Адыгэ Республикэм и Къэралыгъо орэдыIо ыкIи къэшъокIо ансамблэу «Ислъамыемрэ» Къалмыкъым къашъомкIэ и Къэралыгъо театрэу «Ойраты» зыфиIорэмрэ концертэу «Дыхание двух стихий» зыфиIорэр къызэдатыгъ. Концертыр лъэпкъ искусствэм имэфэкI шъыпкъэ хъугъэ.

Апэрэ сыхьатым «Ислъамыем» программэ гъэшIэгъон къыгъэлъэгъуагъ. Ащ хэтыгъэх классическэ орэдхэм ямыза­къоу, адыгэ культурэм ибаиныгъэ къизыIотыкIырэ орэдыкIэхэри. Адыгэ шэн-хабзэхэм ядунай ухащэзэ мэкъамэхэр къырагъэIуагъэх. Ансамблэм иартист IэпэIасэхэм къэшъо гъэшIэгъонхэр къа­шIыгъэх. МэкъамэмкIэ ыкIи къашъомкIэ къыраIотыкIырэ номер пэпчъ тарихъ гъэшIэгъон пылъ.
Лъэпкъ искусствэм идэхагъэ цIыфхэм зэхашIэным, агу къинэжьыным ансамблэм иамалхэр рихьылIагъэх.
— Къалэу Элиста мыщ фэдэ дэкIыгъо къэгъэлъэгъонхэр къыщыттыгъ. Тиартистхэр нэIуасэ зэфэхъух, зэрэшIэх, шIэныгъа­кIэхэмкIэ зэхъожьых, — къы­Iуагъ «Ислъамыем» ихудожественнэ пащэу, АР-м искусствэхэмкIэ изаслуженнэ IофышIэшхоу Нэхэе Азэмат.
ЯтIонэрэ сыхьатым Къалмыкъым итеатрэу «Ойраты» концертыр лъигъэ­кIотагъ. ЦIыфэу къекIолIагъэхэр къалмыкъ культурэм идунай хащагъэх. Къа­шъо пэпчъ тарихъ гъэнэфагъэ зэрэпы­лъым, орэд пэпчъ лъэпкъым ыпсэ изы Iахьэу зэрэщытым гукIэ лъыIэсыгъэх. «Гъэмаф», «Улан Залата», «БзыуитIу якъэбар» зыфиIорэ къашъохэр купым дахэу къышIыгъэх.

— КъашъомкIэ театрэу «Ойраты» апэрэу Адыгеим къеблэ­гъагъ. Мыекъуа­пэ щыпсэухэрэр фабэу къытпэгъокIы­гъэх. Лъэпкъ искусствэр зикIасэхэм творческэ куп цIэрыIуитIумэ якъэгъэлъэ­гъон гухэ­хъошхо ха­гъотэнэу сэгугъэ. БэмышIэу «Ислъамыер» Къалмыкъым щытихьа­кIагъ, джы тэ тикъэгъэлъэгъон къышъуфэт­щагъ. Дунаим тет лъэпкъхэр зэрэшIэхэмэ, зыкIыныгъэрэ зэкъошныгъэрэ азыфагу илъыщт, — къыIуагъ театрэу «Ойраты» ибалетмейстерэу Владимир Надбитовым.
ЦIыфхэм лъэшэу агу рихьыгъэ концертым икIэух Нэхэе Азэматрэ Владимир Надбитовымрэ гущыIэ фабэхэмкIэ сценэм щызэхъожьыгъэх. Адыгеим и Концерт зэхахьэ ипащэу, АР-м культу­рэмкIэ иза­с­луженнэ IофышIэу Тхьаркъохъо Азэмат мы проект хьалэмэтым къызэрэ­дыри­гъэштагъэм­кIэ зэрэфэразэхэр ыкIи Адыгеим щыпсэухэрэр нэгушIоу къазэрыпэгъокIыгъэхэр хьакIэхэм къаIуагъ.
Концертыр дахэу рекIокIыгъ, Къалмыкъым итеатрэу «Ойраты» икъэгъэлъэ­гъон цIыфхэм шIукIэ агу къинэжьыщт.