Лъэпкъхэм языкIыныгъэ и Мафэ фэгъэхьыгъэ мэфэкI Iофтхьабзэхэр Адыгеим имуниципалитет пстэуми ащыкIуагъэх. Анахь игъэкIотыгъэу ахэр зыщырекIокIыгъэхэр республикэм икъэлэ шъхьаIэ игупчэу «Зэкъошныгъэр» ары.

ОрэдыIо цIэрыIохэмрэ творческэ купхэмрэ концерт ащ къыщатыгъ, ащ дакIоу ныбжьыкIэ-патриотическэ ыкIи лъэпкъ-культурнэ движениехэм, лэжьэкIо купхэм ялIыкIохэр мэфэкI пчэгум къыщызэрэугъоигъэх. Адыгеим и ЛIышъхьэу КъумпIыл Муратрэ АР-м и Къэралыгъо Совет — Хасэм и Тхьаматэу Владимир Нарожнэмрэ республикэм щыпсэухэрэмрэ хьакIэхэмрэ афэгушIонхэу къэкIуагъэх. Джащ фэдэу Iоф­тхьабзэм хэлэжьагъэх АР-м ими­нист­рэхэм я Кабинет хэтхэр, шъолъыр пар­ламентым идепутатхэр, ветеран организациехэм яIэшъхьэтетхэр ыкIи дин конфессиехэм япащэхэр.

Шъугу къэтэгъэкIыжьы: лъэпкъ зыкIыныгъэм и Мафэ ихэгъэунэфыкIын лъапсэ фэхъугъэхэр 1612-рэ илъэсым щыIэгъэ хъугъэ-шIагъэхэр ары. ЦIыф лъэпкъ зэ­фэшъхьафхэм къахэкIыгъэ уIэшыгъэхэр зэкъоуцохи, Кузьма Мининымрэ Дмитрий Пожарскэмрэ япащэхэу, Москва шъхьафит ашIыжьыгъагъ.
Адыгеим и ЛIышъхьэ къэзэрэугъои­гъэ­хэм апашъхьэ къыщыгущыIэзэ, ­лъэпкъ зыкIыныгъэм и Мафэ фэшI зэ­кIэми къа­фэгушIуагъ, мы мэфэкIыр Урысыем щыпсэурэ цIыф лъэпкъхэм язэкъотныгъэ, якультурэрэ ягушъхьэ баиныгъэрэ ятамыгъэу зэрэщытыр къыхигъэщыгъ.
«Мы зыкIыныгъэм ылъапсэр лIэшIэ­гъубэ къызэпызычыгъэ баиныгъэр ары: унэгъо пытэр, зэдэIэпыIэжьыны­гъэр, нахьыжъхэм шъхьэкIафэ афэшIыгъэныр, зыщыпсэухэрэ чIыгу гупсэм шIулъэгъоу фыряIэр ары. Ахэр зэкIэ Адыгеим щыпсэурэ цIыф лъэпкъ зэ­фэшъхьафхэр илъэсипшI пчъагъэхэм зэкъозгъэуцохэрэ лъэпсэ пытэу, цы­хьэшIэгъоу щытых, ти Урысыешхуи ахэр ары нахь пытэ зышIыхэрэр», — къы­Iуагъ КъумпIыл Мурат.

IэкIыб къэралхэу джэгъогъуныгъэ къыт­фызиIэхэр Урысыем щыпсэурэ лъэпкъхэр зэпэIапчъэ ашIынхэу ыуж зэритхэм, ахэм языкIыныгъэ зэщагъэкъонэу зэрэпылъхэм зи къызэримыкIыщтыр республикэм и ЛIышъхьэ къыхигъэщыгъ. Ащ къызэриIуа­гъэмкIэ, зэдытие тарихъым ыгъэпытэжьыгъэ зэкъошныгъэр, шъхьафитныгъэм фэгъэхьыгъэ бэнэныгъэу акIуачIэ зэхэлъэу зэдашIыгъэр, лIэшIэгъу пчъагъэхэм къакIоцI аIэ зэкIэдзагъэу зэдагъэпсы­гъэр хэти едгъэукъощтэп.
«Ахэм зэрахьэгъэ блэнагъэр тинепэрэ лIыхъужъхэм лъагъэкIуатэ. Хэгъэгум иухъумакIо и Илъэс тидзэкIолIхэм тызэрарыгушхорэр нахь къыхэтэгъэщы. Зыч-зыпчэгъоу зэготхэу, тятэжъхэм ягъогу ахэр рэкIох, Урысыем инеущрэ мафэ фэбанэх. Тэ типшъэрылъыр къотэгъу пытэу ахэм тыряIэныр, ТекIоныгъэм пае тфэлъэкIыщтыр зэкIэ тшIэныр ыкIи ахэм яунагъохэм тадэIэпыIэныр ары», — къыIуагъ АР-м и ЛIышъхьэ.

