Адыгэ Республикэм щыпсэухэу лъытэныгъэ зыфэтшIыхэрэр!
ТичIыпIэгъу лъапIэхэр!

Лъэпкъ зыкIыныгъэм и МафэкIэ тышъуфэгушIо!
Я ХVII-рэ лIэшIэгъум иублэгъум Кузьма Мининымрэ Дмитрий Пожарскэмрэ япащэхэу цIыф уIэшыгъэхэм поляк техакIохэр Москва зэрэдафыжьыгъагъэхэм мы мэфэкIыр епхыгъ.
Джащыгъум Урысыем ицIыф лъэпкъыбэхэр зыч-зыпчэгъоу зэрэзэкъоуцогъагъэхэр ары тихэгъэгу ишъхьафитыныгъэ ухъумагъэ зыкIэхъугъагъэр, полякхэмрэ литовцэхэмрэ ащ зэрэрафыжьыгъэхэр къэралыгъо гъэпсыкIэр зыпкъ игъэуцожьыгъэным, лъэпкъ зэгурыIоныгъэм ублапIэ афэхъугъ.
Лъэпкъхэм языкIыныгъэ и Мафэ тыгу къегъэкIыжьы лIэшIэгъубэмэ къакIоцI псыхьагъэ хъугъэ лъэпкъ зэгурыIоныгъэм мэхьанэшхо зэриIэр, зи зыпеIэн ымылъэкIыщт кIуачIэу ар зэрэщытыр, Урысыем икъэралыгъо гъэпсыкIэ игъэпытэн, ащ хэхъоныгъэ егъэшIыгъэным, Хэгъэгур нахь фэшIыгъэ, нахь лъэш хъуным ар зэрафэIорышIэрэр.
ГумэкIыгъохэмрэ Iофыгъохэмрэ непэ къызэрэуцухэрэм емылъытыгъэу, теубытэныгъэшхо, пытагъэ, зэгурыIоныгъэ зэрэтхэлъыр, Хэгъэгум тызэрэфэшъыпкъэр зэрэдунаеу нэрылъэгъу фэтэшIы. Урысые Федерацием и Президентэу Владимир Путиным зэрэхигъэунэфыкIыгъэу, «Урысыер нахь лъэш зышIырэр ицIыфхэр, ихабзэхэр, икультурэ, иэкономикэ, ичIыопс байныгъэхэр, зыкъыухъу­мэжьынымкIэ амалышхоу иIэхэр ары. Ау анахь шъхьаIэр – ткIуачIэ икъэкIуапIэу лъэпкъ зыкIыныгъэр ары».
ТичIыпIэгъу лъапIэхэр! Хъугъэ-шIэгъэшхор — ТекIоныгъэр къызыдахыгъэр илъэс 80 зэрэхъугъэр мыгъэ хэдгъэунэфыкIыгъ. ТекIоныгъэр къыдэзыхыгъэ пстэуми лIыгъэшхо зэрахьагъ, Хэгъэгум ишъхьафитыныгъэ къаухъумагъ.
Ятэжъ пIашъэхэм ахэлъыгъэ хэбзэшIухэр лъагъэкIуатэзэ, тидзэкъулыкъушIэхэр непэ Украинэм инацистхэм псэемыблэжьэу ябэныжьых, Урысыем ифедэхэр къагъэгъунэ.
ТекIоныгъэ къызэрэдэтхыщтым, обществэм изыкIыныгъэрэ изэкъотныгъэрэ кIочIэ къэкIуапIэу ренэу зэрэщытыщтхэм, тарихъ шIэжьым икъэухъумэнрэ хэгъэгум ихэхъоныгъэрэ ахэр зэрафэIорышIэщтхэм тицыхьэ телъ.
Адыгеим исхэм тыгу къыддеIэу тафэлъаIо псауныгъэ пытэ, щыIэкIэшIу яIэнэу, ти Хэгъэгушхо – Урысые Федерациер нахь фэшIыгъэ хъунымкIэ зыкIыныгъэрэ зэгурыIоныгъэрэ азыфагу ренэу илъынэу!
Адыгэ Республикэм и ЛIышъхьэу, Урысые политическэ
партиеу «Единэ Россием» и Адыгэ шъолъыр къутамэ
и Секретарэу КъумпIыл Мурат
Адыгэ Республикэм и Къэралыгъо Совет – Хасэм
и Тхьаматэу Владимир Нарожнэр