Лъэпкъхэм языкIыныгъэ и Мафэ ехъулIэу «Этно­графическэ диктантышху» зыфиIорэ Iофтхьабзэр Урысые Федерацием ишъолъырхэм офлайн шIыкIэм тетэу ащыкIуагъ. ПэIудзыгъэ шIыкIэм тетэу зызыушэты зышIоигъохэм джыри уахътэ яI, шэкIогъум и 8-м нэс ар атхын алъэкIыщт.

Хабзэ зэрэхъугъэу, Адыгеим щы­псэухэрэр мы Iофтхьабзэм чанэу хэлажьэх. Хэбзэ къулыкъушIэхэм, об­щественнэ организациехэм ялIыкIохэм, ныбжьыкIэхэм диктантыр атхынэу Адыгэ Республикэм и Лъэпкъ музей къекIолIагъэх, яшIэныгъэхэр ауплъэкIугъэх. Джащ фэдэу Адыгэкъалэ, Красногвардейскэ ыкIи Шэуджэн районхэм Iофтхьабзэр ащыкIуагъ.
Тарихъыр, культурэр, лъэпкъ зэфэшъхьафхэм яшэн-хабзэхэр цIыфхэм ягъэшIэгъэныр ары пшъэрылъ шъхьаIэу зэхэщакIохэм зыфагъэуцужьырэр. Урысые Федерацием щыпсэухэрэм зэгурыIоныгъэ, зыкIыныгъэ азыфагу илъыным, тарихъыр ашIэным Iофтхьабзэр фэIорышIэ.
АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет иотдел ипащэу Нэхэе Саидэ къызэриIуагъэмкIэ, мыгъэ диктантыр зызэхащэрэр илъэси 10 хъугъэ. А уахътэм къыкIоцI Iофтхьабзэм дунэе мэхьанэ иIэ хъугъэ. Илъэс къэс зызыушэтыхэрэм япчъагъэ хэхъо. Мыгъэ апэрэу, пэIудзыгъэ шIыкIэм тетэу, упчIищ хэушъхьафыкIыгъэ дзэ операцием хэлажьэхэрэм къатыгъ.
Iорытхыр сыхьатыр 11-м аублагъ. ЗэкIэмкIи упчIэ 30 ащ хэтыгъ, ахэр такъикъ 45-м къыкIоцI къашIыгъэх. Мы илъэсым шъолъыр упчIэхэр хагъэхьа­гъэхэп, федеральнэ упчIэ зэфэшъхьаф­хэм яджэуапхэр къаратыжьыгъэх.
Шъолъыр программэу «Адыгеим илIыхъужъхэр» зыфиIорэм хэтэу Александр Махневыр диктантыр зытхынэу къекIолIагъэхэм ащыщ.
— Урысыем щыпсэурэ лъэпкъхэм афэгъэхьыгъэ шIэныгъэу сIэкIэлъхэмкIэ апэрэу зысэушэты. Ахэм яшэн-хабзэхэр сшIогъэшIэгъоных. Лъэпкъ зыкIыныгъэм мыщ фэдэ Iофтхьабзэхэр фэIорышIэх, — къыIуагъ ащ.
— Республикэм щызэхащэрэ Iоф­тхьабзэхэм сигуапэу сахэлажьэ. Этнографическэ диктантышхом мыгъэ апэрэу сыкъекIолIагъ. Лъэпкъ зэфэшъхьафхэм япхыгъэ упчIэ гъэшIэгъон дэдэхэр хэтых. Мыщ фэдэ Iофтхьабзэхэм уитарихъ нахь куоу зэбгъэшIэным уафащэ, — къыIуагъ Адыгэ теле­видением ирежиссерэу Гъазые Би­рам­хъан.
Тыгъэгъазэм и 12-м, Урысые Федерацием и Конституцие и Мафэ зыщыхагъэунэфыкIыщтым ехъулIэу, «Этнографическэ диктантышхом» икIэуххэр зэфахьысыжьыщтых.
ДЕЛЭКЪО Анет.