Top.Mail.Ru

Мыекъуапэ щешIагъ

Image description

БаскетболымкIэ Урысыем ичемпионат иапшъэрэ лигэ хэт «Динамо-МГТУ-м» ешIэгъуиплI Мые­къуапэ щыриIагъ.

Республикэм икъэлэ шъхьаIэ ихьэкIагъэх «Нефтехимик» (Тобольск) ыкIи «ТСК-УРАЛ-УрГУПС» (Екатеринбург) зыфиIохэрэр. Мы командитIум зэнэкъокъум пэрытныгъэр щаIыгъ.
Адыгеим илIыкIохэм зы ешIэгъу ныIэп къахьын алъэкIыгъэр, «Нефтехимикым» 86:71-у текIуагъэх. Ащ къыкIэлъыкIорэ зэIу­кIэгъур Тобольскэ илIыкIохэм ахьыгъ, пчъа­гъэр — 81:66. Нэужым «Динамо-МГТУ-р» Екатеринбург икомандэ тIогъогогъо дешIагъ. Тибаскетболистхэм ащыщэу Алексей Медведевым командэм очко 32-рэ къыфихьыгъ, адрэхэми алъэкI къагъэнагъэп нахь мышIэми, хьакIэхэм зэIукIэгъуитIуми текIоныгъэр къащыдахыгъ — 74:57-у ыкIи 73:62-у.
ШэкIогъум и 16-м ыкIи и 17-м «Динамо-МГТУ-р» Чебоксары ихьакIэщт, «Чебоксарские ястребы» зыфиIорэ командэм тIогъогогъо IукIэщт.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

  1. «ТСК-УРАЛ-УрГУПС» (Екатеринбург) — 16.
  2. «Нефтехимик» (Тобольск) — 12.
  3. «Десна» (Брянскэ хэку) — 11.
  4. «Динамо-МГТУ» (Мыекъуапэ) — 9.
  5. «Динамо-2» (Уфа) — 9.
  6. «Русичи» (Курск) — 9.
  7. «Чебоксарсие ястребы» (Чебоксары) — 8.
  8. «ЦСП-Химки» (Московскэ хэку) — 8.
  9. «Южный слон-СКФУ» (Ставрополь) — 7.
  10. «Металлург-Челбаскет» (Челябинскэ хэку) — 7.