шъухэлъэу, шъузышъхьамысыжьэу къулыкъур зэрэшъухьырэм пае тызэрэшъуфэразэр къэтэIо. Анахьэу етIани хэгъэгу кIоцI IофхэмкIэ Министерствэм иветеранхэр ары зызыфэдгъазэмэ тшIоигъор: хэбзэухъумэн IофшIэным ихэхъоныгъэ яIахьышхо ахэм зэрэхашIыхьэрэм, IэпэIэсэныгъэ ин зиIэ IофышIэхэм ягъэхьазырын анаIэ зэрэтырагъэтырэм апае шъопсэу ятэIо.
Псауныгъэ пытэ, щыIэкIэшIу шъуиIэнэу, Урысыем ифедэ зыхэлъ къулыкъум гъэхъагъэхэр щышъушIынхэу шъуфэтэIо!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу
КъумпIыл Мурат
Адыгэ Республикэм и Къэралыгъо Совет — Хасэм
и Тхьаматэу Владимир Нарожнэр