Хы ШIуцIэ Iушъом щы­псэурэ шапсыгъэмэ гу­гъэпIэшхохэр къэзытырэ ныбжьыкIэхэр гъэ къэс къахэкIых.

Илъэситф зыныбжь Алан цIыкIум апэрэ лъэбэкъухэр спортым щешIых. ИлъэситIоу «джиу-джитсу» зыфаIорэ спорт лъэпкъымрэ бэнэнымрэ зы­щапылъым дунэе зэнэкъокъухэм текIоныгъэхэр къащыдихыгъ. Тренермэ зэраIорэмкIэ, шъэожъыем сэнаущыгъэшхо Тхьэм къыхилъхьагъ, ау анахь шъхьаIэр — спортивнэ шэн пытэ хэлъ.
Алан адыгэ лъапсэ иI — янэ, Русетэ Батырбый ыпхъум ылъэ­ныкъокIэ ар Шъачэ хэхьэрэ поселкэу Головинкэм щыпсэу­хэ­рэ Нэпсэу лIакъом епхыгъ. Ятэ, Арамаис Авагян (ащ янэ — УлапэкIэ Нажъхэм ащыщ) ­Мыекъуапэ къыщыхъугъ, самбэмкIэ ыкIи бразильскэ джиу-­джитсумкIэ тренер-кIэлэегъадж, джащ фэдэу физическэ культурэмкIэ кIэлэегъаджэу Псы­шIопэ гурыт еджапIэу N 99-м щэлажьэ.
Спортсмен цIыкIоу Головин­кэм дэт кIэлэцIыкIу IыгъыпIэм кIорэм мафэ къэс бэнэным зыфегъасэ, бэнэнымкIэ тхьамафэм зэ ТIуапсэ щызэхащэрэ мафэхэм ахэлажьэ. Алан ышнахьыжъхэм хабзэ афэхъужьыгъэ текIоныгъэхэр лъигъэкIо­тэнхэм зыфегъэхьазыры — къуа­джэу Агуй-Шапсыгъэ щыщ­хэу Ныбэ Амиррэ Тамерланрэ дунэе, урысые ыкIи шъолъыр зэнэкъокъухэм апэрэ чIыпIэхэр гъогогъу пчъагъэрэ къащыдахыгъэх. БэмышIэу ежь Алани бгъэхалъхьэхэр ыугъоихэу ригъэжьагъ, джырэ уахътэм медалиплI иI: мы илъэс закъом ащ зы «дышъэ», «тыжьынитIу» ыкIи зы «джэрз» зэкIэлъыкIохэу джиу-джитсумкIэ дунэе зэнэ­къокъухэу Москва, Шъачэ, Армением, Зэхэт Араб Эмиратхэм ащыкIуагъэхэм къащихьыгъ.
ТапэкIэ спортсмен цIыкIум джыри зэнэкъокъукIэхэр къежэх — Абу-Даби щыкIощт зэ­нэ­къокъу иным Алан хэлэжьэнэу щыт.
Ныбэ Анзор.