ХэушъхьафыкIыгъэ дзэ операцием тичIыпIэгъухэу хэлажьэхэрэм IэпыIэгъу ятыгъэным пае хэбзэ къулыкухэм афэлъэкIыщтыр зэкIэ зэрашIэрэр ыкIи тапэкIи зэрашIэщтыр, республикэм ихэхъоныгъэ­хэм заушъомбгъунымкIэ, цIыфхэр гупсэфэу ащ щыпсэунхэмкIэ ыкIи Iоф щашIэнымкIэ гухэлъэу зыфагъэуцужьыгъэхэр гъэцэкIагъэ зэрэхъущтхэр Адыгеим и ЛIышъхьэ къыхигъэщыгъ.
Республикэм щыпсэухэрэм Iофышхо зэрагъэцакIэрэм, я Хэгъэгу гупсэ зэрэфэшъыпкъэхэм апае зэрафэразэр КъумпIыл Мурат къыIуагъ, Адыгеимрэ Урысыемрэ яфедэ зыхэлъ гъэхъэгъакIэхэр ашIынхэу, дунаир мамырэу, шIу щэхъу къадэмы­хъоу щыIэнхэу афэлъэIуагъ.
Республикэм щыпсэухэрэм шIуфэс псалъэкIэ закъыфигъэзагъ АР-м и Къэралыгъо Совет – Хасэм и Тхьаматэу Владимир Нарожнэм. Ащ къызэрэхигъэ­щыгъэмкIэ, Урысыем щыпсэурэ цIыфхэм языкIыныгъэу зэдытие тарихъыр зылъап­сэу щытыр къэухъумэгъэным мэхьанэшхо иI.
Адыгеим и ЛIышъхьэу КъумпIыл Мурат а Iофтхьабзэхэм ауж шIушIэ IэпыIэгъур хэушъхьафыкIыгъэ дзэ операцием ишъо­лъыр нэзгъэсынэу щыт автомобильхэм арысыщтхэм гущыIэгъу афэхъугъ. Партиеу «Единэ Россием» и Адыгэ шъолъыр къутамэрэ Народнэ фронтым икъутамэу Адыгэ Республикэм щыIэм игъэцэкIэкIо комитетрэ япащэу республикэм щыпсэурэ цIыфхэм ыкIи бизнес-сообществэм ялIыкIохэм агъэхьазырыгъэ тонн 200 фэдиз хъурэр ахэм ращэжьэщт. Ахэм ахэхьэх псэу зэшъощтхэр, окопхэм ащагъэфедэщт шэфхэр, къэбзэныгъэм епхыгъэ пкъыгъо зэфэшъхьафхэр, гъомылапхъэхэр, нэмыкIхэри.

КъумпIыл Мурат гъэхъагъэ хэлъэу япшъэрылъ агъэцэкIэнэу ыкIи респуб­ликэм икIыгъэ дзэ къулыкъушIэхэм ишIуфэс псалъэ анагъэсынэу, текIоны­гъэр къыдахынышъ, нахь псынкIэу ялъэ­ныкъо гупсэ къагъэзэжьынэу афэлъэ­Iуагъ. Партиеу «Единэ Россием» хэушъхьафыкIыгъэ дзэ операцием хэла­жьэхэрэм зэпыу имыIэу ишIуагъэ арегъэ­кIы, пстэумкIи а уахътэм къы­кIоцI IэпыIэгъу зэфэшъхьафэу тонн мини 5-м ехъу аIэкIагъэхьагъ.
МэфэкI Iофтхьабзэхэм ауж респуб­ликэм и ЛIышъхьэ лъэпкъ-культурнэ общественнэ организациехэм зэхащэгъэ къэгъэлъэгъонэу художественнэ ыкIи нэмыкI Iэпэщысэхэр зыхэлъхэр зэригъэ­лъэгъугъ.
АР-м и ЛIышъхьэ
ипресс-къулыкъу къытырэ къэбархэмкIэ Тхьаркъохъо Сафыет.