Лъэпкъ зэфыщытыкIэхэмкIэ ­Советэу УФ-м и Президент дэжь щылажьэрэм изэхэсыгъо Владимир Путиным щыдыригъэ­штагъ 2026-р Урысыем щы­псэурэ лъэпкъхэм языкIыныгъэ и Илъэсэу гъэнэфэгъэным иIофыгъо ыкIи ащ тегъэпсыхьэгъэ унашъор агъэхьазырынэу ариIуагъ.

«Адыгеим щыпсэухэрэмкIэ мы гу­къэ­кIым мэхьанэшхо иI ыкIи къапэ­благъ, тыгу къыддеIэу детэгъаштэ, — къы­Iуагъ КъумпIыл Мурат. — Лъэпкъыбэр зэрыс республикэм ахэм къахэкIыгъэхэр зэдырагъаштэу, мамырэу щэпсэух зыфэдэ къэмыхъугъэ яхабзэхэр, якультурэ къау­хъумэхэзэ, ахэм хахъо афашIызэ.
Адыгеим щыпсэурэ лъэпкъхэр зэкIэ Урысыешхом хэпчынхэ умылъэкIынэу изы Iахьых. ЫкIи зыкIыныгъэм и Илъэс — джыри зы амал лъэпкъ зэгурыIоныгъэм имэхьанэ кIэгъэтхъыгъэнымкIэ, лъэпкъхэм язэкъошныгъэ гъэпытэгъэнымкIэ ыкIи тикъэралыгъо хахъо ышIыным пае Iоф зэдашIэнымкIэ.
Лъэпкъхэм языкIыныгъэ джырэ уахътэм зигъо Iофыгъоу ыкIи зимэхьанэ зыкъэзыIэтэу щыт. Къэралыгъом ипащэ къызэриIуагъэу, «лъэпкъ зыкIыныгъэм, дзэ зэкъошныгъэм ящысэ шъыпкъэ непэ хэушъхьафыкIыгъэ дзэ операцием къыщагъэлъагъо тилIыхъужъхэм, тидзэкIолI­хэм ыкIи тиофицерхэм. Ахэр зэгъусэхэу Урысыер къагъэгъунэ, зэуапIэм къыщагъэшъыпкъэжьы зэкIэхэмкIи зы лъэпкъэу тызэрэщытыр».
Адыгеим и ЛIышъхьэ къыхигъэщыгъ къэралыгъом ишъолъырхэм ялIыкIохэм Адыгеим идзэкIолIхэри зэрахэтхэр.
«Сицыхьэ телъ ТекIоныгъэр тэ къызэрэдэтхыщтым — илъэс 80-кIэ узэкIэ­Iэбэжьмэ, тикъэралыгъо Хэгъэгу зэо­шхом ТекIоныгъэр къызэрэщыдихыгъэм фэдэу. ЗыкIыныгъэмрэ обществэр зэ­рэ­зэкъоуцорэмрэ сыдигъокIи ткIуачIэ къэзыгъэпсыхэу щытыщтых, тарихъ шIэ­жьым икъызэтегъэнэжьынрэ къэралыгъом ихэхъоныгъэрэ афэIорышIэщтых.
Урысыем илъэпкъ зыкIыныгъэ и ­Илъэс къыхиубытэу зэхащэщт Iофтхьабзэхэм лъэпкъыбэ зыщыпсэурэ тиреспублики чанэу зэрахэлэжьэщтым сицыхьэ телъ. Мамырныгъэ щыIакIэм ишапхъэхэу шэн-­хабзэхэм, лъытэныгъэмрэ зэгурыIоныгъэмрэ якъызэтегъэнэн ыкIи яхэгъэ-­
хъон Адыгеим щылъыдгъэкIотэным пае тIэ илъ пстэури зэшIотхыщт. Лъэпкъым изыкIыныгъэ – тикIуачI, тикъэкIощт уахът ыкIи, тызэгъусэмэ, ти Хэгъэгушхо ифедэ пае лъэгэпIакIэхэм танэсыщт!» — къы­Iуагъ КъумпIыл Мурат.