Общественнэ движениеу ­«Адыгэ Хасэм» и Совет зичэзыу зэхэсыгъо иIагъ. Мы аужырэ мэзищым Хэсашъхьэм иIоф­шIэн зыфэдагъэр ащ щызэфа­хьысыжьыгъ, тапэкIэ пшъэ­рылъхэм атегущыIагъэх.

Адыгэ Хасэм итхьаматэу ЛIымыщэкъо Рэмэзан изэфэхьысыжьхэм ащы­хигъэунэфыкIыгъ общественнэ-политикэ ыкIи культурнэ щыIакIэм, бзэм икъэу­хъумэн, мэфэкIхэм афэгъэхьыгъэ Iоф­тхьабзэу Адыгэ Республикэм щыкIуа­гъэхэм Хэсашъхьэм хэтхэр чанэу зэра­хэлэжьагъэхэр.
— ШышъхьэIум и 1-м къыщегъэ­жьагъэу IофшIэн макIэп зэшIотхыгъэр. Дунэе Адыгэ Хасэм изэхэсыгъоу Сыхъум щыкIуагъэм тыхэлэжьагъ. Ащ къэ­ралыгъо зэфэшъхьафхэм къарыкIыгъэ тилъэпкъэгъухэр хэлэжьагъэх. Ащ ыуж Тыркуем тыкIуагъ. КАФФЕД-м ипащэ зэIукIэгъу дытиIагъ, тилъэпкъэгъухэу ащ щыпсэухэрэм еджэнымкIэ, культурэм, бзэм якъызэтегъэнэнкIэ тизэдэлэжьэныгъэ зэрэгъэпсыгъэщтым тытегущы­Iагъ, унэшъо гъэнэфагъэхэр зэдэтштагъэх, — къыIуагъ ЛIымыщэкъо Рэ­мэзан.
Нэужым Хэсашъхьэм итхьаматэ Iоф­тхьабзэу зыхэлэжьагъэхэм ягугъу къы­шIыгъ. Тыркуем къикIыгъэ хьакIэ купыр Адыгэ къуаем ифестиваль ащэгъагъ. Ахэм ахэтыгъэ IэпэIасэхэм ащыщ иIэшIагъэхэр ащ къыщигъэлъэгъуагъэх. Адыгэ шъуашэм и Мафэ, джащ фэдэу республикэм имэфэкI зэрифэшъуашэу зыкъыщагъэлъэгъуагъ.
Адыгэ Хасэм итхьаматэ игуадзэу Хъот Юныс спорт зэнэкъокъоу зэхащэхэрэм къатегущыIагъ.
— Адыгэ Хасэр икIэщакIоу АР-м физическэ культурэмкIэ ыкIи спортымкIэ и Комитет къыддыригъашти, гъэзетэу «Адыгэ макъэм» ижурналист цIэрыIоу ЕмтIылъ Нурбый ишIэжь фэгъэхьыгъэ турнир икIыгъэ илъэсым дзюдомкIэ, мыгъэ — самбэмкIэ зэхэтщагъ. Къэ­кIощт илъэсым футболымкIэ зэнэкъокъу редгъэкIокIынэу зэдэтштагъ. Нурбый спортыр лъэшэу икIасэу фатхэщтыгъ, ар зыщыдгъэгъупшэ хъущтэп. Джы Мэщ­фэшIу Нэдждэтрэ сэррэ зы Iоф ыуж тит, ар адыгэ бэнакIэу ижъыкIэ щы­Iагъэр къэтIэтыжьыныр ары. Шапхъэу пылъыгъэхэм яугъоин мы уахътэм тыдэлажьэ, къыддэхъунэу, ашIогъэшIэгъонынэу тыщэгугъы, — къыхигъэщыгъ Хъот Юныс.
МэщфэшIу Нэдждэт ипсалъэ анахьэу зыфэгъэхьыгъагъэр бзэм иIофы­гъохэр ары.
— Илъэс пчъагъэхэм къакIоцI зэлъа­шIэрэ журналистэу ЕмтIылъ Нурбый емызэщыжьэу культурэм ылъэныкъокIэ тхагъэ. Джы ежь ыцIэ раIонэу Iофтхьэбзэ гъэнэфагъэ горэ фызэхашъущэмэ дэгъугъэ, — къыIуагъ Нэдждэт.
Хабзэ зэрэхъугъэу, общественнэ движениер грант зэнэкъокъухэм ахэлажьэ. ГъэрекIуи мыгъи сомэ миллионрэ ныкъорэ къыратыгъ. Адыгэ Хасэм хэт ГъукIэлI Сусанэ ащ фэгъэхьыгъэу къэгущыIагъ.
— Грантым ишIуагъэкIэ проектэу «Бзэр, культурэр ыкIи шэн-хабзэхэр — лъэпкъым ибаиныгъэх» зыфиIорэр пхырытэщы. Ащ къыдыхэлъытагъэу районхэм «Чэщдэс» ащызэхэтщэнэу итхъу­хьагъ. Красногвардейскэ районым ар щыредгъэкIокIыгъах, гъэшIэгъон дэдэуи хъугъэ, хэлэжьагъэхэм агу рихьыгъ. Адыгэ джэгухэм шIухьафтынхэр ары­лъэу зэхэтэщэх. Джащ фэдэу грант проектым хахьэу АР-м и Лъэпкъ музей иIофышIэу Тэу Аслъан археологиемкIэ ыкIи филологие шIэныгъэхэмкIэ кандидатэу Нэ­гъэрэкъо Казбек тарихъымкIэ ныбжьыкIэхэм лекциехэм къафеджэх, — хи­гъэунэфыкIыгъ ГъукIэлI Сусанэ.
Адыгэ Хасэм хэтхэу ЦIыкIушъо Ас­лъанрэ Къуижъ Къэплъанрэ зыфэгъэзэгъэхэ лъэныкъохэм къатегущыIагъэх. НыбжьыкIэхэр гъогу занкIэ тетынхэм, къэбар нэпцIэу къекIокIыхэрэм дамыхьыхынхэм ахэр къыфэджагъэх.
Iэшъынэ Сусан.