КъокIыпIэм щыпсэурэ лъэпкъхэм яискусствэкIэ Къэралыгъо музеим икъутамэ загъэпсыгъэр мыгъэ илъэс 40 мэхъу. Къыхэгъэщыгъэн фае мыщ фэдэ къутамэ УрысыемкIэ зи­Iэр Адыгэ Республикэ закъор ары.

Ащ ихьатыркIэ Адыгеим амалэу IэкIэ­лъыр нахьыб, къэралыгъо мэхьанэ зиIэ Iофтхьабзэу музеим зэхищэхэрэм рес­публикэр нахь игъэкIотыгъэу къа­щы­гъэлъэгъуагъэ мэхъу. Непэ музеир шъо­лъырым инэпэеплъ, лъэпкъхэм якультурэ зэфэшъхьаф игъундж.
КъокIыпIэм щыпсэурэ лъэпкъхэм яискусствэкIэ Къэралыгъо музеим ­икъутамэ «Искусствэм ичэщ» зыфиIорэ Iофтхьабзэр щыкIуагъ. Музеим иэкспозициехэр хьакIэу къекIолIагъэхэм къаплъыхьагъэх, мастер-классхэм, лекциехэм ахэлэжьагъэх. Мыекъопэ районым икъэшъокIо ансамблэу «Сюрприз», къэ­зэкъ ансамблэу «Синичкина горка Косиново-Горского хуторского казачьего общества» зыфиIохэрэр концертым хэлэжьагъэх.

— «Искусствэм ичэщ» зэкIэми шъу­къетэгъэблагъэ. Тилъэпкъхэм языкIыныгъэ ыкIи язэкъошныгъэ гъэпытэгъэным Iофтхьабзэр тегъэпсыхьагъ. Дунаим тет цIыф лъэпкъхэр культурэм зэрепхых. Къэгъэлъэгъонэу, егъэджэн сыхьатэу, лекцие гъэшIэгъонэу, концертэу къы­шъуфэдгъэхьазырыгъэхэм шъуяплъынэу, шъуахэлэжьэнэу шъуетэгъэблагъэ, — къыIуагъ къэзэрэугъоигъэхэм закъыфигъазэзэ музеим ипащэу ШъэуапцIэкъо Аминэт.
Археологэу, музеим иIофышIэу Кирилл Еременкэм илекцие хьалэмэтэу «Тайны Шушука» зыфиIорэр зэхищагъ. Адыгеим щыкIогъэ тIэн IофшIэнхэм къащачIахыгъэ пкъыгъохэм ар къатегущыIагъ.
Сетэ Сафыет IэпэIэсэныгъэм фэ­гъэхьыгъэ егъэджэн сыхьат зэхахьэм къыщигъэлъэгъуагъ. КIэлэцIыкIухэр, искусствэр зышIогъэшIэгъонхэр хэдыкIыным, дышъэ блэрым яшъэфхэм ащигъэгъозагъэх.
«Музеим ичэщ» ишIуагъэкIэ респуб­ликэм имузейхэм яIофшIэн зыфэдэр цIыфхэм зэрагъэлъэгъун амал яIагъ.
Лъэпшъыкъо Фатим.