Чъэпыогъум и 4-м къалэу Мые­къуапэ ЗыкIыныгъэм игупчэу дэтым лъэпкъ зыкIыныгъэм и Мафэ фэгъэ­хьыгъэ мэфэкI Iофтхьабзэхэр щыкIощтых.
Пчэдыжьым сыхьатыр 10-м гупчэм лъэпкъ Iэмэ-псымэхэмрэ Iэпэщысэхэмрэ якъэгъэлъэгъон-ермэлыкъ щызэхащэщт, ахэм яшIыкIи щыфагъэсэщтых.
Сыхьатыр 11-м ыныкъом мэфэкI концертэу Адыгэ Республикэм иорэдыIо цIэрыIохэмрэ итворческэ куп­хэмрэ зыхэлэжьэщтхэр аублэщт.
Сыхьатыр 11-м къыщыублагъэу лъэныкъо зэфэшъхьафхэм атегъэ­псыхьэгъэ егъэджэн-къэгъэлъэгъонхэр, упчIэ-джэуап джэгунхэр, лекциехэр щыIэщтых.
Мы мафэм партиеу «Единэ Россием» ишъолъыр къутамэ, Урысые народнэ фронтым ишъолъыр къутамэ ыкIи Адыгэ Республикэм ис бзылъфыгъэхэм я Союз зэдызэхащэрэ шIушIэ Iофтхьабзэр щыIэщт.
Сценэм щагъэуцугъэ экранхэм къащагъэлъэгъощт QR-кодымкIэ хэ­ушъхьафыкIыгъэ дзэ операцием хэлажьэхэрэм ыкIи ащ иветеранхэм шIушIэ IэпыIэгъу языты зышIоигъом ахъщэ афитIупщын ылъэкIыщт.
А Iофтхьабзэм илъэхъан гупчэм къыпэблэгъэ урамэу Советскэм хэ­ушъхьафыкIыгъэ дзэ операцием хэлэжьэрэ тичIыпIэгъухэм апае шIушIэ IэпыIэгъур зэрылъ автомобильхэр тетыщтых. Народнэ фронтымрэ партиеу «Единэ Россием» ишъолъыр къутамэрэ а IэпыIэгъур къызэдагъэхьазырыгъ.
Адыгэ Республикэм и ЛIышъхьэу КъумпIыл Мурат ахэр ыгъэкIотэщтых.
МэфэкIым хэлэжьэнхэ шIоигъоныгъэ зиIэ пстэури зэхэщакIохэм рагъэблагъэх.