Республикэм игъогухэм зягъэушъомбгъугъэнымкIэ IофшIэныр шъолъырым щылъэкIуатэ. Ащ инахьыбэр лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытагъэу агъэцакIэ.

Къэралыгъо IэпыIэгъум ишIуагъэкIэ щыIэ гъогухэр агъэ­кIэ­жьырэ къодыехэп, кIэхэри ашIых. Ащ фэдэ проектхэм ащыщ Мыекъуапэ къэзыухьэрэ гъогоу зишIын падзэжьыгъэр. Чъэпыогъум ащ ипхырыщынкIэ IофшIэнхэм яятIонэрэ Iахь, иящэнэрэ чэзыукIэ (къыблэмкIэ), аублагъ. Шъугу къэдгъэ­кIыжьын, ыпаIокIэ Мыекъуапэ къэзыухьэрэ гъогум щыщ километрэ 27-рэ ашIыгъагъ — къалэм икъохьапIэкIэ къикIэу темырым кIоу. Джы чэзыур къыблэмкIэ щыIэ Iахьым нэсыгъ.
СатыритIу хъурэ гъогукIэр къызщежьэрэр ТIуапсэ узыщэрэ гъогум дэжь щагъэпсыгъэ зэхэкIыпIэр ары. Къызщиухыщтыр автомобиль гъогоу А-159-рэ зыфиIоу Кавказ биосфернэ Къэралыгъо заповедникым узыщэрэ гъогум укъызытехьэрэм, псэупIэу Причитовскэм дэжь. Ар дэдэм Лэгъо-Накъи урынэ­сышъу. ГъогукIэр псэупIэхэу Табачнэм, Краснооктябрьскэм, хэпIэтедзэ зэхэтхэм апэблагъэу рекIокIыщт, псыхъохэу Къур­джыпсырэ Лучкэрэ зэпичыщтых.
— IофшIэнхэм ядэгъугъэ, игъом ыкIи шIуагъэ хэлъэу мылъкур агъэфедэным лъыплъэнэу Адыгеим псэолъэшIынымкIэ и Министерствэ тезгъэпытыхьагъ. Республикэм зекIоным зыщиушъомбгъунымкIэ мы проектым мэхьанэшхо иI. Къушъхьэ­хэм якIурэ гъогууанэр ащ ыгъэкIэкIыщт къодыеп, шъолъырым икъэлэ шъхьаIэрэ ащ къыпыщылъ псэупIэхэмрэ къадэхьэрэ автотранспортыр ыгъэмэкIэщт, — къащиIуагъ АР-м и ЛIышъхьэу КъумпIыл Мурат ихъытыу нэкIубгъохэм.
Мыекъуапэ къэзыухьэрэ гъогум иятIонэрэ Iахь иящэнэрэ чэзыу ишIын 2032-рэ илъэсым нэс къаухынэу рахъухьэ. ПсэолъэшIхэм гъогу километрэ 11-м ехъу, лъэмыджибл ыкIи зэхэщыпIэхэр ашIынхэу къапыщылъ. А пстэуми апэIухьащт ахъщэр къэралыгъо бюджетым къикIыщт.