Культурэ хэхъоныгъэмкIэ Гупчэу «Ошъадэм» лъэпкъ культурэм иконцерт щыкIуагъ. Гупчэм зыщызыгъэсэрэ творческэ купхэу «Ащэмэзыр», «Синдикэр», ахэм якIэлэцIыкIу купхэр ыкIи «Бэгъэуджыр» ащ хэлэжьагъэх.

Илъэсым къыкIоцI рагъэкIокIырэ Iофтхьабзэхэм къэгъэлъэгъоныр къадыхэлъытэгъагъ. Ащ еплъынэу къекIолIагъэхэм гъэкIэжьыгъэ программэр къа­пагъохыгъ. КIэу хэтыгъэхэм ащыщ «Синдикэм» иартистхэм къашIыгъэ «Къэшъо къуанчэр». Джащ фэдэу «Убых къашъор» нахьыжъ ыкIи нахьыкIэ купхэм джы къызэдашIы. Лъэпкъ IорIотэ-этнографическэ ансамблэу «Ащэмэзым» пэсэрэ орэдыжъхэр апэрэу акапельнэу къыIуагъэх. Лъэпкъ мэкъэмэ Iэмэ-псымэхэмкIэ купэу «Бэгъэуджым» хэт шыкIэпщынаоу ГъукIэлI Дианэ апэрэу пчэгум орэд къыщиIуагъ.
— Зэкъо орэд къэIоным Дианэ цIыкIу-цIыкIоу хэтэщэ. Тиоркестрэ ар хэт шъхьаем, ныдэлъфэу мэкъэ дахэ иI. Арыти кушъэхэпхэ орэдыр къедгъэIуагъ. Пшъэшъэ гъэшIэгъонэу, сэнаущыгъэ хэлъэу щыт. Ар тинеущырэ маф, — еIо культурэ хэхъоныгъэмкIэ Гупчэу «Ошъа­дэм» ипащэу, АР-м изаслуженнэ артисткэу Едыдж Викторие.
Культурэ хэхъоныгъэмкIэ Гупчэу «Ошъа­дэр» къутырэу Гавердовскэм илъэс хъугъэу щэлажьэ. А уахътэм къы­кIоцI цIыфыбэ зэзыщэлIэрэ чIыпIэу хъу­гъэ. Ащ щызэхэщэгъэ творческэ купхэм афэшъхьафэу нэмыкIхэми къэгъэлъэ­гъонхэр къыщатых, Iофтхьэбзэ зэфэшъхьафхэр щызэхащэх. ЦIыфхэр ахэмэ къяжэх, бламыгъэкIэу къякIуалIэх. Мызыгъэгури ханагъэп. Концерт унэм зэ­рэчIафэу цIыфхэр — къутырым щыпсэухэрэр, къэлэдэсхэр, хьакIэхэр чIэсы­гъэх. Концертым еплъыгъэхэм ащыщ IэкIыбым къикIыгъэу хэкужъым къеблэгъэгъэ Хьабэхъу Джинэ. Къэгъэлъэгъон ужым ар пчэгум къырагъэблэгъагъ, ылъэгъугъэмкIэ, изэхашIэхэмкIэ къадэгощагъ.
— Пчыхьашъхьэ слъэгъугъэмрэ сы­къызхэхьагъэмрэ лъэшэу гъэшIэгъон. Загъорэ пкIыхьапIэ олъэгъу, «Тхьэм къыздегъэхъу» оIо, непэ пкIыхь дахэр къыздэхъугъ. Сэ Хьабэхъумэ сыряпхъу. Сирием сыкъыщыхъугъ. Илъэсишъэрэ тIокIищырэм IэкIыбым тыщыпсэугъэми, тыгъуасэ сыдэкIи непэ къэзгъэзэжьыгъэм фэдэу тихабзи, тикультури зы. Сирием сызщэпсэум, сэри адыгэ къа­шъохэм сахэтыгъ. Мы къашъохэр къэтшIыщтыгъэх. Сиунагъо сыкъихьажьы­гъэм фэд, — къыIуагъ ащ.
Илъэсыр екIыфэ культурэ хэхъоныгъэмкIэ Гупчэм иансамблэхэм джыри концертхэр къатыщтых. КIэлэцIыкIу купхэм язэхэт къэгъэлъэгъон охътэ анахь благъэхэм зэхащэщтхэм ащыщ.
Анцокъо Ирин.