Бжыхьэм иаужырэ мазэу шэкIогъум Атлантикэм къикIырэ жьыбгъэм илъэшыгъэ хэхъощт. Ащ къы­хэкIэу температурэр къеIыхыщт, ощхи ос цIыни къы­хьынхэ ылъэкIыщт, чэщым ыкIи пчэдыжьыпэм чIыпIэ-чIыпIэу ащыпщэгъощт. ГурытымкIэ температурэр градус 0-м кIэхьащт.
ГидрометеорологиемкIэ ыкIи тыкъэзыуцухьэрэ дунаим иуплъэ­кIункIэ Гупчэм тызэрэщигъэгъозагъэмкIэ, шэкIогъум псыхъохэм адэт псым зыкъыIэтыным ищынагъо щыI. ГурытымкIэ температурэр шапхъэхэм афэдизыщт, ощхэу къещхыщтыри мэкIэщт.
Апэрэ мэфипшIыр: чэщым фабэр градуси 2 — 7, мафэм градуси 7 — 12 щыIэщт, къыхэкIыщтых фабэр градус 15 — 20-м зыщынэсыщтхэр.
ЯтIонэрэ мэфипшIыр: чэщым фабэр градус 0 — 5, градуси 5-м нэсэу фабэр къеIыхэу къыхэкIыщт. Мафэм фабэу градуси 6 — 11 щыIэщт.
Ящэнэрэ мэфипшIым нахь къэучъыIыщт, чэщым чъыIэу градус 1 — 6 щыIэщт, мафэм градуси 3—2-м акIэхьащт, градуси 5-м нэсэу мафэхэр фабэу къыхэкIыщтых.
ШэкIогъум псыхъохэм адэт псыр шапхъэу щыIэхэм ашIокIыщтэп. Ау мазэм къыкIоцI ощхыр лъэшэу къызещхырэм е ос къызесыкIэ псыхъохэм адэт псыр къыдэкIоен ылъэкIыщт. Ом изытет бжыхьасэхэм гумэкIыгъо къафихьыщтэп.

КIАРЭ Фатим.