Уголовнэ, граждан, арбитражнэ ыкIи административнэ Iоф анахь инхэу Адыгэ Республикэм ихьыкумхэм зэхафыгъэхэм афэгъэхьыгъэ брифинг Адыгэ ­Республикэм и Прокуратурэ щыкIуагъ.

Iофтхьабзэм хэлэжьагъэх прокуратурэм иуголовнэ-хьыкум отдел ипрокурорэу Артур Назарян, граждан ыкIи арбитражнэ Iофхэм язэхэфынкIэ прокурорым иIэпыIэгъоу Александр Яриджановыр.
Пэублэм Артур Назарян къызэриIуагъэмкIэ, 2025-рэ илъэсым иапэрэ мэзихэу пыкIыгъэм нэбгырэ 950-мэ алъэ­ныкъокIэ къызэIуахыгъэ уголовнэ Iоф 920-мэ республикэ хьыкумхэр ахэплъа­гъэх.
Къэралыгъо гъэпщынакIохэм япшъэ­рылъыр лажьэ зиIэхэм пшъэдэкIыжь арагъэхьыныр ыкIи уголовнэ хьыкум зэхэфыным хэлажьэхэрэм яконституционнэ фитыныгъэхэр амыукъонхэр ары. АщкIэ прокурорым щысэхэр къыхьыгъэх.
ГущыIэм пае, прокуратурэм иIофы­шIэхэм къадэхъугъэхэм ащыщ ЕмтIылъ А. М. ыкIи ЕмтIылъ С. А. уголовнэ пшъэ­дэкIыжьэу арагъэхьыгъэр. Хьыкумым ышIыгъэ унашъом къызэрэщиIорэмкIэ, мы нэбгыритIум къатыбэу зэтет унэхэм яшIынкIэ хэбзэгъэуцугъэу щыIэр аукъозэ, ащ фэдэ Iизын ямыIэу унэм изы Iахь тефэщт ахъщэр цIыфхэм къа­Iа­хыгъ ыкIи ежьхэр зэрэфаеу ар къызфагъэфедагъ.
2024-рэ илъэсым Iоныгъом и 6-м Тэхъутэмыкъое район хьыкумым А. Ем­тIылъым бзэджэшIэгъиплIэу зэрихьа­гъэмкIэ уголовнэ Iоф къыфызэIуихыгъ, илъэси 5 хьапс условнэу тырилъхьагъ.
Мы Iоф дэдэмкIэ бзэджэшIэгъитIу зэрэзэрихьагъэм фэшI С. ЕмтIылъым илъэси 3 хьапс условнэу тырилъхьагъ.
Хьыкумым ышIыгъэ унашъом Тэхъу­тэмыкъое районым ипрокуратурэ емызэгъэу апелляцие ытыгъ. 2025-рэ илъэ­сым мэкъуогъум и 30-м АР-м и ­Апшъэрэ хьыкум ащ хаплъи, прокурорым ­дыригъэштагъ. ЕмтIылъ А. М. илъэси 8 хьапс, ЕмтIылъ С. А. илъэси 5 хьапс атырилъхьагъ.
Александр Яриджановым къызэри­IуагъэмкIэ, цIыфхэм яфитыныгъэхэр зэтегъэуцожьыгъэнхэм епхыгъэ Iофы­гъохэм язэхэфын прокуратурэм инэ­плъэгъу ригъэкIыхэрэп. ЯIофшIэнкIэ анахь мэхьанэшхо зэратыхэрэм ащыщ цIыфхэм яфитыныгъэу аукъуагъэхэр зэ­тегъэуцожьыгъэнхэр.
2025-рэ илъэсым сомэ миллион 200-м ехъум япхыгъэу прокурорхэм ядэо тхылъ 900-мэ республикэм ихьыкумышI­хэр ахэплъагъэх. Ахэм янахьыбэр зы­фэ­гъэхьыгъэр цIыфхэм ыкIи дзэ опера­цием хэлажьэхэрэм ясоциальнэ фитыныгъэхэр зэтегъэуцожьыгъэнхэр ары.
ГущыIэм пае, хэушъхьафыкIыгъэ дзэ операцием хэкIодагъэм ышыпхъу Красногвардейскэ районым ипрокуратурэ идаокIэ зэтыгъо ахъщэу сомэ миллион хъурэр къыратыжьыгъ.
IофшIапIэм щыIэу шъобж зытещагъэ хъугъэ бзылъфыгъэм Мыекъуапэ ипрокуратурэ идаокIэ сомэ мини 150-рэ учреждением къыритыжьыгъ.
Мы аужырэ лъэхъаным хьэ гъорыкIохэр гумэкIыгъошхоу, анахьэу Мые­къуапэкIэ, щыIэхэм ащыщ. Мы илъэсым зыныбжь имыкъугъэхэм хьэхэр къяцэ­къагъэхэу Мыекъуапэ ипрокуратурэ дэо тхылъи 100-м ехъу къыIэкIэхьагъ. Мые­къопэ къэлэ администрацием сомэ мил­лион 1,5-рэ хъурэ зэрарыр къырагъэпщыныжьыным фэшI прокуратурэм идэо 60 агъэцэкIагъ.
КIэухым журналистхэм яупчIэхэм прокурорхэм джэуапхэр къаратыжьы­гъэх.
КIАРЭ Фатим.