ГандболымкIэ Урысыем и Суперлигэ хэт «АГУ-Адыифыр» Волгоград икомандэу «Динамо-Синара» зыфиIорэм мы мафэхэм IукIагъ.

Мыекъуапэ щыкIогъэ ешIэгъум хьакIэхэр нахь щылъэшыгъэх, ахэм текIоныгъэр къыдахыгъ.
«АГУ-Адыиф» — «Динамо-Синара» — 31:33 (19:18)
«АГУ-Адыифым» хэтыгъэх: къэлэпчъэ­Iутхэр — Черницовар, Гобадзе, Черновар. Смирновар — 13, Миловар — 7, Вайкум — 6, Кожубековар — 3, Краснокутскаяр — 1, Локян — 1.
«Динамо-Синара» щешIагъэх: къэлэпчъэ­Iутхэр — Баскаковар, Дувакинар. Загородневар — 11, Кирилловар — 4, Минченкэр — 4, Сливко — 4, Сисеновар — 4, Чураковар — 3, Федоровар — 1, Кириченкэр — 1.

Илъэс фэдизкIэ узэкIэIэбэжьмэ, мы коман­дэхэр Мыекъуапэ щызэIукIэгъагъэх. Ащы­гъум, Волгоград илIыкIохэм 31:35-у текIо­ныгъэр къыдахыгъагъ. Мыщ ыпэрэ турым «АГУ-
Адыифыр» «Кубань» дешIагъ, пчъагъэр зэфэдизэу зэIукIэгъур аухыгъ. Арышъ, тикомандэ текIоныгъэм зэрэфэбэнэщтым уехъырэхъы­шэжьынэу щытыгъэп. ЗэIукIэгъур гъэшIэ­гъонэу, узIэпищэу кIуагъэ, командэхэм гъогогъу 17-рэ пенальти агъэцэкIагъ. Апэрэ таймым ипэублэ тикомандэ къин къыщыхъугъ, я 20-рэ такъикъым ехъулIэу хьакIэхэр 9:15-у ыпэ итыгъэх. Ау къэлэпчъэIутэу Ольга Черницовар цыхьэшIэгъоу зэрешIагъэм, джащ фэдэу Елена Смирновам къэлапчъэм Iэгоуи 6 зэрэдидзагъэм яшIуагъэкIэ пчъагъэр зэфэдиз хъугъэ. Ащ ыуж Юлия Кожубековамрэ Анна Локянрэ къахэщыгъэх, пчъагъэр 19:18-у апэрэ едзыгъор бысымхэм ахьыгъ.
ЯтIонэрэ таймым типшъашъэхэм пчъа­гъэр 21:18 ашIыгъ. Ау «Динамо-Синарэр» къызэкIэкIуагъэп, я 43-рэ такъикъым ехъулIэу ахэр 25:24-у ыпэ ишъыгъэх. Аужырэ такъикъи 10-м республикэм игандболисткэхэр дэгъоу ешIагъэх, пчъагъэр 31:32 хъугъэ. Ау аужырэ такъикъым Елена Смирновар ешIапIэм къырагъэкIыгъ ыкIи хьакIэхэм пенальтир дэгъоу агъэцакIи, 33:31-у текIоныгъэр къыдахыгъ.
— КъызэрэттекIуагъэхэр тэры зилажьэр, хэукъоныгъабэ тшIыгъэ. Ау ешIэгъур гъэшIэгъоныгъ, ащкIэ пшъашъэхэм сафэраз. ТиешIакIэ нахь дэгъу зэрэтшIыщтым тапэкIэ Iоф дэтшIэщт, — къыIуагъ «АГУ-Адыифым» итренер шъхьаIэу Никита Голуб.
Мыекъуапэ икомандэ я 9-рэ чIыпIэм щыт. Апэрэр «Ростов-Дон» ыкIи «ЦСКА» зыфиIохэрэм зэдагощы. КъыкIэлъыкIощт зэIукIэгъур тигандболисткэхэм Мыекъуапэ щыря­Iэщт, шэкIогъум и 15-м «Звездар» тихьакIэщт.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Ростов-Дон» — 18.
2. «ЦСКА» — 18.
3. «Лада» — 12.
4. «Астраханочка» — 12.
5. «Черноморочка» — 11.
6. «Звезда» — 11.
7. «Динамо-Синара» — 9.
8. «Кубань» — 7.
9. «АГУ-Адыиф» — 5.
10. «Луч» — 3.
11. «Уфа-Алиса» — 2.
12. «Университет» — 0.